Judith Estrada-Larino

Hihilingin ng Senado sa Bureau of Internal Revenue (BIR) na i-exempt sa buwis ang matatanggap na premyo ni Olympic Gold Medalist Hidilyn Diaz.

Hniling ni Senate President Vicente Sotto III na pag-aralan ng committee on rules ang posibilidad na mag-file at mag apruba ang Senado ng resolusyon na humihimok sa BIR na gawing tax free ang premyo ni diaz.

Tiniyak naman ni Senate Rules Committee Chair Juan Miguel Zubiri na pag-aaralan nila kung u- ubra o mayroong legal implication ang nasabing plano ng Senado.

Una nang inadopt ng Senado ang 12 resolusyon na nagbibigay pugay kay Diaz matapos ang makasaysayan at malaking karangalang ibinigay nito sa bansa.―ulat mula kay Cely Ortega-Bueno (Patrol 19)

Nag-aambagan na ang mga kongresista bilang dagdag na cash incentives kay Olympic Gold Medalist Hidilyn Diaz.

Ayon kay House Deputy Speaker Mikee Romero target ng kamara na makalikom ng lima hanggang P10 milyong  at nakapagbigay na ng P200K si House Speaker Lord Allan Velasco.

Nasa P4 milyon na aniya ang nalilikom nilang pera para ibigay kay Diaz at 40 kongresista na rin ang nangako ng cash incentive.

Kasabay nito, isusulong ni Romero kasama si Deputy Speaker Benny Abante para gawing tax free ang mga insentibong matatanggap ni Diaz.―ulat mula kay Cely Ortega-Bueno (Patrol 19)

Binakbakan ng Bayan Bagong Alyansang Makabayan ang Quezon City Police District sa anito’y major lapse.

Ito ay matapos magpakalat ang QCPD ng mga pulis na positibo sa COVID-19 bilang bahagi ng seguridad sa huling SONA ng Pangulong Rodrigo Duterte noong Lunes.

Una nang kinumpirma ni QCPD Chief Police Brigadier General Antonio Yarra na 51 mula sa 82 tauhan ng QCPD station 3 na nag positibo sa COVID-19 ang idineploy kaugnay sa sona security.

Nangangahulugan ito ayon kay Bayan Secretary General Renato Reyes, Jr. na ang mga nasabing pulis ay nagtataglay na ng virus nang humarap sa mga raliyista tulad nya.

Sinabi ni Reyes na sumalang sa COVID-19 test noong Hulyo 23 ang mga nasabing pulis kaya’t malinaw na hindi nakuha ng mga ito sa mga kilos protesta ang virus at nai deploy ang mga ito kahit wala pang resulta ang kanilang test.

Dahil dito, ipinasa ni Reyes kay PNP Chief Guillermo Eleazar ang magiging hakbang sa ginawa ng QCPD na iginiit nitong tukuyin ang mga pulis na itinalagang mag monitor sa mga pagkilos noong SONA.

Tuloy ang laban ng mga Pinoy boxer sa Tokyo Olympics.

Ayon ito kay Congressman Abraham Bambol Tolentino, Pangulo rin ng Philippine Olympic Committee, matapos mahablot si Hidilyn Diaz ang kauna-unahang olympic gold medal ng bansa.

Sinabi sa DWIZ ni Tolentino na ilan pang atletang pilipino ang tuloy ang pakikipagtunggali sa mga banyaga sa Tokyo Olympics.

Kabilang dito aniya ang tatlo pang golfers.

Binigyang-diin pa ni Tolentino na napakataas pa rin ng morale ng pinoy athletes na sumasabak sa Tokyo Olympics.

Hindi sasama ang Magdalo Group sa alyansa para suportahan ang presidential bid ni Senador Panfilo Lacson.

Binigyang diin ito ni Dating Senador Antonio Trillanes, IV matapos balaan si Vice President Leni Robredo at ang Liberal Party hinggil sa pagbubunyag ni Lacson na nakipag-usap sila ni senate President Vicente Sotto, III kay Robredo at maging kay Dating Senador Bam Aquino hinggil sa darating na eleksyon.

Sinabihan ni Trillanes si Robredo na sana ay hindi totoo ang naging pagbubunyag ni Lacson dahil kung totoo ito, pasensyahan na aniya dahil hindi sila sasama ang Magdalo Group sa pagbibigay daan kay Lacson sa Presidential Election.

Ipinaalala ni Trillanes kay Robredo na naging instrumento si Lacson sa pagkakakulong ni LP Member Senator Leila De Lima.

Bilang tugon, ipinabatid naman ni Atty. Barry Gutierrez, Spokesperson ni Robredo na masyado pang maaga ang pagdedeklarang pagpapaubaya ni Robredo kay Lacson sa pagtakbo sa pagka-presidente.

Wala pa naman aniyang siguradong anunsyo o pasya si Robredo kung tatakbong pangulo ng bansa sa susunod na taon bagama’t una nang inihayag nitong bukas siyang sumabak sa presidential elections.

Nagmatigas si Chief Presidential Counsel Salvador Panelo laban sa paghingi umano ng sorry kay Olympic Gold Medalist Hidilyn Diaz na una nang idinawit ng Palasyo sa umano’y planong pagpapatalsik sa pwesto sa Pangulong Rodrigo Duterte.

Iginiit ni Panelo na wala siyang nakikitang mali sa ginawa niya noong 2019 kung kailan isinama niya si Diaz sa ipinakitang Oust Duterte Matrix na kalaunan ay inamin din nitong hindi beripikado.

Sinabi ni Panelo na kaagad naman niyang nilinaw o makalipas ang dalawang araw na walang kinalaman si Diaz at maging ang celebrity athlete na si Gretchen Ho sa umano’y planong pagpapatalsik sa Pangulong Duterte.

Gayunman, inihayag ni Panelo na nalulungkot siya kung nasaktan si Diaz sa nasabing matrix na wala naman siyang kinalaman.

Sigurado na ang ayudang pinansiyal ng mga apektado ng Enhanced Community Quarantine (ECQ) sa apat na lugar sa Visayas at Mindanao.

Ipinabatid ito ni DILG Undersecretary Jonathan Malaya matapos lagdaan nina DILG Secretary Eduardo Anio at DSWD Secretary Rolando Bautista ang kasunduan para sa ayudang pinansiyal sa mga apektado ng ECQ sa lalawigan ng Iloilo, Iloilo City, Gingoog City sa Misamis Oriental at Cagayan De Oro City.

Ayon kay Malaya, P1,000 kada indibidwal at pinakamataas na P4,000 kada pamilya ang makukuhang ayuda ng mga apektado ng ECQ.

Sinabi ni Gingoog City Mayor Erick Caniosa na pina-plantsa na nila ang mga panuntunan sa pagpapalabas ng nasabing ayuda kung saan epektibo hanggang Hulyo 31 ang ECQ at maaari pa ito aniyang mapalawig mula Agosto 1 hanggang 7.