Judith Estrada-Larino

Pinarerekonsidera nina Senador Panfilo Lacson at Koko Pimentel ang polisiyang pagbabawal sa non-APOR na ihatid o sunduin ang essential workers sa panahon ng ECQ sa Metro Manila simula Agosto 6 hanggang 20.

Ayon kay Lacson, dapat pag-aralan ng PNP ang polisiya nito dahil impractical at illogical ito at sa halip ay humanap ng win-win solution para sa essential workers. Nagpaabot din ng pagtutol si Pimentel sa ‘no hatid, no sundo’ rule na aniya’y malaking inconvenience sa health workers at iba pang APOR.

Tinukoy ni Pimentel ang ilang doktor na nag-duty ng 4 na sunud-sunod na araw at kailangang ihatid papunta at pauwi mula sa kaniyang trabaho. Hindi na dapat pang pahirapan ang mga frontliners na una nang hinimok ni PNP Chief Guillermo Eleazar na gumamit na lamang ng pampublikong sasakyan.

Ginawaran ng Career Executive Service Officer (CESO) rank ang mga nagtapos ng Master of National Security Administration Program ng National Defense College of the Philippines, kung saan umuukupa sila ng Career Executive

Service Positions. Nakasaad ito sa Executive Order 145 na inisyu ni Pangulong Rodrigo Duterte. Binigyang-diin sa EO ang pangangailangang palakasin at maipatupad ang polisiya hinggil sa pagbibigay ng CESO rank sa mga nagtapos sa MNSA program para paramihin ang leader managers sa gobyerno at pagpapaigting sa kalidad ng policy formulation at governance sa public sector.

Nakapaloob din sa EO ang pagtataas sa salary grade 25 o 98K mula sa salary grade 24 o 86K kada buwan ng MNSA graduates na may hawak ng career service positions sa division level.

Limitado lamang ang maaaring mabiling basic goods sa Quezon City sa pagpapatupad ng ECQ sa Metro Manila.

Batay sa direktiba ni Quezon City Mayor Joy Belmonte, kailangang limitahan ang pagbili ng mga basic goods para maiwasan ang hoarding at magka problema rin sa supply ng mga ito, dahilan para hindi makabili ng kanilang pangangailangam ang ilang pamilya sa panahon ng ECQ.

Sinabi ni Belmonte na kailangang mailatag na ang polisiyang ito para pantay na makabili ang mga residente ng lahat ng kanilang pangangailangan. Hanggang limang pirasong sardinas lamang kada brand at hanggang 10 karneng de lata naman tulad ng meatloaf ang mabilili ng bawat tao sa kabuuan ng ECQ.

Walang kakulangan ng oxygen tank sa gitna na rin ng pagsirit ng COVID-19 cases sa bansa.

Ayon ito kay DTI Secretary Ramon Lopez matapos balaang hahabulin ang mga pasaway at hoarder ng oxygen tanks.

Sinabi ni Lopez na isang krimen ang hoarding sa panahon ng pandemya kaya’t malalagot sa kanilang Economic Intelligence Team ang mga pasaway na distributor o refillers.

Ipinabatid ni Lopez na batay sa report mula sa industriya, ang pagtaas sa demand ng cylinder tanks ay mula sa mga household na bumibili nito para sa personal na gamit.

Gagamitin ng DOLE ang bahagi ng emergency employment fund nito para ma-ayudahan ang mga manggagawang pansamantalang mawawalan ng trabaho dahil sa muling pagpapatupad ng ECQ sa Metro Manila.

Ayon kay Labor Secretary Silvestre Bell,III, ipinag utos na niya ang paggamit sa nalalabing pondo ng tupad o tulong panghanapbuhay sa ating disadvantaged/displaced workers program para sa manggagawang madi-displace sa formal sector sa loob ng dalawang linggong ECQ.

Ipinabatid ng DOLE na mayroon pang P4-B na nalalabing pondo sa ilalim ng tupad program.

Kasabay nito, hiniling din ni Bello sa DBM ang P2-B supplemental budget para palawigin ang assistance sa ilalim ng Social Amelioration Program na camp o COVID-19 Adjustment Measures Program ng DOLE.

Ang camp ay nagbibigay ng P5,000 financial assistance sa mga apektadong manggagawa sa mga establishment na nag adopt ng flexible work arrangements sa ilalim ng ECQ.

