Judith Estrada-Larino

Hindi na bago ang pagsailalim sa ECQ ng National Capital Region (NCR).

Ayon ito kay PNP Chief General Guillermo Eleazar kaya’t dapat batid na ng publiko ang mga dapat asahan tulad ng mga industriya at taong papayagan lamang magbukas sa panahong nasa ECQ ang Metro Manila o mula Agosto 6 hanggang 20.

Sinabi pa ni Eleazar na nakalagay sa Omnibus Guidelines na dati nang ipinalabas ng IATF ang mga paghihigpit o restrictions sa bawat quarantine status.

Binigyang diin ni Eleazar na tanging ang mga Authorized Persons Outside of Residence (APOR) lamang na bahagi ng workforce ang otorisadong lumabas at mga indibidwal na lalabas para bumili ng mga essential goods at services.

Tiniyak ni Eleazar na babantayan ng mga pulis ang galaw ng mga aniya’y non-essentials na dapat ay nasa loob lamang ng bahay sa panahon ng ECQ. —ulat ni Jaymark Dagala (Patrol 9)

Sarado muna ang lahat ng consular offices at temporary off site passport services ng Department of Foreign Affairs sa Metro Manila  sa panahon ng ECQ mula Agosto 6 hanggang 20.

Ayon sa DFA padadalhan na lamang ng advisory via email ng bagong appointment schedule ang mga passport applicants na apektado ng ECQ.

Samantala ipinabatid ng DFA na i-accommodate naman ng DFA Aseana business park office sa Paranaque City na mayruong original date at oras ng appointments  ang mga aplikante para sa apostille/authentication services sa DFA consular offices sa Ali Mall Cubao, SM Manila, SM Megamall at Metro Gaisano Alabang mula Agosto 6 hanggang 20.

Nilinaw naman ng DFA na walang tatanggaping walk- in applicants ang DFA Aseana office.

Inihayag ng DFA na maaaring mag email sa cl@dfa.gov.ph para sa kaukulang appointment ang mga mayruong emergency at urgent medical travel needs.

Apat pang  weightlifters ang inaalagaan ng Samahang Weightlifting ng Pilipinas.

Ayon kay Monico Puentebella, pinuno ng samahan nadiskubre nila ang kakayahan ng mga ito nuong bata pa lamang at pawang umiidolo kay Olympic gold medalist Hidilyn Diaz.

Sinabi sa dwiz ni puentebella na isa o dalawa pang lalaking weighlifters ang sinasanay din nila din nila na maaaring makapagbigay ng medalya sa Pilipinas.

Binuksan na ngayong araw na ito ang pinakabagong vaccination site sa lungsod ng Maynila kung saan 400 doses ang nakalaan

Ayon kay Manila Mayor Isko Moreno ang COVID-19 drive thru vaccination site sa quirino grandstand ay uubra sa mga nais magpa bakuna na may sasakyan tulad ng jeep o kotse bagama’t hindi pa muna pwede ang naka motorsiklo o bike sa ngayon.

Kailangan din aniyang mag register online at magpa schedule sa kanilang website at isang text message ang magku kumpirma kung pasok na sa drive thru vaccination na bukas naman kahit sa mga hindi residente ng lungsod ng Maynila.

Dahil nasa loob lamang ng sasakyan hindi lamang isang tao ang pwedeng magpa bkuna o hanggang apat na sakay ng isang sasakyan basta’t nakarehisto lamang din sa website at kahit isa lang ang kaka schedule.

 Ang drive thru vaccination ay katabi lamang ng covid testing site at Manila COVID-19 field hospital.

Bukod sa vaccination site sa lugar mayruong first dose vaccination din sa UST ngayong araw na ito na pinaglaanan ng 2,500 doses at second dose vaccination naman sa ibang piling paaralan at mall sa lungsod.

Nangangamba ang World Health Organization (WHO) sa muling pagyukod ng mundo sa laban kontra COVID-19 dahil sa pagsirit ng kaso ng Delta variant.

Ayon kay WHO Director General Tedros Adhanom Ghebreyesus nangunguna ang South Africa sa nakapagtala ng mataas na kaso ng Delta variant o nasa 80% sa loob lamang ng apat na linggo.

Nakita rin aniya sa 132 ang Delta variant na nagiging dominante na sa buong mundo.

Dahil dito sinabi ng WHO director general na patuloy ang panawagan nila sa mga bansang palakasin at ituluy-tuloy lamang ang pagbabakuna kontra COVID-19 na malaking tulong na rin sa paglaban sa Delta variant.

Idinipensa ni MMDA Chairman Benhur Abalos ang pagsailalim sa Metro Manila sa ECQ simula Agosto 6 hanggang 20.

Ayon kay Abalos batay sa pagtaya ng health experts ang kaso ng COVID-19 sa Metro Manila ay posibleng pumalo sa 28,000 sa Agosto  15 mahigit 85,000 sa Agosto  31.

Mahigit 234,000 sa Setyembre 15 at mahigit kalahating milyon na sa Setyembre 30 dahil sa pagpasok ng mas delikadong delta variant ng coronavirus.

Kaya naman binigyang diin ni Abalos na dapat magtulungan ang lahat para na rin sa kaligtasan kontra COVID-19 partikular sa delta variant nito.

Kasabay nito sinabi ni Abalos na isa ang usapin ng liquor ban sa tinututukan pa ng metro Manila Mayors at target nilang magpalabas ng mga panuntunan hinggil dito.

Tuluy-tuloy ang gagawing 250, 000 pagbabakuna kada araw sa Metro Manila kahit pa nasa ilalim ito ng ECQ simula Agosto 6 hanggang 20.

Ipinabatid ito ni MMDA Chairman Benhur Abalos matapos magpulong ang mga alkalde sa metro manila.

Ayon kay Abalos, napag-usapan ng Metro Manila mayors ang target na bilang ng pagbabakuna, ayudang pinansiyal at maging ang border controls.

Bukod sa metro mayors dumalo rin sa nasabing pulong sina Vaccine Czar Carlito Galvez, Jr., Testing Czar Vince Dizon, Defense Secretary Delfin Lorenzana at DILG Secretary Eduardo Año.

Walang pulis na dapat mamahiya o manakit ng mga mahuhuling lumalabag sa health protocols.

Ito ang mahigpit na direktiba ni PNP chief Guillermo Eleazar sa pagsisimula ng muling pagpapatupad ng ECQ sa Metro Manila simula Agosto 6 hanggang 20.

Binigyang diin ni Eleazar na dapat igalang ng mga pulis ang karapatan ng mga mamamayan.

Kasabay nito  nanawagan naman si Eleazar sa publiko na sumunod sa paghihigpit ng gobyerno para na rin sa kaligtasan ng lahat.

Nananatiling bukas ang mga gate ng Ipo, Ambuklao at Binga Dam bilang paghahanda na rin sa pag-ulang idudulot pa ng habagat.

Ayon sa PAGASA,  nasa .15 meters ang bukas na gate ng Ipo dam dahil malapit na itong pumalo sa normal high water level na 101 meter.

Apat na gates naman ang nakabukas sa Ambuklao Dam sa Benguet na halos wala nang isang metro para maabot ang 752 meter na normal high water level.

Samantala apat na gates din ng Binga Dam ang nakabukas dahil sa napipintong pag abot nito sa normal high water level na 575 meters.

Una nang inihayag ng PAGASA na mararamdaman pa rin ang habagat sa ilang bahagi ng bansa ngayong araw na ito.