Judith Estrada-Larino

Tumaas pa sa 1.38 ang reproduction number ng COVID-19 sa Metro Manila.

Ayon ito sa OCTA Research Group kung saan ang rumehistro ang average na 1,096 new cases sa Metro Manila mula Hulyo 23 hanggang 29 o 28% na pagtaas mula sa average na 854 daily new infections mula Hulyo 16 hanggang 22.

Ang Metro Manila ay nakapagtala ng Average Daily Attack Rate (ADAR) ng 7.85 cases kada 100,000 population, Healthcare Utilization Rate na 41%, ICU occupancy rate ng 50% at 9% positivity rate.

Ang Metro Manila ay nakatakdang isailalim muli sa ECQ simula sa Agosto 6 hanggang 20 matapos sumirit ang kaso ng COVID-19.

Kinumpirma ng Bureau of Corrections (BUCOR) ang pagkamatay ng high profile convicted drug lord na si Vicente Sy.

Si Sy ay nasawi alas-8 kagabi habang naghihintay na ma-admit sa Ospital ng Muntinlupa.

Ayon kay BUCOR Spokesperson Gabriel Chaclag, nakaranas ng cardiac arrest at kaagad nasawi si Sy na nakakulong sa Philippine Marine Corps BUCOR Extension Facility.

Bago ito, ipinabatid ni Chaclag na na si Sy ay isinugod sa Philippine Marine Naval Hospital matapos mahirapang huminga kaya’t kaagad namang kinabitan ng oxygen inhalation.

Ibinalik aniya si Sy sa kulungan nito matapos bigyan ng mga gamot.

Hulyo 29 nang isailalim ng mga doktor ng NBP sa check up ang kondisyon ni Sy at na diagnose itong nakaranas ng stroke.

Ilang beses ding nakaranas ng seizures si Sy habang nasa Fort Bonifacio subalit na revive naman ng mga doktor.

Nananatiling walang community transmission ng Delta variant ng Coronavirus.

Ayon ito kay Health Undersecretary Maria Rosario Vergeire bagamat sumirit ang bilang ng mga bagong kaso ng COVID-19.

Sinabi ni Vergeire na hindi pupuwedeng isisi sa partikular na variant ang surge o pagtaas ng kaso ng COVID-19 dahil tanging purposive sampling lamang ang ginagawa nila.

Una nang inihayag ng Department of Health (DOH) na nasa 750 samples lamang ng positive cases kada linggo ang kayang isalang sa Genome Sequencing dahil sa limitadong kapasidad ng Philippine Genome Center at National Institute of Health.

Mabilis na inflation trend o pagmahal ng bilihin at serbisyo para sa buwan ng Hulyo.

Ito ang nakikita ng Bangko Sentral ng Pilipinas (BSP) kaya’t posibleng pumalo anito sa hanggang 4.7% ang inflation rate mula sa 4.1% na naitala para sa buwan ng Hunyo.

Kabilang sa mga dahilan nang mabilis na pagtaas ng presyo ng bilihin at serbisyo ayon sa BSP ang pagmahal ng Domestic Petroleum Products.

Mayroon din aniyang epekto ang inflation trend sa singil sa kuryente at mababang halaga ng piso.

Inilunsad ng Portuguese National Post Office (PNPO) ang tatlong special edition stamps bilang paggunita sa ika-500 anibersaryo ng pagdating sa bansa ni Portuguese Navigator Ferdinand Magellan.

Inilalarawan ng tatlong special edition stamps ang kasaysayan hinggil sa paglalayag ni Magellan patungong Pilipinas.

Makikita sa stamps ang winning artwork ni Filipino Artist Bernardo Maac na tinaguriang Presentation of the Icon na nanalo sa Quincentennial Art Competition ng Philippine National Quincentennial Comittee na 2.50 Portugal Euro Stamp, imahe ng Sto Niño De Cebu na One Portugal Euro at iconic image ng Magellan’s Cross sa Cebu City –  .54  Euro Stamp.

Ang paglalabas ng nasabing special edition stamps ay proyekto ng CTT Correios De Portugal, Estrutura De Missao Para As Comemoracoes Do V Centenario De Fernao De Magalhaes (EMCFM) – ang portuguese counterpart ng National Quincentennial Committee ng Pilipinas at Philippine Embassy sa Lisbon.

Sapul sa CCTV ang pagnanakaw ng takip ng isang kanal sa Caloocan City.

Kaugnay nito, pinaiimbestigahan na ng pamunuan ng Barangay 138 sa Caloocan City ang nakita sa CCTV na dalawang lalaking nag angat ng bakal na takip ng kanal sa lugar at isinakay pa ito sa taxi.

Dismayado ang mga opisyal ng barangay sa pagnanakaw sa takip ng kanal na patunay anila ng kahirapan ng buhay ngayon.

