Judith Estrada-Larino

Pina-plantsa na ng airline companies ang kanilang mga biyahe bilang paghahanda sa muling pagpapatupad ng ECQ sa Metro Manila simula Agosot 6 hanggang 20.

Ayon sa Philippine Airlines, limitado lamang ang kanilang domestic flights sa essential travelers kabilang ang mga residente ng NCR na babalik ng Metro Manila.

Sinabi pa ng PAL na tuloy ang international at domestic flights basta’t naaayon sa travel restrictions at protocols.

Ganito rin ang ginawa ng Cebu Pacific at Air Asia na nanawagan sa mga apektadong pasahero na uubra namang i-refund ang bayad sa kanilang plane ticket.

Kailangang magsagawa ng mass hiring ng health workers.

Panukala ito ng Filipino Nurses United (FNU) bilang paghahanda na rin ng mga ospital sa pagtaas ng kaso ng COVID-19 dahil sa banta ng Delta variant ng Coronavirus.

Binatikos ng FNU ang gobyerno na nagsabing handa na ito sa pagsirit ng kaso ng COVID-19 na anito’y malayo sa katotohanan dahil kulang ang mga health workers na maaaring tumugon kapag nagkaroon nga ng surge ng kaso ng COVID-19.

Ipinabatid ng FNU na lumalabas sa isinagawa nilang survey na karamihan sa mga ospital ng gobyerno ay kulang ng 40 hanggang 50 nurse batay sa bed capacity.

Ang pagtaas anito ng bed capacity ay dapat tumugma sa pagtaas o pagdami rin ng health staff.

Binigyang diin pa ng FNU na ang pagpapatupad muli ng lockdown ay pag-ulit lamang sa kabiguan noong isang taon na hindi magiging epektibo kung hindi palalakasin ang Public Health Care System, Basic Public Health Measures at Economic Support para sa mga Pilipino.

Halos P5 2-M na halaga ng shabu ang nasabat ng mga otoridad sa NAIA matapos itago sa shuttle cock casing at figure trimmer twister.

Ayon sa Bureau of Customs, nadiskubre ang nasabing droga matapos ang routine screening at physical examination ang mga nasabing bagahe.

Ang nasabing droga na nai-turn over na sa PDEA para sa kaukulang profiling ay tinangka umanong i-export sa Bahrain, United Kingdom at Australia.

Tiniyak ng customs ang mga kasong isasampa laban sa mga sangkot dito.

Iginiit nina House Speaker Lord Allan Velasco at Congressman Joey Salceda ang pagpasa sa Bayanihan 3 na magkakaloob ng cash subsidy sa mga apektado ng COVID-19 pandemic.

Ayon kay Velasco, mas kailangang maipasa ang Bayanihan 3 dahil sa muling pagpapatupad ng ECQ sa Metro Manila simula sa Agosto 6 hanggang 20.

Kaya nga’t umaapela aniya sila sa Senado na ipasa na ang nasabing panukala at maging sa economic managers na hanapan na ng pondo ang panukalang ito.

Sinabi naman ni Salceda na wala nang ibang paraan para makaagapay sa patuloy na epekto ng pandemya kundi magkaroon ng supplemental budget sa pamamagitan ng Bayanihan 3.

Sumampa na sa lima ang nasawi dahil sa mga pag-ulang dulot ng Habagat.

Ayon sa NDRRMC, ang pinakahuling nasawi matapos malunod ay isang 18 anyos na lalaki mula sa Ibaan, Batangas.

Isa pang nasawi ay 39 anyos na lalaki mula sa Camp 8, Kennon Road sa Baguio City matapos masangkot sa isang vehicular accident nang mabagsakan ng puno.

Sinabi ng NDRRMC na inaalam pa ang mga impormasyon sa pagkasawi ng tatlong iba pa dahil sa Habagat.

Kabilang naman sa mga sugatan ang 63 taong gulang na lalaki at 29 anyos na lalaki na kapwa nasangkot din sa vehicular accident.

Makakaapekto sa voter registration ang pagpapatupad muli ng ECQ sa Metro Manila simula Agosto 6 hanggang 20.

Inamin ito ni COMELEC Spokesperson James Jimenez dahil marami tiyak ang hindi makakalabas ng kani-kanilang mga bahay.

