Judith Estrada-Larino

Tiyak na mahaharap sa mas malaking hamon ang Pilipinas sa laban sa Delta variant.

Ito ayon kay Presidential Adviser for Entrepreneurship Joey Concepcion ay kaya’t makatuwiran lamang ang ginawa ng pribadong sektor na isulong ang dalawang linggong ECQ sa Metro Manila.

Sinabi ni Concepcion na mas mabuting ipatupad ang ECQ ngayong buwan para maprotektahan ang fourth quarter ng mga micro, small and medium enterprises at mga malalaking kumpanya.

Sa panahon aniya ng fourth quarter kadalasang nakakabawi ng kanilang kita ang mga negosyante dahil natataon ito sa christmas season.

Binigyang diin ni Concepcion na kapag hindi pa kumilos ang gobyerno, posibleng tumagal pa ng isa hanggang dalawang buwan ang ECQ sa halip na dalawang linggo lamang.

Mananatili pa ring problema ang iligal na droga kahit pa patayain ang lahat ng drug dealers at sunugin ang illegal drugs.

Ito ayon kay Senate President Vicente Sotto, III ay hangga’t mayroon pa ring drug dependent o drug addict na hahanap-hanapin tiyak ang magagamit na drugs o substance tulad ng cough syrup, nubaine at iba pa.

Sinabi ni Sotto na kapag nagkataon ay mayroong susulpot na bagong dealers na papalit sa mga napatay na drug trafficker kayat mas mabuting sundin pa rin ang holistic approach sa paglaban at pag resolba sa problema sa iligal na droga. —ulat mula ng Cely Ortega Bueno (Patrol 19)

Pinaboran ni Senador Ronald Bato Dela Rosa ang pahayag ng Pangulong Rodrigo Duterte na publiko o bawat pamilyang Pilipino ang nagbe-benepisyo sa mga napapatay sa giyera kontra iligal na droga.

Sinabi ni Dela Rosa na para sa kapakanan at proteksyon ng publiko ang dahilan nang paglulunsad ng gobyerno ng madugong war on drugs.

Tama aniya ang Pangulo sa pagsasabing siya at kanyang pamilya ang numero unong target ng mga drug lord na nasasagasaan nang pinaigting na kampanya ng pamahalaan laban sa iligal na droga.

Ayon pa kay Dela Rosa, nakakalungkot na pinasukan ng pulitika ang war on drugs kung saan inakusahan ang Pangulo ng paglabag sa karapatang pantao para lamang makuha ang atensyon ng international community. —ulat mula kay Cely Ortega Bueno (Patrol 19)

Pinamamadali ni Senador Grace Poe sa PhilHealth at DBM ang pagbabayad sa mga ospital at mga manggagawa rito lalo na’t magla-lockdown na naman sa NCR plus.

Ayon kay Poe, sana ay kaagad nang mabayaran ang claims ng mga ospital at huwag nang paabutin pa ang season 10 ng ECQ.

Dahil sa tumataas na kaso ng COVID-19 at banta pa ng Delta variant, binigyang diin ni Poe na mahalagang mayroong pondo ang mga ospital para makapaghanda ng kanilang mga supplies at mga tauhan.

Una na rin aniyang umaaray ang medical workers dahil ilan sa kanila ay wala pa ring special risk allowance na nakasaad sa Bayanihan 1 at 2.

Bago pa ipatupad ang ECQ sa Biyernes, sinabi ni Poe na  mag doble kayod ang gobyerno para paghandaan ito kabilang na ang ayuda sa mga sakop ng ECQ.  —ulat mula kay Cely Ortega Bueno (Patrol 19)

Dapat payagang mapalawig ang coverage ng vaccine cards upang mas madaling maka biyahe lalo na ang mga manggagawa at mga OFWs.

Sa isinusulong niyang Senate Bill 2321, inirerekomenda ni Senador Grace Poe na i-expand ang layunin ng vaccine card para maging isang required document na magagamit ng fully vaccinated sakaling kailanganin sa pag biyahe sa bansa at maging sa abroad.

Sa ilalim ng panukala, papayagan ito base sa mga sinusunod na regulasyon ng IATF kung saan bukod sa vaccination card, kabilang pa sa requirements ang certificate na iniisyu ng DICT o certification ng City Health Officer ng lokal na pamahalaan n nagbigay ng last dose para makumpleto ang full vaccination. —ulat mula kay Cely Ortega Bueno (Patrol 19)

Inamin ni Senate President Vicente Sotto, III na makakaantala sa pagpasa ng priority bills ang suspensyon ng sesyon ng Kongreso dahil na rin sa pagpapatupad ng ECQ sa Metro Manila simula sa Agosto 6.

