Judith Estrada-Larino

Kailangang pang ma-rescue ang mahigit kalahati ng mga residente ng Marikina City na stranded sa kani kanilang mga bahay o rooftop dahil sa hagupit ng bagyong Ulysses.

Ayon ito kay Marikina City Mayor Marcelino Teodoro na nagsabing 4 sa 5 area sa lungsod ang labis na hinagupit ng bagyo.

Tuloy-tuloy naman aniya ang paglilikas nila at nananawagan sila sa ahensya ng gobyerno na tulungan sila sa rescue operations na nababalam dahil sa limitadong water assets ng city government.

Sinabi ni Teodoro  na manually operated at hind motorized ang kanilang rescue boat na inagos nang tumaas ang tubig at lumakas ang agos.

Tiniyak ni teodoro sa mga residente ng Marikina na nakipag-ugnayan na sila sa NDRRMC, Philippine Coastguard at PNP para sa rescue operations.

Inamin ni Teodoro na hindi nila inasahang aabot sa 22 meters ang water level sa Marikina river gayung ang pinakamataas lamang na antas nitong 18 meters ang pinagbatayan ng kanilang paghahanda base na rin sa data na mayroon sila.

Ipinaabot ni Supreme Court Chief Justice Diosdado Peralta ang pakikiramay nito sa pamilya ni Manila RTC Judge Maria Theresa Abadilla.

Si Abadilla ay nasawi matapos barilin ng branch clerk of court na si Atty. Amador Rebato, Jr. sa loob ng Manila RTC branch 45.

Sinabi ni Peralta na malaking kawalan sa hudikatura si Abadilla na personal niyang kilala bilang competent magistrate bukod pa sa nagmula sila sa parehong lalawigan.

Kasabay nito ipinag utos ni Peralta sa court administrator na magpatupad ng mas mahigpit na security measures para hindi na maulit ang naturang insidente.

Iniimbestigahan na ng National Privacy Commission (NPC) ang nangyaring data breach sa website ng land transportation office kung saan halos 13-M sasakyan ang rehistrado.

Ayon sa NPC nagsumite ng report ang LTO hinggil sa breach sa kanilang sistema nitong Martes at nakikipag ugnayan na ito sa ahensya para magabayan kung paano maayos ang mga problema.

Sinabi ng NPC na naglabas ng pahayag ang LTO noong nakalipas na linggo kung saan binabatikos nito ang lisensya info na website dahil sa paggamit ng logo nito na maaaring ikalito ng mga tao.

Mayroong motor vehicle authentication ang lisensya info website kung saan makikita kaagad ng kahit sino ang sensitibong impormasyon hinggil sa may-ari ng sasakyan, plate number, engine number, chassis number at iba pa sa pag-iinput lamang ng motor vehicle file number.

Dagdag pa ng NPC nabahala ang mga netizen sa datos ng lisensya info dahil tama ito kaya’t hinihinalang nagka-leak sa sistema ng LTO kung saan ang mga impormasyong nakukuha ay mga impormasyong ibinibigay ng motorista sa LTO.

Lumalabas sa paunang imbestigasyon ng NPC na walang privacy notice ang website at wala ring contact details ang may-ari nito.

Palakasin ang anti-drug campaign ng gobyerno.

Ito ang marching order ng Pangulong Rodrigo Duterte kay bagong PNP Chief Major General Debold Sinas.

Sinabi ni Sinas na dapat talagang gawin nila ang kanilang tungkulin para mabawasan o matigil ang pagkalat ng iligal na droga sa iba’t-ibang bahagi ng bansa partikular ang pagpapaigting sa high value targets.

Magugunitang umani ng iba’t-ibang reaksyon ang appointment ni Sinas na naging kontrobersyal matapos masangkot sa mañanita event sa kaniyang kaarawan noong Mayo sa gitna nang umiiral na lockdown dahil sa COVID-19 pandemic.

Bumaba ng 5% ang positivity rate ng COVID-19 transmission sa National Capital Region (NCR).

Ayon ito sa UP-OCTA research team na nangangahulugang naabot na ng Metro Manila ang ideal rate na inirerekomenda ng World Health Organization (WHO).

Sinabi ng OCTA team na bumaba sa 5% sa unang linggo ng Nobyembre ang positivity rate sa NCR mula sa 8% sa huling linggo ng Setyembre.

Binigyang diin ng researchers ang rekomendasyon ng WHO na manatili sa below 5% ang positivity rate sa loob ng dalawang linggo bago ikunsider ng gobyerno ang re-opening ng ekonomiya.

Iniulat din ng OCTA team na tumaas sa nakalipas na tatlong linggo ang reproduction number ng virus na nagdudulot ng COVID-19 sa point 88 subalit nanatiling mas mababa sa one kung saan una nang inihayag ng team na ang higit sa 1% ay indikasyon na ang pandemya ay lumalaganap.

Lampas na sa 400,000 ang kumpirmadong kaso ng COVID-19 sa bansa.

Ayon sa Department of Health (DOH) naitala ang 1, 672 na bagong kaso ng COVID-19 kaya’t pumapalo na sa 401, 416 ang kabuuang kaso ng nasabing virus.

Ipinabatid ng DOH na Cavite ang nakapagtala ng pinakamataas na bagong kaso ng COVID-19 na 100, sumunod ang Davao City – 99, Quezon City – 81, Batangas – 78 at Baguio City – 70.

Umakyat naman sa 362, 217 ang total recoveries nang maitala ang 311 patients ang mga bagong gumaling sa COVID-19 samantalang sumirit na sa 7, 710 ang death toll matapos masawi ang 49 na pasyente.

Ang nalalabing 31, 489 ay active cases na sumasailalim sa gamutan o quarantine kung saan 83. 3% ang mild, 9.4% an asymptomatic, 2.5% ang severe at 4.6% ang critical condition.