Judith Estrada-Larino

Dumating na sa bansa ang panibagong batch ng COVID-19 vaccine ng Sinovac.

Mag aalas-8 kaninang umaga nang lumapag sa NAIA ang eroplano ng Cebu Pacific na nagdala ng may 1.5 million doses ng Sinovac vaccine.

Ang panibagong supply ng Sinovac ay personal na sinalubong nina Health Secretary Francisco Duque III at Vaccine Czar Carlito Galvez, Jr.

Binalaan ng Philippine Red Cross ang publiko laban sa pekeng booking sites at agents na nag-aalok ng swab test.

Ito ayon kay PRC chairman at Senador Richard Gordon ay matapos silang makatanggap ng report hinggil sa ilang indibidwal na nagpapanggap na empleyado ng PRC.

Modus operandi aniya ng mga suspek ang paghingi ng bayad sa mga biktima at ipapasok sa kanilang bank account para makapag-book na ng swab test.

Inihayag pa ng mga suspek na tanging sa PRC official booking site lamang sila tumatanggap ng appointments.

Dahil dito pinayuhan ni Gordon na kaagad tumawag sa Red Cross hotline 1158 ang sinumang lalapitan ng mga nagpapanggap na empleyado ng Red Cross.

Sumirit pa sa 1.15 ang reproduction number ng COVID-19 cases sa National Capital Region.

Nangangahulugan ito ayon kay Professor Guido David, miyembro ng OCTA research group na bumibilis ang hawahan ng nasabing virus sa gitna na rin nang pinangangambahang pag usbong ng Delta variant.

Binigyang diin ni David na maituturing na ring high risk ang Metro Manila matapos makapag rehistro ng 1.15 na reproduction number o bilis ng virus na makahawa.

Kasabay nito ipinabatid ni David na posibleng pumalo sa 10,000 ang mga bagong kaso ng COVID-19 at malaking factor dito ang nakapasok nang Delta variant ng coronavirus

Nakipag-ugnayan na ang DSWD sa local officials ng mga lugar na isinailalim sa ECQ dahil sa pagsirit ng kaso ng COVID-19.

Tiniyak ito sa DWIZ ni DSWD Spokesperson Irene Dumlao matapos atasan ng Pangulong Rodrigo Duterte hinggil sa ayuda sa mga residente ng Iloilo City, Iloilo Province, Cagayan De Oro at Gingoog City, Misamis Oriental.

Sa katunayan ipinabatid ni Dumlao na nakipag-usap na ang DSWD Region 10 director sa mga alkalde ng CDO at Gingoog City para sa agarang pagpapadala ng food packs sa mga apektadong residente samantalang nakapamahagi na sila ng ayudang pagkain sa mga tiga-Iloilo City.

Pina-plantsa na rin aniya nila ang mga tatanggap ng financial assistance.

Binaha ang ilang lugar sa Metro Manila dahil sa patuloy na pag ulan dulot ng habagat na pinalakas pa ng Bagyong Fabian.

Ayon sa MMDA kabilang sa mga nakaranas ng gutter deep na pagbaha ang EDSA POEA southbound, EDSA Boni southbound, EDSA-Ortigas split northbound  EDSA J. Vargas northbound, C5 Eastwood North At Southbound, C5 J. Vargas North at Southbound, C5 Ortigas Southbound, Roxas Boulevard Quirino Service Road, Rizal Avenue Recto, Roxas Pedro Gil, A. Bonifacio Sergeant Rivera, Aurora Araneta Westbound at E. Rodriguez Araneta North at Southbound.

Ipinabatid pa ng MMDA na pinalala pa ng high tide ang sitwasyon sa Roxas Boulevard.

Kabilang naman sa hindi maaaring madaanan simula kaninang maga-alas-9 ng umaga dahil sa hanggang tuhod na tubig baha ang UN Taft north at southbound, Taft National Museum Southbound at Maria Orosa Taft North at southbound gayundin ang bahagi ng T.M Kalaw Street sa Ermita, Maynila.

Walang dagok sa NDF ang pag-freeze ng Anti Money Laundering Council sa pondo at assets nito.

Ayon ito kay PNP Spokesperson Brigadier General Rannie Olay dahil tiyak na hindi na makakagalaw ang teroristang grupo lalo na sa recruitment nito ng mga bagong miyembro.

Mga seryosong isyu at problema ng bansa.

Ang mga ito ayon kay Senate President Vicente Sotto III  ang pagtutuunan nila ng pansin ni Senador Panfilo Lacson sa panahon ng kampanya.

Sinabi ni Sotto na hindi sila magpapa apekto sa mga trolls at maging sa sinuman ang makalaban nila sa 2022 national elections.

Tiniyak ni Sotto na magiging disente ang kanilang kampanya na se sentro sa kanilang programa at nakikitang solusyon sa mga problema ng bansa.

Una nang kinumpirma nina Lacson at Sotto ang pagta-tandem sa 2022 national elections. —ulat mula kay Cely Ortega-Bueno (Patrol 19)