Judith Estrada-Larino

Kanselado ang online classes ngayong araw na ito sa ilang lugar sa bansa dahil sa Bagyong Ulysses.

Walang pasok sa lahat ng antas sa mga lalawigan ng Bulacan, Cagayan, Camarines Norte at Camarines Sur na hanggang araw na ng linggo.

Sa Metro Manila, suspendido rin ang online classes sa lahat ng antas sa Parañaque City at Pasig City, samantalang sa Taguig City ay mula kindergarten hanggang high school.

Ilang paaralan na rin ang nag-anunsyo ng kanselasyon ng online classes ngayong araw na ito na kinabibilangan ng Ateneo De Manila University — mula kindergarten hanggang high school, OB Montessori Center — Advanced Casa hanggang Grade 12, Quezon City Academy at San Sebastian Cathedral School of Tarlac — mula kindergarten hanggang high school, synchronous at asynchronous classes.

Nakipag-ugnayan na si Manila Mayor Isko Moreno sa pharmaceutical drug company na Pfizer kaugnay sa balak ng city government na pagbili ng coronavirus disease 2019 (COVID-19) vaccine para sa constituents ng lungsod.

Kasunod na rin ito nang pahayag ni Moreno na mayroon ng P300-milyon na pondo ang city government para ipambili ng bakuna.

Ayon kay Moreno, humingi lamang siya ng development sa mga opisyal ng Pfizer hinggil sa bakuna nito na una nitong ipinagmalaki dahil sa mahigit 90% effectivity nito laban sa COVID-19.

Tiniyak ni Manila Mayor Isko Moreno na mananatiling buhay ang diwa at tradisyon ng pasko kahit may pandemya.

Kaya naman ayon kay Moreno ay naglatag na ang City government ng mga ikakasang holiday events sa mga susunod na linggo.

Ipinabatid ni Moreno na magkakaroon pa rin ng tradisyunal na simbang gabi sa kartilya ng katipunan katuwang ang Quiapo church gayundin ang coffee festival na kape’t luntian sa Bonifacio Shrine Garden na pangangasiwaan ng Department Of Tourism, Culture and Arts of Manila at Sagada Coffee.

Nakalatag na rin aniya ang isang buwang bazaar na paskuhan sa  Maynila na inorganisa naman ng Bureau of Permits.

Umaasa si Moreno na magbibigay inspirasyon sa publiko ang mga nakalinyang aktibidad bilang pagsalubong na rin sa taong 2021 ng may pag-asa.

Pinapurihan ni Senador Sherwin Gatchalian ang pag-apruba ng senado sa ika-3 pagbasa sa panukalang magtataas sa allowance ng mga guro para sa teaching supplies.

Layon ng Senate Bill 1092 o panukalang teaching supplies allowance act of 2020 ang taunang pagtataas ng teaching supplies allowance o mas kilala bilang chalk allowance sa 5k mula sa 3k sa mga taong 2021-2022 at 2022-2023 , P7, 500 sa 2023-2024 at 10K sa 2024-2025.

Sinabi ni Gatchalian na bagamat isinulong niya ang P5K teaching supplies allowance bago ang pandemya welcome naman aniya sa kanya ang pagtataas nito kada taon para na rin makaagapay ang mga guro sa hamon ng distance learning.

Kapag naging batas na ang alokasyon ng teaching supplies allowance ay isasama na sa gaa o general appropriations act.

Hindi makakaapekto sa appointment ni bagong PNP Chief Debold Sinas ang kinakaharap na administrative at criminal charges matapos ang idinaos na birthday Mañanita event nito na paglabag sa lockdown protocols.

Ayon ito kay Presidential Spokesman Harry Roque dahil nakabinbin pa sa Taguig prosecutor’s office ang criminal charges laban kay Sinas kaya’t wala pang pananagutang kriminal sa isyu ang bagong hepe ng PNP.

Una nang idinipensa ni Roque ang appointment ni Sinas na aniya’y prerogative ng Pangulong Duterte.

Patay ang isang brodkaster matapos pagbabarilin ng riding in tandem sa labas ng kaniyang bahay sa Villasis, Pangasinan.

Kinilala ang biktima na si Virgilio Maganes, 62 taong gulang, komentarista sa radio station DWPR at nagsusulat sa lokal na pahayagang northern watch.

Ayon kay Police Major Christian Alucod, hepe ng Villasis police kababalik lang ni Maganes sa kanyang bahay mula sa isang tindahan nang pagbabarilin ito ng anim na beses kabilang ang tama sa ulo na kaagad nitong ikinamatay.

Kuwento ng mga testigo kapwa nakasuot ng black jacket ang dalawang suspek at magka-angkas sa isang yamaha nmax scooter.

Inaalam na ang motibo sa naturang pagpatay partikular ang posibleng kaugnayan nito sa naunang pagtatangka sa buhay ni Maganes nuong 2016.

May nasisilip na sabwatan ang kampo ni Vice President Leni Robredo sa pagitan nina dating Senador Ferdinand Bongbong Marcos, Jr. at Solicitor General Jose Calida kaugnay sa isinampang electoral protest laban sa bise presidente.

Ayon kay Atty. Emil Maranion, abogado ni Robredo plano nilang kuwestyunin sa korte ang aniya’y very abnormal at very suspicious na sabayang paghahain ng kampo nina Marcos at OSG sa pagitan ng pribadong kaso nina Robredo at Marcos.

Una nang hiniling ni Marcos ang pag inhibit ni Supreme Court Associate Justice Marvic Leonen sa 4 na taong poll protest nito dahil aniya nadedelay ang hustisya.

Naghain din ang OSG ng kaparehong mosyon ilang oras lamang ang lumipas.

Sinabi ni Maranion na physically impossible para sa OSG na maghanda ng sariling mosyon na mag-inhibit at i-file kaagad sa kaparehong araw na inihain ng kampo ni Marcos.

Pareho rin aniya ang mga ginamit na salita sa parehong argumento.