Judith Estrada-Larino

Lumobo na sa mahigit 405,000 ang mga napauwing OFW simula nang ideklara ang COVID-19 pandemic noong Marso 2020.

Ipinabatid ito ng Department of Foreign Affairs (DFA) sa pagdinig ng House Overseas Workers Affairs Committee.

Sa nasabing bilang, 105,606 ang Sea Based OFW samantalang land based naman ang nalalabing bilang ng pinoy workers.

Ayon sa DFA, sa susunod na buwan ay asahan na ang halos 5,000 pinoy workers pa ang magbabalik bansa.

Samantala, inihayag ng Department of Labor and Employment (DOLE) na pumalo na sa 23,121 ang mga OFW na dinapuan ng COVID-19 kung saan mahigit 12,000 ang naka-recover na at nasa mahigit 1,000 naman ang nasawi.

Sinuspindi ng Bureau of Internal Revenue (BIR) ang pagpapatupad ng income tax ng mga private school.

Ito ayon kay Finance Secretary Carlos Dominguez, III ay habang hinihintay ang batas hinggil sa pagbubuwis sa kita ng mga pribadong eskuwelahan.

Nilagdaan na ni Dominguez ang suspensyon sa pagbubuwis sa private schools na makakatulong para gumaan ang pasanin ng mga ito lalo na ngayong panahon ng pandemya.

Una nang ini apela ng Coordinating Council of Private Educational Associations (COCOPEA) ang hindi pagsama sa private educational institutions sa uubrang mag avail ng Preferential Income Tax Rate at Concessionary Tax Rate sa ilalim ng Create Law.

Iginiit ng Department of Trade and Industry (DTI) na hindi na talaga kakayanin ng gobyerno ang isa pang lockdown kung saan karamihan sa mga negosyo ay nakasara pansamantala.

Ito ayon kay DTI Secretary Ramon Lopez ay maliban na lamang kung sadyang bumulusok o nagkaroon ng matinding pagsirit sa kaso ng COVID-19 sa gitna na rin ng paglutang ng Delta variant ng Coronavirus.

Ipinabatid ni Lopez na 16% ng mga negosyo ang tiyak na isasara mula sa kasalukuyang 8-10%, kapag naulit ang ECQ status sa Metro Manila.

Inihayag pa ni Lopez na papalo sa 1.8-M workers ang tiyak na maaapektuhan kapag ipinatupad ang hard lockdown.

Nasa P30-B aniya ang nawalang kita sa ipinatupad na ECQ sa Metro Manila at mga karatig na lalawigan nitong huling bahagi ng Marso hanggang Abril matapos magsara ang micro, small and medium enterprises.

Iginiit ni Labor Secretary Silvestre Bello, III ang pagpasa ng bagong batas na magbibigay proteksyon sa delivery riders.

Kasunod ito nang paglalabas ng advisory ng Department of Labor and Employment (DOLE) upang  makatulong sa pagbuo ng mga panuntunan para sa working relationship ng delivery riders at food delivery companies.

Binigyang diin ni Bello na ang delivery riders na  maikukunsider na empleyado ng food delivery apps ay entitled o dapat makakuha ng minimum benefits sa ilalim ng Labor Code of the Philippines.

Kabilang sa mga benepisyo ito aniya ang minimum wage, holiday pay, premium pay, overtime pay, night shift differential, service incentive leave, 13th month pay at retirement pay.

Bukod pa ito sa Occupational Safety and Health Standards Benefits gaya ng SSS, PhilHealth at PAG-IBIG at iba pag benepisyo sa ilalim ng iba pang batas.

Subalit nilinaw ni Bello na ang mga independent contractors o freelancers ay saklaw ng kani-kanilang kontrata o kasunduan sa Digital Platform Company.

Hindi alam ng Pangulong Rodrigo Duterte na hindi pa sinisibak ang 43 opisyal ng Bureau of Immigration (BI) na dawit sa Pastillas Scheme.

Ayon ito kay Presidential Spokesman Harry Roque matapos ihayag ni Justice Secretary Menardo Guevarra na balik trabaho na ang mga nasabing opisyal na anim na buwang suspendido.

Ang naturang pahayag ni Guevarra ay kontra sa naging pagmamalaki ng Pangulong Duterte sa kaniyang huling SONA na nasibak na ang mga nasabing immigration officials.

