‘Online caroling’.
Ito ang alternatibong nakikita ni Department of the Interior and Local Government (DILG) Secretary Eduardo Año sakaling ipagbawal ng IATF ang tradisyunal na caroling sa mga bahay.
Inamin ni Año na irerekomenda niya sa IATF na ipagbawal muna ang nakagawiang caroling sa nalalapit na kapaskuhan dahil sa banta ng coronavirus disease 2019 (COVID-19).
Sa ngayon aniya ay hindi pa ipinagbabawal ang pangangaroling sa mga bahay.
Halos pumalo na sa 400,000 ang kumpirmadong kaso ng coronavirus disease 2019 (COVID-19) sa bansa.
Umakyat na sa 399,749 ang kabuuang kaso ng COVID-19 sa bansa matapos maitala ang 1, 347 na bagong infection.
Ayon sa Department of Health (DOH) ang lalawigan ng Cavite ang nakapagtala ng pinakamataas na bagong kaso ng COVID-19 na nasa 92, sumunod ang lungsod ng Maynila – 77, Quezon City – 58, Baguio City – 55 at Laguna – 52.
Samantala naitala sa 361, 919 ang total recoveries matapos madagdag ang 187 patients na mga bagong gumaling sa nasabing sakit.
Sumirit naman sa 7, 661 ang death toll matapos madagdag ang 14 na bagong nasawi sa virus.
Ang nalalabing 30,169 active cases ay sumasailalim sa gamutan o quarantine kung saan 83% ang mild, 9.4% ang asymptomatic, 2.7% ang severe at 4.8% ang critical condition.
JUST IN: Kaso ng COVID-19 sa bansa, nadagdagan pa ng 21,347 ngayong Martes, Nobyembre 10.
Pumalo na sa kabuuang 399,749 ang bilang ng kumpirmadong kaso ng COVID-19 sa bansa. Mayroon namang 30,169 naitalang active cases. | https://t.co/HHOy7zaafm pic.twitter.com/l5zXAh0X1Z
— DWIZ Newscenter (@dwiz882) November 10, 2020
Ikinalugod ni Senador Bong Go ang pagkakatalaga kay NCRPO Chief, Police Major General Debold Sinas bilang susunod na hepe ng pambansang pulisya.
Ayon kay Go, maganda ang track record ni Sinas, kaya’t umaasa rin si Go na lalo pa nitong palalakasin at ipagpapatuloy ang paglabanan kontra iligal na droga, kriminalidad, at korapsyon.
Bukod pa kay Go, ani Senador Ping Lacson na dati ring PNP chief, mahusay ang pagkakahirang kay Sinas maliban sa mga kotrobersyang kinasangkutan nito.
Kilala ani Lacson si Sinas bilang mission oriented, performer, at walang kaduda-dudang maayos na mapamumunuan ang pambansang pulisya.
Sa huli, giit ni Lacson, nawa’y natuto na si Sinas sa kontrobersyang kinasangkutan niya makaraang magsagawa ng birthday Mañanita, na panigurado’y maaalala nito sa tuwing gagawa ng hakbang na makakaapekto sa kanilang hanay. —ulat mula kay Cely Ortega-Bueno (Patrol 19)
Iginagalang ng palasyo ang panukala ni COMELEC Commissioner Rowena Guanzon na isagawa ang 2022 elections sa pamamagitan ng mail voting.
Ayon kay Presidential Spokesman Harry Roque sa ilalim ng konstitusyon ay mandato ni Guanzon ang pag-supervise at pagsasagawa ng eleksyon.
Gayunman inamin ni Roque na hindi siya sigurado kung may pangangailangan pang-amyendahan ang Omnibus Election Code para bigyang daan ang mail in voting sa susunod na halalan.
Samantala tutol sina Senador Panfilo Lacson at Senate President Vicente Tito Sotto III sa nasabing panukala ni Guanzon.
Sinabi ni Lacson na hindi praktikal sa Pilipinas ang mail voting at tanging voting in person lamang ang u-ubra sa dahil wala pang ipinatutupad na national ID system sa Pilipinas.
Nangangamba naman si Sotto na mag-leak ang resulta ng botohan tama man o peke kapag ginawa ang mail voting.
Maaari aniyang dayain o magkaroon ng dayaan sa anumang paraan nito.
Isinusulong ni Senador Grace Poe ang paglalaan ng 3% ng nakokolektang buwis ng gobyerno bilang pondo sa paghahanda, pagtugon, rehabilitasyon at pagbangong mula sa kalamidad.
Ayon kay Poe sa dami ng tumatamang kalamidad sa bansa kailangang magkaroon ng regular na alokasyon at hindi u ubrang taas baba ang pondo para rito kada taon.
Dahil dito inihain ni Poe ang Senate Bill 124 o panukalang Philippine Disaster Risk Reduction and Management Act na naglalayong lumikha ng Department of Disaster Resilience and Emergency kung saan ilalaan ang 3% ng regular na nakokolektang buwis kada taon at bawal bawasan, isalin o ilipat.
Una nang pinuna ni Poe ang pagbaba ng alokasyon ng gobyerno sa calamity fund nito.
Hindi pa natatapos ang kampanya ni Senador Riza Hontiveros laban sa mga sangkot sa Pastillas scheme.
Sinabi ni Hontiveros na naniniwala siyang mayroon pang big fish o malalaking isda na direktang sangkot sa nasabing anomalya sa Bureau of Immigration dahil sa laki at lawak ng illegal business ventures na nakapalibot sa visa upon arrival scheme at human trafficking ng mga Pilipina.
