Judith Estrada-Larino

Magbibigay ng P2-milyong ayuda ang Manila City government sa lalawigan ng Cagayan.

Ipinaabot na ito ni Manila Mayor Isko Moreno kay Cagayan Governor Manuel Mamba matapos masalanta ng matinding baha ang lalawigan dulot ng Bagyong Ulysses.

Ayon pa kay Moreno, mayroon na ring fund raising efforts ang Manila City Council sa pangunguna ni Vice Mayor Honey Lacuna Pangan para sa mga taga-Cagayan Valley.

Operational na muli simula ngayong araw, Lunes, ika-16 ng Nobyembre, ang lahat ng drive-thru at walk-in coronavirus disease 2019 (COVID-19) serology testing centers sa lungsod ng Maynila.

Matapos isara dahil sa pananalasa ng Bagyong Ulysses, maaari na muling ma-access ng publiko ang walk-in testing centers sa Gat Andres Bonifacio Memorial Medical Center, Ospital ng Tondo, Justice Jose Abad Santos General Hospital, Ospital ng Sampaloc at Ospital ng Maynila.

Bukas na rin ang drive-thru testing center sa Quirino Grandstand.

Samantala, tuluy-tuloy din ang paglulunsad ng libreng swab testing ng lungsod ng Maynila para sa market vendors, hotel employees, health workers at public transport drivers.

Tigil-operasyon muna ang Pasig River Ferry Service simula ngayong araw, Lunes, ika-16 ng Nobyembre.

Ito ay matapos mapinsala ng Bagyong Ulysses ang istasyon o terminal ng ferry service.

Ayon sa Metropolitan Manila Development Authority (MMDA), wasak ang pontoons o docking platform ng ferry boats sa Gudalupe, Hulo, Valenzuela, Pinagbuhatan at San Joaquin stations.

Sinabi na MMDA na kailangan munang suspindihin ang mga biyahe ng Pasig River Ferry upang masuri ang kanilang mga pasilidad para na rin sa kaligtasan ng mga pasahero.

Maglalabas na lamang ng panibagong anunsyo ang MMDA kung kailan babalik ang operasyon ng Pasig River Ferry Service.

Binalaan ng Department of Health (DOH) ang publiko na huwag gumamit ng generator sets sa loob ng bahay at iba pang masisikip na lugar kapag brown out.

Ayon sa DOH, maaaring magdulot ng pang-matagalang epekto sa kalusugan ang carbon monoxide na isang uri ng colorless at odorless gas.

Hinimok ng DOH ang mga nagmamay-ari ng generator sets na tiyaking gumagana at maayos ang exhaust system o vent ng generator bago gamitin.

Sinabi ng DOH na dapat ding sundin ang safety instructions at laging isailalim ang generators sa maintenance.

Pinayuhan ng ahensya ang mga nakakaranas ng hilo, sakit sa ulo, hirap sa paghinga, pagkalito at pagsusuka habang expose sa generator sets na kaagad magtungo sa pinakamalapit na ospital.

Hinikayat din ng DOH ang mga nagmamay ari ng generator sets na tiyaking gumagana at maayos ang exhaust system o vent ng generator bago gamitin.

Hinimok ng Simbahang Katolika ang gobyerno na magpasaklolo na sa ibang bansa para kaagad makabangon ang mga nasalanta ng mga nakalipas na bagyo sa Cagayan, Bicol Region at iba pang lugar.

Ayon kay Father Antonio Labioa, executive director ng Caritas, hindi kayang mag-isa ng bansa na tulungan ang mga nasalanta ng bagyo kaya’t dapat na humingi ng tulong mula sa ibang bansa.

Patuloy din aniya ang ginagawa nilang rescue effort sa pamamagitan nang paghingi ng tulong sa bawat Diocese para maibigay sa mga nasalanta ng bagyo lalo na’t lahat ng simbahan sa Tuguegarao ay napinsala ng Bagyong Ulysses.

Nagpasalamat din ang Catholic Bishops’ Conference of the Philippines (CBCP) kay Pope Francis dahil sa pakikiramay at pagpapaabot ng dasal sa mga nasalanta ng bagyo na ginawa nito sa kaniyang Angelus address noong linggo sa solidarity sa Southeast Asian Nation.

