DWIZ 882

Para sa House prosecution team, lalo pang napagtibay ang testimonyang binitawan ng dating State Auditor ng COA-ICFAO na si Roderick Wamil kaugnay sa Article 1 ng Articles of Impeachment na tumutukoy sa maling paggamit ng confidential funds.

Sa pulong-balitaan, sinabi ni Counsel for the Prosecution Spokesperson Atty. Benjamin Tolosa Jr. na hindi nabutasan ang kanilang testigo sa nagpapatuloy na impeachment trial laban kay Vice President Sara Duterte.

Sa katunayan, aniya, maraming nailahad na testimonya si Wamil sa direct examination na ginawa ni Private Prosecutor Atty. Lorna Kapunan na hindi natanong sa panig ng defense team.

Ito, aniya, ang dahilan kaya mas lalo pang napagtibay ang mga alegasyong nakapaloob sa Article 1 laban kay VP Sara.

Para kay Tolosa, patunay lamang ito na matibay ang mga naging testimonya ni Wamil laban sa bise presidente. | via Geli Mendez (Patrol 30)

Kailangang isaalang-alang ng pamahalaan ang alinlangan ng publiko sa pinaplanong Pax Silica Project at tiyakin ang tiwala nito bago ito simulan.

Ito ang naging panawagan ng Catholic Educational Association of the Philippines sa gitna ng umiinit na talakayan tungkol sa pagpapatayo ng isang tech hub sa New Clark City sa Tarlac.

Ayon sa CEAP, hindi dapat balewalain ng pamahalaan ang pagtuligsa ng ilang sektor sa Pax Silica. Bagkus, kilalanin ang mga ito bilang mahahalagang tanong tungkol sa intergenerational equity, environmental sustainability, at estratehiyang ekonomikal ng pamahalaan.

Ipinanawagan din ng grupo ang mas maigting na kalinawan, makabuluhang partisipasyon ng publiko, malayang environmental monitoring, at patas na paghahati ng benepisyo bago pa man magsimula ang proyekto.—sa panulat ni Anjo Riñon

Magsasagawa ng panibagong tigil-pasada ang grupong Manibela sa susunod na linggo.

Ayon sa Manibela, tatagal ang kanilang transport strike mula Agosto 10 hanggang 12.

Dadaluhan din ng ilang transport group ang pinaplanong tigil-pasada na, ayon kay Manibela Chairman Mar Valbuena, ay bilang panawagan sa pamahalaan na magpatupad ng dagdag-pasahe sa gitna ng tumataas na presyo ng langis.

Matatandaang nagsagawa rin ng tigil-pasada ang Manibela noong Hulyo 22 hanggang 23 dahil din sa pagsirit ng presyo ng produktong petrolyo.—sa panulat ni Anjo Riñon

Ibinahagi ng Philippine National Police na malaki ang ibinaba ng naitalang focus crimes sa buong bansa nitong nakalipas na Hulyo.

Ayon kay PNP Chief, General Jose Melencio Nartatez Jr., nakitaan ng 36.12% na pagbaba ang focus crimes sa bansa kung ikukumpara sa kaparehong buwan noong nakaraang taon.

Mula sa mahigit tatlong libong insidente noong Hulyo 2025, bumaba ito sa mahigit 2,000 na lamang ngayong taon.

Ayon sa PNP, pinakamalaki ang ibinaba sa mga kaso ng rape, motor vehicle carnapping, at motorcycle theft.

Giit ni Gen. Nartatez, bunga ito ng pinaigting na police visibility, mas mahigpit na operasyon, at pakikipagtulungan ng komunidad sa mga otoridad.—sa panulat ni Anjo Riñon—ulat mula kay Jopel Pelenio (Patrol 17)

Nilinaw ng testigong si dating Commission on Audit–Intelligence and Confidential Funds Audit Office (COA-ICFAO) State Auditor Roderick Wamil na walang probisyon sa Joint Circular No. 2015-01 na nagbabawal sa paggamit ng confidential funds sa loob ng partikular na bilang ng mga araw.

