Judith Estrada-Larino

Pinagaaralan ng Pilipinas ang posibilidad na itaas ang target ng vaccine coverage sa 80% mula sa 70% sa 109-M population ng bansa.

Ayon ito kay Health Undersecretary Myrna Cabotaje sa gitna na rin ng tumataas na kaso ng Delta variant ng Coronavirus.

Sinabi ni Cabotaje na nangangahulagan itong maging ang mga wala pang 18 years old ay dapat na mabakunahan kontra COVID-19.

Kailangan aniyang tutukan ang supply ng bakuna at maging ang efficacy ng mga ito sa target nilang itaas ng 10% pa ang mga dapat maturukan ng COVID-19 vaccine.

Halos 230,000 ektaryang lupain ang naipamahagi na sa mga magsasaka.

Ayon ito kay Agrarian Reform Secretary John Castriciones na nagsabing kabilang sa mga naipamahagi ay mga kakakuha pa lamang ng mga lupa, Redocumented Lands o Collective Certifications of Land Ownership Awards (CLOA) at mga nai-turn over na sa Land Bank.

Sa ngayon ay inaayos na aniya nila ang paghahati-hati ng 1.3-M ektaryang lupain ng Collective CLOAS sa ilalim ng Split o Support to Parcelization of Lands for Individual Titling Project.

Sinabi ni Castriciones na target ng DAR na maipamahagi sa mga magsasaka ang nasa 220,000 hectare pa ng idle lands na pag-aari ng gobyerno.

Ipinabatid ni Castriciones na na mayroon pang mahigit 400,000 ektarya ng lupain ang hindi pa nila naipapamahagi bagamat karamihan dito ay pino-problema nila dahil sa pagtatapos ng Notice Of Coverage noong 2014.

Ibubuhos sa Metro Manila ang dagdag na 4-M doses ng bakuna kontra COVID-19.

Tiniyak ito ni Secretary Vince Dizon, Deputy Chief Implementer ng National Taks Force Against COVID-19 bilang pagbibigay sa request ng local chief executives sa NCR.

Sa gitna na rin ito nang paghahanda sa pagsailalim muli ng Metro Manila sa ECQ simula sa Agosto 6 hanggang 20.

Ipinabatid ni Dizon na 2.5-M doses din mula sa mga darating na bakuna ay ikakalat naman sa iba’t-ibang probinsya sa NCR+.

Aprubado ng Department of Health (DOH) ang hirit ng ilang Metro Manila LGU na house to house vaccination sa panahon ng ECQ simula Agosto 6 hanggang 20.

Sinabi ni Health Secretary Maria Rosario Vergeire na malaking tulong ang pagbabahay-bahay para matiyak na bakunado ang mga komunidad.

Higit din aniya itong ligtas dahil iilang tao lamang ang mag iikot o magbabahay-bahay kaysa pumunta ang mga tao sa vaccination sites kung saan may pagkakataong mahaba ang pila.

Bukod dito, binigyang diin ni Vergeire na isinusulong nilang magkaroon ng ligtas na paraan nang pag schedule ng mga bakuna sa vaccination sites para maiwasan ang mga kumpulan bagamat dapat ay magkaroon ng mas malalaking vaccination sites upang masunod ang physical distancing.

Bahala na ang Local Government Units (LGUs) na magpasya kung mag i-isyu ng quarantine pass.

Ayon ito sa Metro Manila Council (MMC) sa gitna na rin nang paghahanda ng LGU sa pagsailalim muli ng NCR sa ECQ mula Agosto 6 hanggang 20.

Sinabi ni MMDA Chairman Benhur Abalos na posible namang buhayin ang paggamit ng quarantine pass lalo na’t mas matinding Delta variant ng Coronavirus ang binabantayan ng lahat.

Kukulangin na aniya sila sa oras kapag nagpalabas pa ng iisang quarantine pass kaya’t ang dapat masunod sa pagpapalabas nito ay ang LGU.