Gayunman, patuloy na hinihimok ni Jimenez ang mga Pilipino na mag parehistro para sa 2022 National Elections kapag natapos nang ipatupad ang ECQ status sa Metro Manila.

Naghihintay na ang Department of Budget and Management (DBM) ng  direktiba mula sa Office of the President (OP) kaugnay sa ibibigay na cash assistance sa mga pamilyang maaapektuhan nang pagkakasa muli ng ECQ sa Metro Manila simula Agosto 6 hanggang 20.

Tugon ito ni Budget Secretary Wendel Avisado nang tanungin kung magbibigay ng  ayudang pinansyal sa mga maaapektuhang residente.

Una nang inihayag ni NEDA Chief Karl Kendrick Chua na papalo sa P105-B  kada linggo ang mawawala sa ekonomiya ng bansa sa pagsailalim muli sa ECQ ng Metro Manila.

Inamin din ni Presidential Spokesman Harry Roque na walang budget ang gobyerno para mamahagi ng cash assistance kapag ipinatupad muli ang ECQ sa Metro Manila.

Malinaw na diskriminasyon ang kautusan ng Pangulong Rodrigo Duterte sa mga barangay official na huwag palabasin ng bahay ang mga nasasakupan nito .

Ayon ito sa Commission on Human Rights (CHR) lalo pa’t limitado pa sa ngayon ang  supply ng bakuna kontra COVID-19.

Sinabi ni CHR Spokesperson Jacqueline De Guia na mayruong mga dahilan ang mga indibidwal na hindi nila kontrolado kaya’t hindi pa nababakunahan ang mga ito.

Inihayag pa ni De Guia na makakaapekto sa pag-agapay ng isang indibidwal sa mga epekto ng pandemya ang nasabing kautusan ng pangulo kabilang ang pang kabuhayan at pag iisip kung paano makaka survive habang naka-isolate.

Binigyang diin ni De Guia na batay sa Siracusa Principles na in-adopt ng United Nations Economic and Social Council noong 1984 ang pagharang sa karapatang pantao sa panahon ng emergency ay hindi lamang ibinabase sa necessity o pangangailangan kundi dapat ay nakabatay sa batas at sa tunay na layunin nito.

Suportado ng OCTA Research Group ang desisyon ng gobyerno na magpatupad ng ECQ sa Metro Manila simula Agosto 6 hanggang 20.

Magugunitang mismong ang nasabing grupo ang nagsulong na isailalim sa circuit breaker lockdown ang NCR matapos sumirit ang kaso ng COVID-19 dahil sa Delta variant ng Coronavirus.

Sinabi ng OCTA Research na tama lamang ang pagsailalim muli ng gobyerno sa Metro Manila sa ECQ bilang precautionary intervention bagamat malaking hamon sa pamahalaan kung pano mababaligtad ang COVID-19 surge sa NCR.

Kaugnay nito, hinimok ng grupo ang Local Government Units, Private Sector at mga komunidad sa Metro Manila para magtulungan sa pagpapatupad ng mga strategy upang mapigilan ang surge sa COVID-19 cases.

Umapela rin ang OCTA Research sa publiko na sundin ang mga regulasyong inilatag ng LGU’s hanggang matapos ang ECQ status sa Metro Manila.

Itinalaga ng Pangulong Rodrigo Duterte si Lt General Jose Faustino bilang susunod na Hepe ng Sandatahang Lakas ng Pilipinas.

Papalitan ni Faustino si General Crilito Sobejana na nakatakdang mag-retiro bukas, Hulyo 31 kung kailan din gagawin ang change of command sa Lapu-Lapu Grandstand sa Kampo Aguinaldo.

Si Faustino ay kasalukuyang Commander ng Joint Task Force Mindanao at Dating Acting Commanding General ng Philippine Army at Eastern Mindanao command.

Ayon kay AFP Spokesperson Navy Captain Jonathan Zata, ang karanasan at sigasig sa paglilingkod ni Faustino ang nagbigay daan dito para pamunuan ang militar.

Kabilang dito aniya ang misyon ng AFP para makamit ang pang matagalang kapayapaan at kaunlaran ng bansa.