Judith Estrada-Larino

Nakatakdang iluklok bukas ng Reporma o Demokratikong Reporma Party si Senador Panfilo Lacson bilang Chairman at pambato nito sa 2022 National Elections.

Inanunsyo ito mismo ni Lacson dahil tugmang-tugma aniya sa kanyang mga prinsipyo at nais mangyari ang ginagawa ng Reporma Party.

Sinabi ni Lacson na natutuwa siya at lumalakas ang kanyang loob dahil sa pagdagsa ng mga volunteer na hindi niya inaasahang magmumula pa sa business sector.

Binigyang diin ni Lacson na anuman ang mangyari matapos ang Mayo 9 Elections, ang masasabi niya lang ay ibinigay nila ang isang good fight o magandang laban na walang sariling agenda kundi agenda lang ng mga nasa Pilipinas ang kanilang tiningnan.

Inamin ni Lacson na inalok siya ng reporma na maging bahagi ng partido noong 2018 pa matapos mapatalsik bilang House Speaker si Congressman Pantaleon Alvarez. —ulat mula kay Cely Ortega-Bueno (Patrol 19)

Balik trabaho na ang mga tauhan ng Bureau of Immigration (BI) na sangkot sa Pastillas Scam.

Ito ayon kay Justice Secretary Menardo Guevarra ay matapos makumpleto ng mga nasabing Immigration Officials ang anim na buwang suspensyon habang iniimbestigahan ang nasabing scam.

Sinabi ni Guevarra na nag-report na sa main office at hindi sa kanilang dating assignment ang mga nasabing empleyado at ang mga nasa ilalim ng job order arrangements ay sinibak na.

Kaugnay nito, ipinabatid ni Guevarra na matatapos na ng Ombudsman at Department of Justice (DOJ) ang imbestigasyon sa naturang isyu. —ulat mula kay Gilbert Perdez (Patrol 13)

Suportado ni Presidential Adviser for Entrepreneurship Joey Concepcion at ilan pang business leaders ang panukala ng OCTA Research Group na dalawang linggo Circuit Breaker Lockdown sa Metro Manila.

Sinabi ni Concepcion na kailangang kumilos kaagad dahil sa banta ng mas delikadong Delta variant ng Coronavirus.

Maganda na aniyang pagkakataong mag lockdown sa panahong ito ng Habagat kaysa sa ber-months o christmas season kung saan magiging mabigat ang epekto sa ekonomiya ng bansa at makapagpapa-delay sa maraming bagay.

Sang-ayon din si George Barcelon, Chairman ng Philppine Chamber of Commerce and Industry (PCCI) sa pagpapatupad ng two week lockdown subalit dapat mabigyan ng sapat na panahon ang business sector para makapaghanda.

Binigyang-diin naman ni Henry Lim Bon Liong, Pangulo ng Federation of Filipino Chinese Chambers of Commerce na kailangang isakripisyo na ang dalawang unang linggo ng Agosto na siyang tamang panahon para mag lockdown at maging maganda ang pasko ng mga Pilipino.

Iniimbestigahan pa ng Department of Health (DOH) ang kaso ng isang pari na nasawi matapos ma heart attack at nag positibo sa COVID-19 sa isinagawang Post Mortem Swab Test.

Ayon kay Health Undersecretary Maria Rosario Vergeire, kailangang malaman ang lahat ng mga detalye sa pagkamatay ni Father Manuel Jardaque Jr. tulad ng brand ng bakuna na itinurok sa kanya o kung naka dalawang doses ba ito ng Sinovac vaccine gayundin ang medical history nito.

Ang 58 taong gulang na si  Jardaque ay sumakay ng tricycle patungong San Roque Cathedral sa Caloocan City noong isang linggo at nakitang wala nang malay sa sasakyan, bago idineklarang dead on arrival sa Caloocan City Medical Hospital.

Tumulak na pa-Israel ang 48 pinoy caregivers na bahagi ng unang batch ng 377 workers na ipapadala sa nasabing bansa sa ilalim ng government to government track.

Ang nasabing track ay resulta ng Bilateral Labor Agreement na nilagdaan ng Pilipinas at Israel noong 2018.

Nakasaad sa kasunduan na hindi na kailangang dumaan sa Private Recruitment Agencies ng mga aplikante at sa halip ay mag-apply ng trabaho sa pamamagitan ng POEA.

Layon ng kasunduan na matigil na ang pagsingil ng placement fees sa mga OFW na kadalasan ay umaabot ng P78,000.

Naghahanda na ang Manila City Government sa posibleng pagpapatupad ng lockdown sa Metro Manila para sagkaan ang posibleng pagkalat ng Delta variant ng Coronavirus.

