Judith Estrada-Larino

Hindi kakayanin ng gobyerno na isailalim muli sa Enhanced Community Quarantine (ECQ) ang Metro Manila dahil walang budget para sa cash aid na maaapektuhan ng lockdown.

Ayon ito kay Presidential Spokesman Harry Roque matapos isulong ng NCR Mayors na uubrang magpatupad ng panibagong ECQ sa kalakhang Maynila kung magbibigay ng cash assistance ang National Government sa mga apektadong residente.

Sinabi ni Roque na 60% ng Gross Domestic Product ay mula sa NCR+8 at sa ilalim ng kumpletong lockdown. Mawawalan ng trabaho ang mga tao kaya’t hayaan munang mag trabaho ang mga ito habang nasa moderate risk pa ang NCR+8 na kinabibilangan ng Metro Manila, Bulacan, Cavite, Laguna, Rizal, Batangas, Metro Cebu at Metro Davao.

Tumaas pa sa 1.35 ang reproduction number ng COVID-19 sa National Capital Region (NCR).

Sa gitna na rin ito nang pagkukumahog ng mga otoridad na maharangan ang pagkalat ng delta variant ng Coronavirus.

Ayon sa OCTA Research Group, umakyat sa 1.35 ang reproduction number ng COVID-19 cases sa Metro Manila mula Hulyo 22 hanggang 28 at tumaas naman ng 29% o nasa 1,041 ang average new cases ng virus sa kalakhang Maynila.

Ipinabatid ng OCTA Group na sumirit din sa 8% ang positivity rate sa NCR.

Subalit inihayag naman ng OCTA Group na batay sa DOH Indicators, nasa safe levels ang hospital bed at ICU Utilization subalit tumaas sa 51 ang mga okupadong hospital beds kada araw sa nakalipas na pitong araw.

Ang Metro Manila ay nasa ilalim ng General Community Quarantine with heightened restrictions.

Binaha ang ilang lugar sa Metro Manila sa patuloy na pagpapaulan ng Habagat sa buong bansa.

Alas-10:30 ng umaga, umabot sa hanggang tuhod ang tubig baha sa harap ng V.Reales-Canumay West bypass road sa barangay Vicente Reales sa Valenzuela City.

Ini-report naman ng Manila Disaster Risk Reduction and Management Office ang gutter deep na baha sa CM Recto Corner Rizal Avenue at NBI Taft Southbound areas mag a alas-9 kaninang umaga.

Batay sa pinakahuling report ng PAGASA, magbubuhos pa ng matinding ulan ang Habagat sa Ilocos Region, Benguet, Zambales, Bataan, Tarlac, Pampanga at Occidental Mindoro.

Muling nagbabala ang PAGASA ng posibleng malawakang pagbaha at landslide sa mga lugar na makakaranas ng matinding buhos ng ulan.

Lumabag sa health protocols ang Quezon City Police District (QCPD) nang i-deploy ang mga pulis na hindi pa nakukuha ang resulta ng kanilang COVID-19 test sa huling SONA ng Pangulong Rodrigo Duterte noong Lunes.

Ayon ito kay Health Undersecretary Maria Rosario Vergeire matapos i-report ng QCPD na 51 mula sa 82 pulis na nag positibo sa COVID-19 ang idineploy nila noong SONA.

Hulyo 23 nang sumalang sa COVID-19 test ang mga nasabing pulis at Hulyo 28 na nakuha ang resulta ng test.

Sinabi ni Vergeire na hindi dapat idineploy ang mga nasabing pulis habang wala pang resulta ang COVID-19 test ng mga ito kaya’t malinaw na lumabag ang QCPD sa health protocol.

Binigyang-diin pa ni Vergeire na posibleng maging super spreaders pa ang mga naturang pulis na nag positibo sa COVID-19.

Lumobo pa sa bagong record high ang utang ng Pilipinas na pumapalo na sa P11.166-T hanggang nitong nakalipas na buwan ng Hunyo.

Ayon sa Bureau of Treasury (BTR), bahagyang tumaas o nasa .9 %  ang utang ng bansa o P94.91-B mula noong Mayo na nasa P11.071-T.

Ipinabatid ng BTR na mahigit 71% ay domestic borrowings o utang sa loob ng bansa at nasa halos 29% naman ang utang ng gobyero sa labas ng bansa.

Sinabi ni RCBC Chief Economist Michael Ricafort na tuluy-tuloy ang paglobo ng utang ng bansa sa gitna ng lumalawig na budget deficit sa mga nakalipas na buwan dahil sa mas pinahigpit na restrictions simula pa ng huling bahagi ng Marso 2021.

Ang Charter Change o Cha-cha ay katulad ng COVID-19 na madalas nabubuhay.

Ayon ito kay Senate Minority floor leader Franklin Drilon matapos manawagan sa Senado ang National Government Task Force on constitutional reform na talakayin ang panukalang Economic Cha-cha bago ang filing ng Certificate of Candidacy (COC) sa Oktubre.

Sinabi ni Drilon na maging ang Pangulong Rodrigo Duterte ay batid na dead on arrival na sa Senado ang Cha-cha kayat hindi niya ito binanggit sa kanyang huling SONA.

Bukod dito,inihayag ni Drilon na hindi kasama ang Cha-cha sa inihihirit ng Pangulo sa kongreso na ipasa kaya’t malinaw na hindi sasayaw sa Cha-cha ang Pangulo.

Iginiit ni Drilon na wala sa agenda ng Senado ang Cha-Cha at sa halip ay interesado ang mga Senador sa kani kanilang legislative agenda..―ulat mula kay Cely Ortega-Bueno (Patrol 19)