Inaalam pa kung sino ang nasa likod ng pagnanakaw ng takip na bakal na posible anilang naibenta na kaagad.

Nag aalala naman ang mga barangay officials dahil maaaring maka-disgrasya ang nasabing kanal na walang takip lalo na ngayong tag-ulan at bumabaha.

Kaya naman ipinabatid ng barangay officials na naglagay na sila ng warning sa mga residente ng barangay para mag ingat ang mga ito.

Nasunog ang rooftop ng isang gusali ng Philippine Consulate General sa Jeddah, Saudi Arabia.

Ayon kay Consul Mary Jennifer Dingal, Acting Head of Post ng Konsulado, alas-7  ng umaga nang magsunog ang rooftop ng Building 4 na inuukupahan ng iba’t ibang ahensya ng Pilipinas tulad ng DSWD, PAG-IBIG Fund at SSS.

Sinabi ni Dingal na lumalabas sa paunang imbestigasyon nila na posibleng nagmula ang apoy sa natunaw na wiring na nakadikit sa mga carpet dulot na rin aniya ng mainit na panahon.

Mabilis naman aniyang naagapan ang sunog ng security personnel gamit ang mga bagong fire extinguishers katuwang ang mga bumbero at pulis.

Dahil sa sunog, hindi na muna pinagagamit ang nasabing gusali habang iniimbestigahan pa at inaalam ang dahilan ng sunog.

Tuluy-tuloy ang pagbabakuna sa Metro Manila kahit pa nasa ilalim ito ng Enhanced Community Quarantine (ECQ) simula Agosto 6.

Ayon ito kay Presidential Spokesman Harry Roque na nagsabing hintayin na lamang ang mga detalyeng ilalabas hinggil dito ng COVID-19 vaccination committee.

Ang pagpapatupad muli ng ECQ sa Metro Manila na tatagal hanggang Agosto 20 ay inanunsyo ng Malakaniyang isang araw matapos maitala ang 97 bagong kaso ng Delta variant ng Coronavirus. —ulat mula kay Jopel Pelenio (Patrol 17)

Umapela ang OCTA Research Group na masusing tutukan ang kanilang datos hinggil sa pagsirit ng kaso ng COVID-19.

Iginiit sa DWIZ ni Professor Ranjit Rye, isa sa mga myembro ng OCTA Research Group na nakabatay sa kanilang analysis ang mga inilalabas na data hinggil sa surge sa COVID-19 cases.

Tatanggapin namin lahat ng batikoy niyo pero tingnan niyo ho yung datos namin, tingnan niyo ho yung aming analysis po. Kung totoo to, then we all have to work and help each other. At lumalabas po sa balita ngayon, sa datos na inilabas namin 2 days ago, sa analysis namin last week, meron po tayong surge. Kailangan natin tong harapin. Dapat kakapit tayong lahat sa isa’t isa. Ang private sector, ang public, ang ating mga kababayan atsaka yung gobyerno at lalo na yung local government kasi ho it will hit us and it will hit us hard. Kahit we work wholly and we work together, we work swiftly, we might be able to mitigate the worst impact of this impending surge. ” si Professor Ranjit Rye, isa sa mga miyembro ng Octa Research Group sa panayam ng DWIZ.

Kailangang harapin ng lahat ang tumataas na kaso ng COVID-19 dahil sa Delta variant ng Coronavirus.

Binigyang diin ito sa DWIZ ni Professor Ranjit Rye, isa sa mga miyembro ng OCTA Research Group sa gitna nang magkakaibang reaksyon sa panukala nilang circuit breaker lockdown sa loob ng dalawang linggo sa lalong madaling panahon para mapigil ang pagkalat ng Delta variant cases.

Sinabi ni Rye na ang pagharap sa hamon ng COVID-19 ay hindi lamang  responsibilidad ng mga doktor kundi ng iba pang experts na makakatulong para mapigilan ang pagsirit pa ng kaso ng virus lalo na nang higit na delikadong Delta variant.

Ang challenge po ng COVID, hindi kailangan doktor lang. You can’t leave it to the doctors, it’s an inter-disciplinary, multi-disciplinary tayo. We need the expertise of the scientist and the social scientist. And so, ganun ho yung gusto namin. We want to save lives po. Yun ho yung aming… Wala ho kaming tinatanggap na bayad dito at wala ho kaming tinatanggap na suporta kahit kanino, ito ho’y kawang-gawa namin, kontribusyon namin sa diskusyon sa sama-sama nating, kolektibo nating laban against COVID. So, gusto lang namin sabihin sa mga…namin, alam namin na talagang passionate din kayo about saving our country pero mag-focus po tayo sa totoong laban, yung COVID. ” si Professor Ranjit Rye, isa sa mga miyembro ng OCTA Research Group sa panayam ng DWIZ.