Ayon kay Manila Mayor Isko Moreno, inalerto na niya ang Manila Disaster and Risk Reduction Management Office, Manila Barangay Bureau at Manila Police Department para ihanda ang puwersa ng mga ito sakaling ikasa ang Granular Lockdown.

Sinabi ni Moreno na nakipag-ugnayan na rin sila sa mga Director ng anim na District Hospital ng Lungsod ng Maynila COVID-19 Field Hospital at Manila Health Department sakaling magkaroon nang pagsirit ng COVID-19 cases kung saan ang active cases sa lungsod ay nasa 642.

Samantala, ipinabatid naman ni Makati City Mayor Abby Binay na magpapatupad ng Granular Lockdown ang City Government sa iba’t-ibang COVID-19 hotspots sa Lungsod kasunod nang pagtaas ng asymptomatic cases dito.

Inihayag ni Binay na pinaghahandaan na rin nila ang Delta variant sa pamamagitan nang pagtatayo ng isang field hospital at mamamahagi sila ng home care COVID-19 kits para sa mga nasa ilalim ng home quarantine.

Nakabili na aniya sila ng oxygen tanks at oxygenators.

Ang Makati ay nakapagtala naman ng 655 active cases ng COVID-19.

24 na pangalan na ang kinukunsider ng opposition coalition na 1Sambayan para sa Senatorial Slate nito.

Karamihan sa mga ito, ayon kay Retired Supreme Court Justice Antonio Carpio ay pawang re-electionists na hindi naman nito tinukoy.

Sinabi ni Carpio na posibleng ibaba nila ito sa 14 dahil kailangan pa nilang konsultahin ang magiging presidential candidate nila bago isapinal ang mga isasabong na senatoriables.

Inihayag ni Carpio na kahit sino mula sa koalisyon ay maaaring mag nominate ng kandidato sa pagka-pangulo o pangalawang pangulo basta’t suportado ito ng kahit dalawang convenors lamang ng 1Sambayan.

Humihingi ng halos $22,000 dollars ang isang domestic worker sa employer nito sa Hong Kong na inireklamo niya ng sexual harassment.

Ang kaso ay isinampa ng equal opportunities commission na kumakatawan sa nasabing Pinay.

Ibinunyag ng Pinay na nagsimula siyang nag trabaho sa bahay ng employer niyang guro sa Yuen Long area at nakaranas ng sexual harassment sa pagitan ng Oktubre 2017 hanggang Enero 2019.

Kabilang aniya sa ginawa ng employer niya ang pagpapakita nang nakahubad at pinaglalaruan ang maselang bahagi ng katawan nito gabi gabi matapos ang hapunan nila lalo na nang umalis ang asawa at mga anak nito patungong Canada nuong Hunyo 2018.

Inamin ng Pinay na hindi siya umalma dahil sa takot na mawalan ng trabaho lalo pat sinusuportahan niya ang tatlong anak niya at kanyang mga magulang subalit napilitang tapusin ang kanyang kontrata nuong Pebrero 2019 nang hilingin ng employer na “paligayahin” niya ito gamit ang kanyang mga kamay kapalit ng plane ticket mula Pilipinas pa hongkong matapos ang maikling bakasyon.

Unti-unti na namang tumataas ang kaso ng COVID-19.

Ito ayon kay Dr. Maricar Limpin, pangulo ng Philippine College of Physicians ang nakikita ng mga ospital sa pagtaas ng mga isinusugod na pasyente ng COVID-19 sa emergency rooms.

Sinabi pa ni Limpin na ramdam na ng mga duktor ang pagtaas ng kaso lalo na sa huling bahagi nuong isang linggo hanggang sa linggong ito.

Tumataas din aniya ang infection sa mga health workers.

Iginiit ni limpin ang pangangailangang maghanda ng respiratory equipment at supplies tulad ng ventilators at oxygen tanks lalo na sa mga malalayong lugar.

Gayunman  tiniyak ni Limpin na tutugon sila kung kinakailangan lalo na kung maaapektuhan na rin ang mga healthcare workers kapag sumirit pa ang kaso ng COVID-19.

Hinihintay na ng mga pribadong ospital ang application ng mga bagong nurse.

Sa gitna na rin ito nang paghahanda ng mga miyembro ng Private Hospitals Association of the Philippines Incorporated (PHAPI) sa posibleng pagsirit ng kaso ng COVID-19 dahil sa Delta variant.

Ayon kay PHAPI President Jose Degrano sa simulat simula pa ay handa naman ang mga pribadong ospital katuwang ang government facilities para sa COVID-19 cases subalit higit na ikinakatakot nila aniya ay hindi kakayanin ng bansa ang pagsirit ng kaso ng virus sa Indonesia at India.

Una nang inihayag ng PHAPI na hindi makapagdagdag ng ICU beds ang kanilang mga miyembro dahil kulang sila ng staff.