Judith Estrada-Larino

Walang major reshuffle sa mga opisyal ng Philippine National Police (PNP).

Ayon ito kay PNP Chief Police General Debold Sinas at tanging ang mga bakanteng pupuwesto lamang ang pupunan niya.

Sinabi pa ni Sinas na walang nagagalaw o maaapektuhang opisyal dahil lamang sa hindi niya kursunada ang mga ito kundi dahil siya ay Chief PNP ng lahat.

Si Sinas na miyembro ng Philippine Military Academy Hinirang class of 1987 ay nakatakdang magretiro sa may 2021.

Umapela si bagong PNP Chief Debold Sinas sa publiko partikular ang kaniyang mga kritiko na mag-move on kaugnay sa kontrobersyal na mañanita issue.

Ito ayon kay Sinas ay dahil hawak na ng Taguig City Prosecutor’s Office ang kasong kriminal na isinampa laban sa kanya.

Sinabi ni Sinas na dapat nang tuldukan ang mañanita issue kung saan nakalipas na ang anim na buwan at marami siyang gagawin bilang PNP Chief.

Bahagi na rin aniya ng kanyang trabaho bilang pulis ang mabatikos at wala naman siyang oras para sagutin ang lahat ng mga batikos sa kanya.

Una nang nag-sorry si Sinas sa manianita issue na naging dahilan nang paghahain laban sa kanya at 18 iba pa ng criminal complaints.

Wala pa rin namang resolusyon hinggil ito.

‘Welcome development’ ang plano ni U.S. President Elect Joe Biden na muling sumama sa Paris Agreement on Climate Change.

Ayon ito kay Congressman Ruffy Biazon dahil makikinabang dito ang Pilipinas lalo na’t kasama ang bansa sa hinahagupit ng malalakas na bagyo at hindi pangkaraniwang lagay ng panahon dahil sa climate change.

Sinabi ni Biazon na malaki ang epekto nang paghinto ng $3-billion U.S. funding lalo na sa climate change research kasunod nang ginawang pag-atras noon sa kasunduan ni U.S. President Donald Trump.

Ang Paris Agreement ay kasunduan ng United Nations Framework Convention on Climate Change kung saan sumang-ayon ang mga signatory sa boluntaryong pagbawas ng greenhouse gas emissions.

Iginiit ni AAMBIS OWA Party-list Representative Sharon Garin ang pag-apruba sa panukalang naglalayong palakasin ang Philippine Crop Insurance Corporation (PCIC).

Kasunod na rin ito nang pananalasa ng Bagyong Quinta at Rolly na matindi nag-iwan ng pinsala sa sektor ng agrikultura.

Layon ng House Bill 7627 na itaas ang capital stock ng PCIC sa P10-bilyon mula sa P2-milyon para makatulong sa mga maliliit na magsasaka at mangingisda kabilang ang pagpapalawig sa life at accident insurance coverage ng mga ito kasama na ang kanilang dependents.

Sa ilalim ng panukala, obligado ang PCIC na i-insure ang mga ari-arian at mga pasilidad ng gobyerno na ginagamit sa agriculture fishery forestry projects.

Nakasaad din sa panukala ang extension ng reinsurance coverage para sa pananim na palay at mais, high value commercial crops, livestock, aquaculture and fishery products, agro forestry crops at forest plantations.