Judith Estrada-Larino

Pinapapalitan ng grupong Samahang Industriyang Agrikultura (SINAG) ang pangalan ng Department of Agriculture (DA).

Ayon sa SINAG, makikipag-ugnayan sila sa kanilang mga kaalyado sa Kongreso para mapalitan ang pangalan ng DA sa Department of Importers, Retailers and Traders (DIRT) dahil sa pagkiling nito sa pag-angkat ng agricultural products.

Binigyang diin ng SINAG na lumala ang import policy para sa agricultural goods sa ilalim ng kasalukuyang administrasyon habang nananatiling mataas ang presyo ng mga ito.

Bilyung-bilyong piso anito ang nalulugi sa gobyerno dahil sa mga tapyas sa taripa na isinusulong halos ng pare-parehong mga personalidad na sinisisi ang pagtaas ng presyo ng langis.

Una nang nag isyu ang Pangulong Rodrigo Duterte ng Executive Order 133 na nagtataas sa Minimum Access Volume (MAV) ng pork imports sa 254, 210 metric tons mula sa 54,210 metric tons.

Inaasahang gugulong sa susunod na buwan o Oktubre ang pagbabakuna sa general public.

Ayon kay Health Undersecretary Myrna Cabotaje, Chairperson ng National Vaccination Operations Center maaaring kakaunti na lamang ang general public na maaaring mabakunahan sa susunod na buwan dahil karamihan sa mga ito ay bahagi na ng A4 category na sumasailalim na rin ngayon sa pagbabakuna.

Ang itinakdang petsa ng pagbabakuna sa general public ay ilang beses nang naurong dahil sa limitagong supply ng bakuna.

Posibleng maipalabas na ng gobyerno ang Digitized COVID-19 Vaccine Certificate nito sa katapusan ng buwang ito o unang bahagi ng Setyembre.

Ipinabatid ito ni Health Undersecretary Myrna Cabotaje sa gitna na rin nang pagsasanib puwersa ng DICT at Bureau of Quarantine para makagawa ng digitized vaccination card.

Sinabi ni Cabotaje na magbibigay sila ng update sa estado ng certificate sa susunod na dalawa hanggang tatlong linggo.

Gayunman, hindi pa aniya napagpapasyahan ng gobyerno kung gagawing travel requirement ang vaccine certificate.

Nasa mahigit 11-M Pilipino na ang nakatanggap ng unang dose ng COVID-19 vaccine hanggang nitong nakalipas na Agosto 1.

Inaprubahan na ng Kamara sa ikatlo at huling pagbasa ang prangkisa ng Manila Water Company at Maynilad Water Services Incorporated.

Sa botong 206-7-0, lusot na sa kamara ang House Bill 9422 o pagbibigay ng prangkisa sa Maynilad at House Bill 9423 o pagbibigay ng prangkisa sa Manila Water.

Sa ilalim ng mga naturang panukala, papayagan ang Maynilad at Manila Water na mag develop, finance, construct, install, maintain at mag-operate ng supply ng tubig.

Tatagal ng 25 taon ang prangkisa ng Maynilad at Manila Water maliban na lamang kung i-revoke o bawiin ng Kongreso sakaling malagay sa alanganin ang interest ng publiko.

Magtatayo ang gobyerno ng mga special hub para mabakunahan kontra COVID-19 ang mga mayroong HIV at Cancer.

Ayon ito kay Health Undersecretary Myrna Cabotaje, Chairperson ng National Vaccination Operations Center (NVOC) bilang bahagi nang pagpapalakas ng bakunahan sa mga persons with co-morbidities at senior citizens.

Ang special hub aniya para sa mga persons living with HIV ay posibleng itayo sa San Lazaro Hospital.

Tinukoy ni Cabotaje ang ginawang pagbabakuna ng National Kidney and Transplant Institute sa transplant recipients at donors samantalang ang mga mayroong tuberculosis ay naturukan naman ng COVID-19 vaccine sa Lung Center of the Philippines.

Batay sa report ng NVOC, 48.4% o 3.4-M sa mahigit 7-M persons with co-morbidities na  target na mabakunahan ay naturukan na hanggang nitong nakalipas na Agosto 2.

Hindi bigo ang Pilipinas sa pagtugon sa COVID-19 pandemic.

Binigyang diin ito ni Presidential Spokesman Harry Roque bilang tugon sa pahayag ni House Speaker Pantaleon Alvarez na hindi tagumpay ang gobyerno sa pagtugon sa pandemya.

Sinabihan ni Roque si Alvarez kung paano ipapaliwanag ang ika-anim na puwesto ng Pilipinas sa listahan ng John Hopkins University ng mga bansa sa Southeast Asia  hinggil sa pandemic response.

Bukod dito, ipinabatid ni Roque na nasa ika-86 ang Pilipinas sa buong mundo sa death toll sa COVID-19 bagamat hindi naman maganda talaga ang mayroong nasasawi sa virus.

Una nang inihayag ni Roque na hindi nagkulang ang gobyerno sa foresight o pagtaya sa paghahanda sa mas nakakahawang Delta variant ng Coronavirus.

Tiwala ang Malakaniyang na ang pagsailalim sa ECQ ng Metro Manila sa Agosto 6 hanggang 20 ang magiging huling lockdown na sa NCR.

Ito ayon kay Presidential Spokesman Harry Roque ay dahil tumataas na rin ang mga nababakunahan at ang mga ito ay hindi na rin makakaranas ng matitinding sintomas ng COVID-19 o masawi pa.

Sinabi ni Roque na kapag naabot na ng bansa ang population protection magiging ordinaryong cold o sakit na lamang ang COVID-19.