Posibleng hugutin sa panukalang Bayanihan 3 ang pondo para sa special risk allowance at hazard pay ng health workers hanggang sa katapusan ng taong ito.

Ipinabatid ito ni Health Undersecretary Leopoldo Vega na umamin sa pagdinig ng Kamara na kailangan nila ang pondo mula sa Bayanihan 3 para sa benepisyo, kumpensasyon at maging sa kakailanganing equipment ng health workers.

Sinabi ni Vega na gagastusin din ang pondo para sa pagkain, accommodation at transportasyon ng health workers bukod pa sa pagsuporta sa iba’t ibang operating units gayundun ang testing kits at laboratory commodities, mga gamot, pagbili ng bakuna at maging ang pag deliver nito.

Kasabay nito, inihayag ni Vega na nasa 84% na ng pondo para sa special risk allowance ang naipalabas na sa ilalim ng Bayanihan 2.

Nais makipag-ugnayan ng oppositon coalition na 1Sambayan kay Vice President Leni Robredo matapos ang lumutang na “exploratory talks” nito kina Senador Panfilo Lacson at Vicente Sotto, III kaugnay sa 2022 National Elections.

Sinabi ni 1Sambayan Convernor Father Albert Alejo na gusto nilang humarap si Robredo sa 20 miyembro ng Convenors Group at dito mapag-usapan ang mga pananaw nila sa mga nangyayari.

Ayon kay Alejo, posibleng mabigyan sila ng panahon ni Robredo ngayong linggo o sa susunod na linggo para magkaalaman na sa posibleng mabuo para sa 2022 National Elections.

Una na ring kinumpirma ng kampo ni Robredo na nakipag-usap na ito kay Senador Richard Gordon na umanoy tatakbo rin sa 2022 National Elections.

Bagamat umaming bukas dito, inihayag ni Robredo na wala pa siyang pasya kung papalaot sa presidential elections sa susunod na taon.

Muli na namang sumampa sa mahigit 7,000 ang bagong kaso ng COVID-19 sa bansa.

Ayon sa DOH, pumapalo sa 7,342 ang nadagdag sa ngayo’y nasa 1,619,824 cases ng COVID-19.

Sumirit din sa 63,171 ang aktibong kaso ng COVID-19 kung saan 94.1% ang mild, 1.3% ang asymptomatic, 2% ang severe at 1.2% ang critical condition.

Samantala, tumaas pa sa 1,528,422 ang total recoveries matapos madagdag ang 7,285 mga bagong naka-recover sa nasabing sakit.

Sumampa na rin sa 28,231 ang death toll sa COVID-19 matapos maitala sa 90 ang mga bagong nasawi.

Ipinabatid ng DOH na 61% ng ICU beds ang nagagamit na gayundin ang 41% ng mechanical ventilators.

Pondo.

Ito ang nakikitang problema ng gobyerno kaya’t nagkaroon ng aberya sa renewal ng kontrata ng contact tracers sa bansa.

Ayon kay Contact Tracing Czar Baguio City Mayor Benjamin Magalong, napalawig pa nila hanggang Hulyo 30 ang sana’y hanggang Hunyo 30 na pagtatapos ng kontrata ng contact tracers.

Sa ngayon ay nasa 6,921 ang contact tracers na kinuha ng gobyerno at nasa 56,303 ang target maisailalim sa Contact Tracing Retraining Program.

Bukod sa funding issues, sinabi ni Magalong na naging problema rin nila ang masamang panahon, connectivity issues at imposition ng community quarantines.

Samantala, ipinabatid ni DILG Undersecretary Epimaco Densing, III na humihingi pa sila sa DBM ng P5-7B para sa extension ng kontrata ng contact tracers.

Pagpupulungan pa ng IATF ngayong araw na ito, ang panukalang isailalim sa ECQ ang Region 4A o CALABARZON.

Ipinabatid ito kay Health Secretary Francisco Duque, III sa pagdinig ng House Committee on Health.

Sinabi ni Duque na posibleng buong CALABARZON o piling lugar lamang ang ilagay sa ECQ naka depende aniya sa mga datos at projections na makukuha nila hanggang ngayong araw na ito o bago idaos ang kanilang pagpupulong.