Ayon kay Sotto, hanggang ngayong araw na ito ay magse-sesyon pa sila at muling magre-resume sa Agosto 23 o pagkatapos na ng dalawang linggong ECQ bagamat kung kinakailangan ay magpapatawag siya ng sesyon bago mag Agosto 23.

Samantala, nilinaw naman ni Senate Finance Committee Chair Juan Edgardo Angara na hindi makakaantala sa pagpapasa nila ng panukalang 2022 Budget ang ECQ dahil Setyembre pa nila sisimulan ang committee hearings hinggil dito. —ulat ni Cely Ortega-Bueno (Patrol 19)

80% ng mahigit 13-M populasyon sa Metro Manila o halos 11-M individual ang mabibigyan ng ayuda sa panahon ng ECQ sa NCR.

Ayon ito kay Senador Bong Go matapos aprubahan ng Pangulong Rodrigo Duterte ang pondo para sa pinansyal na ayuda na tig-P1,000 kada kuwalipikadong indibidwal sa Metro Manila o maximum na P4,000 kada household.

Sinabi ni Go na sa pamamagitan ng ayudang ito, matutulungan ang mga mahihirap na Pilipino na maitawid ang kanilang pamilya habang apektado ang kanilang kabuhayan dahil sa ECQ lalo na ang mga daily wage earners at mga aniya’y isang kahig, isang tuka.

Dahil sa direktang ida-download ang pondo sa mga LGU sa NCR, umapela si Go sa local officials na tiyaking maibibigay kaagad ang ayuda sa mga tamang beneficiary sa maayos, mabilis, ligtas at malinis na paraan. —ulat ni Cely Ortega-Bueno (Patrol 19)

Suspendido muna ang pagturok ng ikalawang dose ng Sputnik Vaccines sa mga residente ng Bacoor, Cavite.

Ito ayon sa Bacoor LGU ay dahil wala pa silang natatanggap ng panibagong supply ng bakuna gawa sa Russia.

Dahil dito, pinayuhan ng Bacoor LGU ang mga naghihintay ng second dose na abangan na lamang ang anunsyo nila sa schedule nang pagturok sa kanila ng Sputnik Vaccines.

Nasa kabuuang 217, 800 doses na ng Sputnik Vaccine ang natanggap ng Pilipinas.

Hindi na maiiwasan ang pagsirit ng kaso ng COVID-19 partikular ng Delta variant lalo na nitong nakalipas na dalawang linggo.

Ayon ito kay Dr. Rontgene Solante, Infectious Disease Specialist at miyembro ng Vaccine Expert Panel, dahil mabilis na makahawa talaga ang Delta variant na kaagad makakahawa ng lima hanggang walo kapag nakasalamuha sa isang closed space kung walang face mask, face shield at physical distancing.

“Talagang meron pagtaas ng kaso ng COVID-19 at ito din yung mga same characteristic na nakikita sa ibang bansa nung nakapasok yung Delta variant dahil nga sa pagtaas ng hawaan netong variant ng COVID-19, so expected din yan ng maraming hospital, marami ring potential na mamamatay, dahil nga sa marami pa ring hindi nabakunahan, especially yung mga tinatawag natin na vulnerable population, yung A2 and A3 yun,” wika ni Solante.

Dahil dito, binigyang diin ni Solante na mahalaga ang dalawang linggong ECQ sa Metro Manila simula Agosto 6 para hindi na maulit ang sinapit ng bansa nang unang bumulaga ang COVID-19 sa bansa.

“In the past 2 weeks talagang unti-unti na tumataas. Kaya yung pag-declare ng ECQ, ito yung just timely na hopefully mapigilan natin yung tinatawag natin na overwhelming number of cases to the point na wala na tayong maipaglagyan doon sa mga pasyente, sa mga hospital, kasi yun yung…natin dahil na-experience natin nung March na hindi pa nga yun Delta variant, maraming namamatay, hindi nakaabot ng hospital…ayaw sana natin mangyari yan kaya napakaimportante takaga netong ECQ na kailangan nating gawin in the next two weeks.” Si Dr. Rontgene Solante, miyembro ng Vaccine Expert Panel, sa panayam ng DWIZ.