Opisyal nang kabilang ang Pilipinas sa kategoryang upper-middle income country ng World Bank matapos umabot sa $4,850 ang gross national income per capita ng bansa, mas mataas sa itinakdang $4,636 na threshold.
Ayon kay Economy, Planning, and Development Secretary Arsenio Balisacan, nakamit ito ng bansa dahil sa matatag na paglago ng ekonomiya at maayos na pamamahala ng macroeconomy, kung saan nagtala ang bansa ng average na 5.8% GDP growth mula 2021 hanggang 2025.
Nagpapatunay, aniya, ang pagkakahanay ng bansa sa kategoryang upper-middle income country sa katatagan ng ekonomiya ng Pilipinas sa kabila ng mga pandaigdigan at lokal na hamon.
Inaasahan din ng kalihim na mapapalakas nito ang kumpiyansa ng mga mamumuhunan, mapapabuti ang credit profile ng bansa, at makahihikayat ng mas maraming de-kalidad na pamumuhunan at oportunidad sa trabaho.
Kinilala rin ni Sec. Balisacan ang malaking ambag ng mga overseas Filipino workers, kung saan bahagi ng gross national income ng Pilipinas ang kanilang kinikita sa ibang bansa. | Sa panulat ni Jordan Gutierrez