Gayunman, inihayag ni Roque na naturang pahayag ng pangulo ay direktiba na rin sa Department of Health (DOH) at sa BI na sibakin na ang mga nasabing opisyal sa lalong madaling panahon.

Binigyang diin ni Roque na hindi katanggap-tanggap ang masangkot sa Pastillas Scheme kaya’t dapat sibakin ang mga napatunayang dawit sa anomalya.

Nilinaw ng Bureau of Internal Revenue (BIR) ang isyu nang pagbubuwis sa mga cash incentives at iba pang benepisyong ibinigay kay Hidilyn Diaz matapos makuha ang kauna-unahang Olympic Gold Medal ng Pilipinas.

Ayon sa BIR, ang P10-M cash incentive para sa Olympic Gold Medal Winners mula sa gobyerno, batay sa nakasaad sa Republic Act No. 10699 ay maikukunsidera na exclusion o hndi kabilang sa gross income sa pamamagitan ng Section 32 ng Tax Code.

Sinabi pa ng BIR na hindi na rin bubuwisan ang iba pang naipangakong ibibigay kay Diaz tulad ng libreng biyahe sa eroplano, sasakyan at house and lot, kung nabayaran na ng donors ang kinauukulang buwis ng mga ito.

Inihayag ng BIR na mabuti na lamang ay naibaba na ang Donors Tax Rate sa 6% sa sosobra sa P250,000 base na rin sa sinasabi sa Train Law.

Nagpaliwanag ang Palasyo sa naging pahayag ng Pangulong Rodrigo Duterte hinggil sa mga hindi pa bakunadong indibidwal.

Ayon kay Presidential Spokesman Harry Roque, ang naging direktiba ng pangulo sa mga barangay official na panatilihin sa kanilang mga bahay ang mga hindi pa bakunado, ay nangangahulugang nang pagpayag sa mga nabakunahan na patuloy na mag trabaho sakaling magkaroon ng lockdown.

Sinabi ni Roque na dahil sa Delta variant ng Coronavirus, mahirap magdeklara ng lockdown dahil ayaw nilang magutom ang mga tao kaya’t ang iniisip ng Pangulo ay pwedeng palabasin ang mga bakunado para mag trabaho kapag nagpatupad ng lockdown.

Binigyang diin ni Roque na bagama’t hindi garantiya ang pagpapa bakuna para hindi tamaan ng COVID-19, katiyakan man ang pagturok ng COVID-19 vaccine para makaiwas sa kamatayan dahil sa nasabing virus.

Balik sa Moderate Risk Classification ang Pilipinas mula sa pagiging low risk sa COVID-19 sa mga nakalipas na ilang linggo.

Ayon ito sa Department of Health (DOH) na nagsabing ang pagsirit ng kaso ng COVID-19 ay naitala sa kalagitnaan ng buwan ng Hulyo matapos ang pagbagal ng mga kaso ng virus.

Ipinabatid ni Health Undersecretary Maria Rosario Vergeire na tumaas ng 1% ang dalawang linggong kaso ng COVID-19 sa Hulyo 11 hanggang 24 mula sa -10%  sa petsang Hunyo 27 hanggang Hulyo 10.

Tumaas din sa 4.95 cases per 100,000 population ang National Average Daily Attack Rate (ADAR).

Pumalo sa average na 6,029 ang arawang bagong kaso mula Hulyo 22 hanggang 28, mas mataas sa nakalipas na linggo na nasa average na 5,576 new cases.

Sa kabila nito, nananatili sa safe zone ang mga okupadong hospital at ICU beds.

Tanging sa mga Special Need Population Segment lamang ibibigay ang COVID-19 booster shots.

Ayon ito kay Dr. Ninia Gloriani, Pinuno ng Vaccination Expert Panel (VEP) ng Department of Health (DOH) sa gitna na rin ng mga report nang bumababang immunity ng mga nabakunahan.

Sinabi naman ni Dr. Rontgene Solante, miyembro ng panel na kabilang sa special populations ang mga may HIV, cancer, chronic kidney disease, matatanda at mga umiinom ng immunosuppresive drugs.

Una nang nilinaw ng DOH na hindi pa inirerekomenda ng experts ang paggamit ng COVID-19 booster shots dahil sa limitadong datos hinggil dito sa kasalukuyan.

Binigyang diin ng VEP na higit na dapat pagtuunan ng pansin ang pag bakuna sa mas marami pang Pilipino kaysa pagbili ng booster doses.