Judith Estrada-Larino

Bukas na muli ang mga sementeryo sa bansa simula ngayong araw na ito, Huwebes, ika-5 ng Nobyembre.

Ito ay makaraang isara muna ang mga sementeryo sa bansa mula ika-29 ng Oktubre hanggang ika-4 ng Nobyembre para maiwasan ang pagdagsa ng publiko sa paggunita ng Undas.

Nabatid na iilan na ang nakitang nagtungo sa Manila North Cemetery kaninang umaga.

Mahigpit pa ring pinaiiral ang health protocols sa mga nagtutungo sa mga sementeryo tulad ng pagsusuot ng face mask at face shield, gayundin ang physical distancing.

Nagkasa na ng preemptive evacuation sa Calayan, Cagayan dahil sa inaasahang epekto ng Bagyong Siony.

Umabot sa 12 pamilya ang inilikas mula sa Barangay Balatubat, Camiguin Island at dinala sa evacuation center sa Lyceum of Camiguin.

Inabisuhan na rin ang mga residente sa coastal areas na maging maingat at alerto sa posibleng pagkakaroon ng flashflood at coastal flooding.

Winelcome ng Food and Drug Administration (FDA) ang pagtatalaga kay Secretary Carlito Galvez, Jr. bilang vaccine czar na tututok sa pagbili at pamamahagi ng coronavirus disease 2019 (COVID-19) vaccines.

Tiwala si FDA Director General Eric Domingo na maganda ang magiging relasyon nila ni Galvez na aniya’y very efficient at professional.

Sinabi ni Domingo na mandato ng FDA na aprubahan ang ligtas at epektibong bakuna para magamit sa bansa at i monitor ang adverse events following immunization (AEFI).

Siyam na local government units ang tinukoy na coronavirus disease 2019 (COVID-19) high risk areas ng UP OCTA Research Team dahil sa mataas na arawang kaso, attack rate o high hospitalization occupancy.

Ayon sa report ng  OCTA Research Team ang Makati City, Malabon City, Baguio City,  Itogon, Benguet Tuba, Benguet, Lucena, Quezon ,Iloilo City , Catarman, Northern Samat at Pagadian, Zamboanga Del Sur ay maaaring makaranas ng hospital burden sa mga susunod na linggo na maaaring makayanig sa health care systems nito at makapagdulot ng stress sa kanilang medical frontliners.

Dahil dito isinulong ng OCTA research team ang pagpapalakas pa ng testing, contact tracing at isolation efforts para mapigil ang pagkalat ng COVID-19 sa kanilang komunidad.

Iginiit din ng grupo ng experts sa mga naturang high risk LGU’s ang mas agresibo at epektibong localized lockdowns na may mahigpit na border controls para sa mapigil ang viral transmissions.

Kasabay nito ipinabatid ng OCTA Research Team ang pagbaba ng COVID-19 cases sa national capital region matapos muling magsagawa ng COVID-19 testing ang Philippine Red Cross.

Otomatiko na ang pagpapatupad ng price freeze sa mga lugar na isinailalim sa state of calamity matapos humagupit ang magkasunod na  Bagyong Quinta at Rolly.

Ayon kay Trade Secretary Ramon Lopez  sakop ng price freeze ang mga pangunahing bilihin tulad ng mga de lata, instant noodles, kape at gatas.

Sinabi ni Lopez na automatic na ang price freeze sa itinuturing na calamity areas tulad ng Albay, Batangas, Oriental Mindoro at Marinduque na una nang sinalanta ng Bagyong Quinta.

Ganito rin aniya ang sitwasyon  sa Cavite, Camarines Sur at Occidental Mindoro matapos manalasa naman ang Bagyong Rolly.

Ayon kay Lopez  kakasuhan at pagmumultahin ng hanggang  P2 milyong ang lalabag sa price freeze.