Judith Estrada-Larino

Nadagdagan pa ng 116 ang kaso ng Delta variant ng Coronavirus sa bansa.

Ayon sa DOH, 95 sa Delta cases na ito ay local, isa ang returning overseas filipino at 20 ang sumasailalim sa verification.

Kabilang sa local cases ang 83 mula sa Metro Manila, tatlo sa Calabarzon, apat sa Central Visayas, dalawa sa Davao Region at tig isang kaso sa Zamboanga Peninsula, Cagayan Valley at Ilocos Region.

Sinabi ng DOH na nasa 331 na ang kabuuang Delta variant cases sa bansa.

Ipinabatid ng DOH na lahat ng kaso ay itinuturing nang recovered at lahat ng mga impormasyon ay na-verify ng regional at local health offices.

Samantala, nakapagtala rin ang bansa ng 113 Alpha variant cases, 122 Beta cases at sampung bagong kaso ng P.3 variant na unang nadiskubre sa Central Sisayas.

Dahil dito, ang bansa ay nakapag record nang kabuuang 1, 968 Alpha cases at 2, 268 Beta cases.

Isinusulong ni Senador Sonny Angara ang imbestigasyon muli sa PhilHealth dahil sa atrasadong pagbabayad nito sa claims ng mga ospital.

Sa kaniyang inihaing resolusyon, sinabi ni Angara na mas mabuting mabusisi kung bakit palaging matagal magbayad ng PhilHealth, kung paanong mapapabilis ang pagbabayad at kung ano ang maitutulong ng kongreso at iba pang ahensya ng gobyerno sa PhilHealth.

Ayon kay Angara, Chairman ng Senate Finance Committee, tungkulin ng gobyerno na tiyaking sapat ang kakayahan at kapasidad ng mga pampubliko at pampribadong ospital lalo na ngayong pinangangambahan ang pagdami ng magkakasakit dahil sa mas nakakahawang Delta variant ng coronavirus.

Hindi aniya uubrang paunti unting pagbabayad ng PhilHealth dahil magiging dahilan ito para bawasan ng ilang ospital ang kanilang operasyon o magbawas ng bed capacity at working hours ng kanilang mga tauhan.

Una nang inihayag ni Dr. Jaime Almora, Pangulo ng Philippine Hospital Association na nasa P50 milyon hanggang P70 milyon ang hindi nababayaran ng PhilHealth sa bawat ospital kaya’t may mga nangungutang o kaya naman ay ginagamit ang savings sa kanilang operasyon.

Tumaas ang mga natatanggap na tawag simula pa nuong isang linggo ng One Hospital Command Center (OHCC).

Ayon kay Dr. Bernadett Velasco, Operations Manager ng OHCC, nasa average na 300 calls kada araw ang natanggap nila nuong Hulyo mula sa dating 100 hanggang 120 daily calls nuong Hunyo.
Sa nakalipas na tatlong araw lamang, pumalo sa 600 ang average na bilang ng tawag kung saan 730 calls ang natanggap kahapon, Agosto 4.

Karamihan aniya ng mga tawag ay mula sa Metro Manila, Calabarzon at Central Luzon bukod pa sa mga OFW na humihingi ng assistance para sa medical repatriation at iba pa.
Sinabi ni Velasco na pataas ang bilang ng mga tawag sa OHCC kaya’t nagkasa na sila ng surge capacity plan.

Suportado ni Senador Francis Kiko Pangilinan ang pag kambyo ng PNP hinggil sa paghahatid at pagsundo sa essential workers sa panahon ng ECQ sa Metro Manila simula bukas, Agosto 6.

Ayon kay Pangilinan, tama lamang ang anunsyo ni PNP Chief General Guillermo Eleazar na papayagan nang makapaghatid sundo ang mga non APOR sa apor basta’t mayroong certificate of employer ang ipagmamaneho dahil dagdag pahirap kapag nag commute pa ang frontliners at essential workers.

Sinabi ni Pangilinan na dapat gumawa ng paraan ang gobyerno at huwag maging pahirap sa taumbayan dahil ang publiko ay pilit hinahanap ng solusyon ang kanilang problema sa pagtatrabaho sa gitna ng pandemya.

