DWIZ 882

Posibleng tumaas ng limang piso hanggang sampung piso kada kilo ang presyo ng ilang klase ng gulay dahil sa patuloy na mga pag-ulan.

Ito ayon mismo kay Agriculture Secretary Francisco Tiu Laurel Jr. sa isinagawang price monitoring sa New Las Piñas City Public Market.

Kinumpirma ng kalihim na maaaring tumagal ang pagtaas ng presyo ng ilang araw hanggang isang linggo dahil naapektuhan ng masamang panahon ang mga lugar na nagtatanim ng high-value crops.

Samantala, nilinaw ni Secretary Laurel na nananatiling matatag ang presyo ng isda, karne ng baboy at manok dahil sapat ang suplay ng mga ito hanggang sa katapusan  ng taon.

Gayunman, posible anyang maapektuhan ang produksiyon ng manok sa Nobyembre o Disyembre kung mararanasan ang matinding epekto ng El Niño.

Tiniyak din ng kalihim na walang inaasahang kakulangan sa suplay ng lokal na bigas dahil magsisimula na ang anihan sa ilang bahagi ng bansa pagsapit ng Setyembre.  l mula sa panulat ni Jordan Gutierrez

Nanawagan ang isang transport group sa pamahalaan na repasuhin ang value-added tax at excise tax sa mga produktong petrolyo sa halip na umasa lamang sa fuel subsidy at diskwento sa krudo.

Ayon kay PISTON President Mody Floranda, mas makikinabang ang lahat ng jeepney driver at motorista kung mismong presyo ng langis ang bababa dahil sa mas mababang buwis.

Ipinunto ni Floranda na hindi lahat ng driver ay nakatatanggap ng fuel subsidy o ang sampung pisong diskwento sa kada litro ng gasolina, lalo na ang mga hindi kabilang sa mga kooperatiba o korporasyong sumailalim sa consolidation.

Binigyang-diin ng PISTON na kailangan ng sektor ng transportasyon ng pangmatagalang solusyon sa patuloy na pagtaas ng presyo ng petrolyo at hindi pansamantalang ayuda lamang. l mula sa panulat ni Jordan Gutierrez

Iginiit ni Energy Secretary Sharon Garin na mahalagang maisaayos ng mga power utility company ang kanilang mga sistema at linya ng kuryente para mabawasan ang system loss at maiwasang maipasa ang dagdag na gastos sa mga consumer sa pamamagitan ng kanilang buwanang electricity bill.

Ayon kay Secretary Garin, bumuo na ang Department of Energy (DOE) ng isang task force na magsasagawa ng pagsusuri sa mga electric cooperative at iba pang power distribution utility upang matukoy ang mga problema sa kanilang sistema nang makapagpatupad ng mga kinakailangang reporma.

Tiniyak ng DOE na ipagpapatuloy nito ang mga hakbang upang mabawasan ang pasanin ng mga consumer sa singil sa kuryente, kabilang ang pagpapahusay sa operasyon ng mga power distribution company at pagpapatupad ng mga programang magpapababa sa system loss.  l mula sa panulat ni Jordan Gutierrez

Tinawag ni House Prosecutor Terry Ridon na “makapal ang mukha” ang ilang opisyal ng Office of the Vice President (OVP) at Department of Education (DepEd) matapos umanong hilingin sa Commission on Audit (COA) na maglabas na lamang ng “audit query” sa halip na Audit Observation Memorandum (AOM) kaugnay ng pag-audit sa confidential funds.

Sa press conference, binigyang-diin ni Ridon na wala sa lugar ang paghingi ng ganitong pabor dahil ang COA lamang ang may kapangyarihang magpasya kung anong uri ng audit action ang dapat nilang ilabas.

Iginiit ni Ridon na kapag may natukoy na kakulangan o iregularidad, hindi ito dapat baluktutin o baguhin ng sinuman.

Matatandaang sa naging testimonya ng dating State Auditor ng COA-ICFAO na si Roderick Wamil sa Senate impeachment trial, inihayag nito na noong September 2023 ay nakipagpulong ang mga opisyal ng OVP at DepEd sa mga opisyal ng COA para sa liquidation ng confidential funds.

Ayon kay Wamil, nang ipaliwanag ng COA na maglalabas sila ng AOM kapag may nakita silang kakulangan sa mga dokumento, inihirit umano ng mga opisyal ng OVP na kung maaari ay audit query na lamang ang ilabas.

Para kay Ridon, hindi dapat naganap ang naturang pagpupulong at malinaw na may pagtatangkang impluwensyahan ng OVP ang COA.

Nauna nang tumestigo si Wamil na may mga kakulangan sa mga dokumentong isinumite ng OVP at DepEd kaugnay ng paggamit ng mahigit P612.5 million confidential funds. | via Geli Mendez (Patrol 30)

BASAHIN:

#DWIZ #DWIZNews #DWIZ882AM

Nilinaw ng Department of Justice na walang kumpirmasyon sa napabalitang naaresto na umano si Sen. Ronald “Bato” dela Rosa.

Sa press conference, sinabi ni DOJ Spokesperson Atty. Polo Martinez na hanggang sa kasalukuyan ay wala pa silang natatanggap na ulat tungkol sa naturang isyu.

Kumalat sa mga mamamahayag ang impormasyon na diumano’y nahuli na umano si Sen. Bato sa Davao.

Kaugnay nito, tumanggi si Martinez na kumpirmahin kung nahuli ba o hindi ang senador.

Nahaharap si Dela Rosa sa kasong crimes against humanity sa International Criminal Court (ICC) kaugnay ng kampanyang “war on drugs” noong nakaraang administrasyon.

Huli siyang nakita sa publiko noong madaling araw ng Mayo 14 nang umalis siya sa Senado kasama si Senador Robin Padilla matapos magpakita roon kasunod ng matagal na pagkawala sa publiko. | via Jun Samson (Patrol 24)