Ipinagdasal din ng Santo Papa ang mga nagbibigay ng tulong para kaagad makabangon ang mga nasalanta ng bagyo.

Balik-normal na ang operasyon ng MRT-3 ngayong araw, Lunes, matapos ang ipinatupad na weekend shutdown.

TINGNAN: Balik-operasyon ngayong araw, ika-16 ng Nobyembre 2020, ang mga tren ng MRT-3 matapos ang dalawang araw ng suspensyon ng mga biyahe nito upang magbigay-daan sa bushing replacement sa depot at turnout activity sa Taft Avenue avenue station. pic.twitter.com/wGcJflbmHW

— DOTr MRT-3 (@dotrmrt3) November 15, 2020

Ang unang biyahe ng mga tren mula North Avenue Station ay umalis ng alas-4:37 ng umaga at alas-5:17 ng umaga naman mula sa Taft Avenue Station.

Ang weekend shutdown ay isinagawa para bigyang-daan ang bushing replacement sa depot at turnout activity sa Taft Avenue Station.

Dahil sa rehabilitasyon sa MRT-3, unti-unti nang naitaas ang speed limit nito na ngayo’y nasa 50 kilometers per hour (kph) at target pang mai-akyat ito sa 60 kph kapag natapos na ang turnouts.

Tanging sa mga apektadong lugar lamang o binayo ng mga bagyo, partikular ng Bagyong Ulysses, ang titigil muna sa online learning.

Ayon ito kay Education Undersecretary Diosdado San Antonio matapos matinding bayuhin ng Bagyong Ulysses ang Marikina, Rizal at Region 2 na kinabibilangan ng Cagayan.

Sinabi sa DWIZ ni San Pascual na dapat maging prayoridad ang buhay kaysa sa pag-aaral na maaari namang ibalik kapag umayos na ang sitwasyon sa mga lugar na sinalanta ng mga bagyo.

Ipinauubaya na rin aniya nila sa mga school superintendents ang paggawa ng mga hakbangin para makapagpatuloy ng pag aaral ang mga estudyante.

Ang mga natirang modules na hindi pa naibibigay bago bumagyo ay pwede pa ring ipamudmod sa mga bata. Ang pinakamahalaga sa lahat ay gagawa tayo ng paraan kung paano matututo ang mga bata pagkatapos nito,” ani San Antonio. —sa

Inaasahan ni Public Works Secretary Mark Villar na uubra nang madaanan ngayong araw na ito ang lahat ng national road sa bansa matapos gumanda ang lagay ng panahon.

Ayon kay Villar, 20 lansangan pa ang hindi pa uubrang madaanan dahil sa pagbaha sa ilang lugar sa Central Luzon, tig-tatlo sa Cagayan Valley at Bicol Region, at apat sa Cordillera Administrative Region (CAR).

Sa CAR, ipinabatid ni Villar na sarado ang mga naturang lansangan dahil sa landslide na aniya’y mas mahirap ayusin.

Sinabi ni Villar na nagsimula sila ng clearing operations sa 116 closed roads, subalit 20 na lang ang naiwan sa Region 2 dahil mataas pa ang tubig kaya’t hindi madaanan.

Nasa P1. 6-bilyon aniya ang halaga ng imprastruktura ang nasira sa Cagayan Valley na pinakanaapektuhan ng Bagyong Ulysses.

Inihayag pa ni Villar na 600 equipment at 2, 700 personnel ang idineploy ng DPWH para sa road clearing operations.

Nasa apat na tauhan ng DPWH ang nasawi sa landslide sa lalawigan ng Ifugao.

Suspendido ng buong linggo, mula ngayong araw na ito, Lunes, ang pagpapatupad ng distance learning activities sa lugar na sakop ng Region 4A (CALABARZON).

Sakop ng nasabing memorandum ang mga bayan ng Rodriguez, San Mateo, Cainta, Taytay, Baras-Pinugay at upland areas sa Tanay.

Layon ng suspensyon na mabigyan ng pagkakataon ang mga apektadong pamilya na makarecover muna sa naging epekto sa kanila ng bagyo.

Maliban dito, sinabi ng Department of Education (DepEd) na marami ring office personnel at mga guro ang binaha.

Kasabay nito ..inatasan ang lahat ng school division superintendents na magsagawa ng inventory sa availability ng self-learning modules dahil maaaring maraming modules ang nalubog din sa baha.