Papayagan na rin ng PNP ang mga non-apor na maghatid sundo hindi lamang sa mga healthworker kundi sa lahat ng essential workers.

Binigyang diin ito ni PNP Chief Police General Guillermo Eleazar matapos silang humingi ng gabay mula sa National Task Force Against COVID-19 kasunod na rin nang pagsailalim sa ECQ ng Metro Manila simula bukas, Agosto 6 hanggang sa Agosto 20.

Ayon kay Eleazar,kailangan lamang mag prisinta ng Certificate of Employment (COE) ang mga non apor drivers ng kanilang susunduin o ihahatid na essential worker para makadaan sa Quarantine Control Points (QCP).

Dapat din aniyang nakalagay sa COE ang driver, modelo at plate number ng sasakyan at contact number ng employer gayundin ang kopya ng business permit nito.

Una nang inihayag ni Eleazar na ID lamang ng health worker ang kailangang ipakita ng mga non apor drivers kung mga health worker naman ang susunduin.

Halos kapareho ng mutation ng Delta variant ang Lambda Coronavirus variant na una nang na-detect sa Peru.

Ayon ito kay Dr. Rontgene Solante, infectious disease expert, kaya’t posibleng maging variant of concern na rin ang Lambda variant na hindi pa naman nade-detect o nakakapasok sa Pilipinas.

Ibinabala ni Solante na uubra ring makahawa ang Lambda variant at posibleng maging resistant dito o makabawas ng efficacy ang mga bakuna tulad ng nakita sa mga variant of concern tulad ng Delta at Alpha.

Kasabay nito, hinimok ni Solante ang publiko partikular ang mga matatanda, persons with comorbidities at mga bata na mahigpit na kumilos laban sa COVID-19 kung saan naitala ang pagsirit nito sa San Lazaro Hospital.

Kinontra ng ilang supermarket at consumer group ang kautusan ni Quezon City Mayor Joy Belmonte na limitahan lamang ang mabibiling basic goods tulad ng delata sa panahon ng ECQ o simula bukas, Agosto 6.

Ayon kay Steven Cua, Pangulo ng Philippine Amalgamated Supermarket Association, hindi na kailangan ang ordinansa o kautusan hinggil dito ni Belmonte dahil mismong ang mga supermarket na ang otomatikong nagko kontrol sa panic buying sa pamamagitan nang paglimita sa dami o bilang ng uubrang bilhin ng isang customer.
Sinegundahan naman ito ni Atty. Cic Dimagiba, Pangulo ng Laban Konsyumer na nagsabi pang tinitiyak naman ng manufacturers at lokal na pamahalaan na sapat ang supply ng mga produkto.

Mas mabuti aniyang ipaubaya na lamang sa consumers ang desisyon sa mga bibilhing produkto habang naka ECQ ang Metro Manila.

Ipinagpaliban ni Manila Mayor Isko Moreno ang nakatakdang panunumpa nito sa aksyon demokratiko ngayong hapon.

Ito ay para ayusin ang kaguluhan sa itinakdang pagbabakuna kaninang hatinggabi sa limang mall sa Maynila, isang araw bago ang pagpapatupad ng ECQ ayon kay Cesar Chavez, Chief of Staff ni Isko.

Mas kailangan ng atensyon ng Alkalde ang nagkakagulong mga residente ng Maynila para makapagpabakuna.

Nasabihan na naman nila ang aksyon demokratiko sa hindi natuloy na panunumpa rito ni Mayor Isko.

Bumagal pa ang inflation o bilis nang pagtaas ng presyo ng mga produktong serbisyo sa nakalipas na buwan.

Ayon kay PSA Chief at National Statician Claire Dennis Mapa,apat na porsyento ang ibinagal ng headline inflation sa buwan ng Hulyo matapos higit pang bumagal ang paggalaw ng transportation cost na nasa 7% inflation.

Ang transportation cost aniya ay nasa 77. 5% share sa pagbaba ng pangkalahatang inflation sa bansa.

Gayunman ..dahil sa naitalang datos noong Hulyo, ang year to date average inflation na sa ngayon ay 4.4% na mas mataas pa rin kumpara sa target range ng gobyerno na 2 hanggang 4 na porsyento.