Judith Estrada-Larino

Balik na ang mga biyahe ng eroplano ngayong araw na ito.

Ayon sa Manila International Airport Authority (MIAA), may 126 commercial flights na ang inaasahang lalarga sa Ninoy Aquino International Airport (NAIA) ngayong araw na ito.

Ipinabatid ng miaa ang 22 biyahe ng eroplano ang naka-schedule na commercial flights sa terminal 1, 2 at 3 ng NAIA.

Gayunman, sinabi ng MIAA na maaari pang magkaroon ng pagbabago sa mga scheduled flights kaya’t mabuting tumawag muna sa airline kung nakaschedule ang biyahe ngayong araw na ito.

Prayoridad ng Department of Budget and Management (DBM) na kaagad maipalabas ang natitirang P1.9-bilyong calamity fund ngayong taon.

Ang pondo ay gagamitin para sa mga nasalanta ng mga nakalipas na malalakas na bagyo na Quinta, Rolly at Ulysses.

Ayon kay Budget Secretary Wendell Avisado, mayroong P3.6-bilyon sa 2020 National Disaster Risk Reduction and Management fund na hindi pa nailalabas.

P1-bilyon rito aniya ay mapupunta sa Department of Public Works and Highways (DPWH), bukod pa sa P182-milyon na mapupunta naman sa Civil Defense kaya’t ang natitirang P1.9-bilyon ay ilalaan sa mga nasalanta ng kalamidad.

Sa P4.1-trilyong 2020 national budget, P16-bilyon ang inilaan sa NDRRMF; P7.5-bilyon dito ay para sa National Disaster Risk Reduction and Management program kung saan, base sa mga dokumento ng DBM, ang malaking bahagi ng pondo ay nagastos para sa laban kontra coronavirus disease 2019 (COVID-19) pandemic, P3.5-bilyon para sa rehabilitasyon at reconstruction sa Marawi City at pagsasaayos sa mga naapektuhan sa malalakas na pagyanig sa Davao at SOCCSAKSARGEN noong nakalipas na taon.

Nagpost, subalit binura rin, ni Environment Undersecretary Benny Antiporda ang pagtungo nito sa white beach project sa kahabaan ng Roxas Boulevard sa gitna ng pagbayo ng Bagyong Ulysses.

‘Dolomite lang ang matatag’, ang bahagi ng caption ng nasabing post ni Antiporda kabilang ang mga larawang na ang isa ay kasama si Metropolitan Manila Development Authority (MMDA) Spokesperson Celine Pialago.

Una nang naging kontrobersyal si Antiporda dahil sa pagdepensa nito sa mga batikos sa dolomite project at binakbakan pa ang UP scientists na nagbigay ng negatibong opinyon sa proyekto.

Nagtrending sa Twitter ang dolomite at Manila Bay, bago pa man magpost si Antiporda.

Sa kaniyang parte naman, inihayag ni Pialago na dapat magfocus na lamang ang taumbayan sa efforts ng gobyerno na makatulong sa mga Pilipino.

Sinabi ni Pialago na nagpakuha sila ng larawan ni Antiporda nang kapwa nila inspeksyunin ang Roxas Boulevard para icheck ang estado ng mga daan, sa gitna ng pananalasa ng Bagyong Ulysses.

Una nang binatikos ang nasabing post ni Antiporda na umano’y pagpapakita ng pagiging ‘insensitive’ lalo na’t nalubog pa sa tubig-baha ang malaking bahagi ng Metro Manila, gayundin ang mga karatig lalawigan dahil sa Bagyong Ulysses.

Binigyan ng otorisasyon ng Department of Education ang regional directors para suspindihin ang distance learning activities sa nasasakupan nitong naapektuhan ng Bagyong Ulysses.

Ayon kay Education Secretary Leonor Briones, maaaring suspindihin ang klase ngayong araw na ito, bukas at sa Lunes, ika-16 ng Nobyembre, para bigyan ang mga estudyante, guro at personnel ng panahong maka-recover.

Inatasan ni Briones ang regional directors na magsumite sa Office of the Secretary ng report hinggil dito.

Ilang lugar sa bansa ang nasa Tropical Cyclone Wind Signal No. 1 pa kasunod nang paghina ng Bagyong Ulysses habang kumikilos pa-kanlurang direksyon patungong West Philippine Sea.

Isang pamilya ang nasawi matapos gumuho ang itinatayong warehouse sa Barangay Langkaan 1, Dasmariñas, Cavite.

Ayon sa report, isang construction worker, asawa nya at 2-taong gulang na anak nila ang nasawi at tatlo pang construction worker ang nasugatan sa nasabing aksidente.

Sinasabing bumigay ang pader ng ginagawang bodega dahil lumambot ang lupang pinagtatayuan ng gusali dulot na rin ng Bagyong Ulysses.

May taas na halos 5-talampakan ang bumigay na under construction warehouse at nabagsakan ang barracks na ginagamit ng isang construction worker kasama ang kaniyang mag ina.

Iniimbestigahan na ang sanhi ng nasabing aksidente.

Napanatili ng Bagyong Ulysses ang lakas nito habang kumikilos sa pa-kanlurang direksyon.

Ayon sa PAGASA ang sentro ng bagyong Ulysses ay pinakahuling namataan sa layong 300 kilometro kanluran ng Iba, Zambales.

Taglay ng bagyong Ulysses ang pinakamalakas na hanging umaabot sa 120 kilometro kada oras malapit sa gitna at may pagbugso na umaabot sa 150 kilometro kada oras.

Ang bagyong Ulysses ay kumikilos pakanluran sa bilis na 20 kilometro kada oras.

Gayunman inalis na ng PAGASA ang tropical cyclone wind signals sa bansa.

Ayon sa PAGASA hanggang mamayang tanghali ay iiral ang katamtaman hanggang malakas na pag-ulan sa Batanes, Babuyan islands, Northern at Eastern portions ng mainland Cagayan, Eastern Portion ng Isabela, Northern at Central Portions ng Aurora, Quirino at Apayao.

Mahina hanggang sa kung mindana ay malakas na pag-ulan ay mararanasan sa Ilocos Region, nalalabing bahagi ng CAR, nalalabing bahagi ng Cagayan Valley, nalalabing bahagi ng Aurora, Northern Portion ng quezon kasama ang Pollilio Islands, Zambales at Bataan.

Sinabi ng PAGASA posibleng lumabas na ng Philippine Area Of Responsibility (PAR) ang bagyong Ulysses ngayong umaga.

Tinatayang halos 157K ang bilang ng mga indibidwal na apektado ng pagtama ng bagyong Ulysses sa bansa.

Ayon sa DSWD Disaster Response Operations Monitoring and Information Center  nasa kabuuang 40,518K pamilya o 156,955 katao ang apektado ng bagyo.

Kabilang dito ang national capital region (NCR) Regions 3, 5 at CALABARZON.

Batay pa sa datos halos 19k pamilya o mahigit 70k katao ang nananatili sa itinalagang 755 evacuation centers sa mga nasabing rehiyon.

1, 556 families o halos 6k katao naman ang wala sa mga evacuation center.