Naghahanda na ang senado sa pagsailalim ng Metro Manila sa ECQ simula Agosto 6 hanggang 20.

Ayon kay Senate President Vicente Sotto, III, tatantyahin pa nila kung uubra ang online sessions nila subalit kung hindi ay maaari nilang suspendihin ang sesyon habang nasa ECQ ang Metro Manila.

Magpapasya aniya sila sa Miyerkules, Agosto 4 kung ano ang magiging pinal na set-up sa senado kaugnay sa pagsailalim sa NCR sa ECQ.

Pero yung mga employees namin hindi naman lahat may sasakyan, yung iba nagcocommute. Tapos kahit na i-skeletal namin yon, ganun pa rin. Medyo masusubo sa alanganin yung mga empleyado namin. E sabi nga ng gobyerno, pinasasara nila yung mga government offices, skeletal lang. So itong mga matitira, mga gumagawa lang ng papeles ng mga kailangan ng senado, skeletal lang din. Siguro we could…conduct hearings during the 2 weeks. Well i’m talking on my…ako lang yun. I said by Wednesday, dedesisyunan namin ng buo yung aking rekomendasyon, ”si Senate President Vicente Tito Sotto,III sa panayam ng DWIZ.

Suportado ng isang Infectious Disease at Tropical Medicine Expert ang Mandatory COVID-19 Vaccination sa bansa.

Sinabi ni Dr. Rontgene Solante na dapat gawing mandatory ang pagbabakuna para makita ang mga benepisyo at advantage ng mga nabakunahan na kaysa sa mga hindi pa natuturukan ng COVID-19 vaccine.

Ayon kay Solante, ang limitasyon sa Pilipinas ay kakaunti pa lamang ang mga bakunang dumarating kaya’t mayroong tinatawag na priority.

Kasabay nito, nakikiisa si Solante sa mga pananaw na dapat balansehin ang polisya sa supply ng COVID-19 vaccine para maiwasan ang magulong vaccination program.

Nasa halos 90% ng COVID-19 patients ang hindi pa nababakunahan.

Posibleng ipatupad ng gobyerno ang panuntunang pagbibigay ng P1,000 kada indibidwal o maximum na P4,000 kada pamilya na tulong pinansyal para sa mga apektado ng ECQ sa Metro Manila mula Agosto 6 hanggang 20.

Ayon ito kay Cabinet Secretary Karlo Alexi Nograles bagamat pupuwede naman aniyang mag iba ng regulasyon sa pagbibigay ng cash aid, depende sa magiging pinal na desisyon ng Pangulong Rodrigo Duterte.

Hindi naman aniya nabago ang polisiya ng gobyerno sa pamamahagi ng cash aid nang unang ipatupad ang ECQ sa Metro Manila noong Marso 2020.

Isasabay na sa 12th Death Anniversary ni Dating Pangulong Corazon Aquino bukas, Agosto 1 ang misa para sa 40 days ng pagkamatay ng Dating Pangulong Noynoy Aquino.

Ayon ito kay Dating Senador Bam Aquino na nagsabing ang naturang misa ay gagawin online para sa kaligtasan ng lahat dahil pa rin sa banta ng COVID-19 partikular ng Delta variant.

Ipinabatid ni Bam na ang tagline na “kayo ang boss ko” ang magiging tema ng 40th Day Commemoration bukas ng alas-5 ng hapon, bagamat sa Lunes pa, Agosto 2 ang ika-40 days ng pagkamatay ng Dating Pangulong Noynoy Aquino.

Para sa mga nais makiisa, ang misa ay mapapanuod sa kaya natin facebook page kung saan kabilang sa magbibigay ng mensahe si Vice President Leni Robredo bago ang isang Candle Lighting Ceremony.

Magugunitang Hunyo 24 nang pumanaw si Pnoy dahil sa Renal Disease secondary to Diabetes sa edad na 61.