Tiniyak ni Hontiveros na hindi natatapos sa pagsasampa ng kaso laban kay Red Marinias at mahigit 80 iba pa ang pagkilos nila para mapanagot ang mga ito sa naturang anomalya.
Binigyang diin ni Hontiveros na hindi sila titigil hanggang hindi nabibigyan ng hustisya ang mga kababaihan sa kalokohang ito.
‘Mind conditioning’
Ito’y ayon sa kampo ni Vice President Leni Robredo sa ginagawa ni dating Senador Ferdinand Bongbong Marcos matapos hilingin na mag-inhibit si Supreme Court Associate Justice Marvic Leonen sa kaniyang electoral protest laban sa Bise Presidente.
Ganito rin anila ang ginawa ni Marcos noon kay Associate Justice Alfredo Benjamin Caguioa ilang taon na ang nakakalipas.
Sinabi nina Atty. Beng Sardillo at Emil Maranion mga abogado ni Robredo na hindi na sila nagulat sa naging hakbang ni Marcos na kapag hindi nakuha ang gusto ay a-atakihin ang integridad ng isang institusyon o tao para mapuwersa ang mga ito na bumigay sa kanyang kagustuhan.
Inihayag ng mga abogado ni Robredo na nais nilang ipaalala kay Marcos na 2020 na at hindi na u-ubra ang pananakot na istilo ng yumaong amang diktador na si dating Pangulong Ferdinand Marcos.
Iginiit ng legal team ni Robredo kay Marcos na harapin nito ang realidad na ang bise presidente ang nagwagi ng 2 beses.
Available na sa katapusan ng 2021 o hanggang unang bahagi ng 2022 ang bulto ng mga bakuna kontra COVID-19.
Ayon ito kay National Task Force against COVID-19 Chief implementer Carlito Galvez, Jr. na nagsabing aabutin ng halos 6 na buwan ang pagpaplano at paghahanda para sa ikakasang pagbabakuna.
Malaking hamon din aniya ang supply ng bakuna dahil ang mga mayayamang bansa ang nakatitiyak na ng access sa karamihan sa mga bakuna.
Sinabi ni Galvez na sa kaso ng Pilipinas May o June 2021 ay mayroon nang bakuna sa pamamagitan ng Covax at bilateral agreement ng bansa.
Subalit inihayag ni Galvez na sa realidad huling bahagi pa ng 2021 o 2022 darating ang malaking bulto ng bakuna.
Tanging ang Chinese vaccine na Sinovac pa lamang ang naki-clear ng vaccine experts panel ng bansa sa ilalim ng DOST.
Nanindigan ang Department Of Health (DOH) na walang matibay na ebidensyang magpapatunay na maaaring mailipat ng mga alagang hayop ang COVID-19 virus sa mga tao.
Kasunod na rin ito ng report ng World Health Organization (WHO) hinggil sa bagong COVID-19 variant strain sa mga hayop tulad ng mink.
Ayon kay Health Secretary Maria Rosario Vergeire dapat mabusisi pa unang-una ang inilabas na ebidensya ng US center for disease control and prevention hinggil sa sinasabi nito nuon na pangunahing ang SARS COVID-19 virus ay naililipat mula sa isang tao patungo sa isang tao.
Una nang inihayag ng US CDC na posibleng magkahawaan ng COVID-19 ang tao at hayop bagamat maituturing itong rare case bagamat nagmula umano sa paniki ang virus na dala ng COVID-19.
Gayunman aminado ang CDC na lumalabas sa mga paunang obserbasyon nila na puwedeng mailipat ng tao ang virus sa mga hayop.
Binigyang diin ni Vergeire na hindi naman nila minamaliit ang posibilidad ng animal at human transmission subalit maglalabas sila ng protocols sakaling makakuha ng sapat na ebidensyang magpapatunay sa nasabing claim.
Nababahala ang ilang sektor sa mga panibagong development sa COVID-19 infections lalo na’t marami sa mga alagang hayop ng mga Pilipino tulad ng aso at pusa na libreng gumala sa labas ng bahay na nag e-expose sa mga ito sa virus ng COVID-19.
Ang British pharmaceuical firm na AstraZeneca ang nag-aalok ng pinakamurang posibleng bakuna kontra coronavirus disease 2019 (COVID-19).
Sinabi ni National Task Force against COVID-19 Chief Implementer Carlito Galvez, Jr. na ang AstraZeneca ay isa sa labing pitong pharmaceutical firms na ang potential anti COVID-19 vaccine ay sumalang sa review ng Philippine panel sa ilalim ng DOST.
Ipinabatid ni Galvez na batay sa company profile ng AstraZeneca pinakamura ang alok nitong bakuna na nasa limang dolyar kada dose at ang pag-develop nito ng bakuna ay hindi para kumita kundi para makapagbigay ng access sa mga mahihirap na bansa.
Lumalabas aniya sa paunang findings ng panel of experts na maganda ang evaluation ng astrazeneca na isang reputable pharmaceutical firm kaya’t inaasahan nilang tatlo hanggang 10-milyong dose ng bakuna ang kukunin ng bansa dito.
Dalawampung porsyento naman ng bakunang bibilhin ng bansa ay mula sa Covax vaccine facility na sanib puwersa ng manufacturers at experts na nagsusulong ng development, production at equitable access sa COVID-19 tests, treatments at vaccines.
Ang Covax vaccine ay tinatayang nagkakahalaga ng $21 dollars para sa dalawang dose na ituturok sa pagitan ng 28 days.