Ito’y matapos kwestiyunin ni Defense Counsel Atty. Michael Poa sa cross-examination kung may nakasaad sa naturang circular na hindi maaaring gamitin ang cash advances sa loob lamang ng 11 araw.

Bilang tugon, sinabi ni State Auditor Wamil na walang ganitong probisyon, kaya hindi isinama sa kanilang findings ang 11-day disbursement ng confidential funds.

Ang pagbanggit aniya sa 11 araw sa Audit Observation Memorandum (AOM) ay isa lamang statement of fact at hindi isang audit finding.

Matatandaang ayon sa mga rekord ng Commission on Audit (COA), nagastos ng Office of the Vice President (OVP) ang ₱125 milyong confidential fund allocation nito noong Disyembre 2022 sa loob ng 11 araw. | via Jenn Patrolla (Patrol 38)

Sa nagpapatuloy na direct examination ng impeachment trial laban kay Vice President Sara Duterte, sumentro na ang House prosecution sa pangunguna ni Private Prosecutor Atty. Lorna Kapunan sa pagtalakay ng maling paggamit ng pondo ng Department of Education sa ilalim ng pamamahala ng bise presidente.

Napuna ni Kapunan ang expenditures and counter insurgency program ng DepEd.

Ibinulgar ni dating COA-ICFAO state auditor Roderick Wamil na aabot sa P10 million ang inilaan na pondo sa programa para sa unang quarter ng taong 2023.

Aabot naman sa 10 million, 75,000 pesos para sa second quarter at 10 million, 125,000 pesos naman ang inilagak para sa 3rd quarter ng taong 2023 ng DepEd.

Binigyang diin ni Wamil na ang lahat ng isinumiteng liquidation documents ng OVP ay kulang ng supporting documents at nakabatay lamang sa mga acknowledgement receipts.

Ipinakita rin sa paglilitis ang disbursement vouchers ng DepEd kung saan, ang unang voucher ay para sa unang quarter ng taong 2023; ang ikalawa ay para sa 2nd quarter ng 2023; habang wala o hindi naman natukoy kung anong quarter nakalaan ang nasabing voucher.

Kinumpirma ni Wamil na ang tatlong disbursement vouchers ay pirmado ng bise presidente.

Sa gitna ng paglilitis, nakapagbiro pa si Kapunan kung saan, hiniling niya kay Wamil na basahin ang mga nakalagay sa disbursement vouchers dahil “Andy Lim.”

Kung matatandaan sa Day 11 ng impeachment trial kahapon, isa ang pangalang “Andy Lim” sa mga pangalang nabanggit sa paglilitis na tumanggap ng acknowledgement receipts para sa purchased of information na nagkakahalaga ng P50,000. | Geli Mendez (Patrol 30)

Planong ipasubpoena ng House prosecution panel ang pangalang lumabas sa acknowledgement receipts na si “Mary Grace Piattos.”

Ito ang kinumpirma sa ambush interview kanina ni Private Prosecutor Atty. Lorna Kapunan na kanilang ipadadala ang subpoena sa Office of the Vice President.

Kaugnay parin ito sa pagtalakay ng Article 1 na tumutukoy sa maling paggamit ng confidential funds ni Vice President Sara Duterte.

Naniniwala si Kapunan na tila pang-i-scam ang ginawa sa mga pangalang tumanggap ng acknowledgement receipts kabilang na sina Mary Grace Piattos; Henri Piatos; Nova Santos; Mico Harina; Janice Marine Revilla; Patty Ting; Andy Lim; Alejandro Pikit; Fionna Biong; Sisfronio Balzac; at Gabriel Bisaya.

Para kay Kapunan, hindi natutuwa ang prosecution panel sa mga pangalang ginawa o lumagda sa dokumento na hindi naman pala totoo. | Geli Mendez (Patrol 30)

Para kay House Impeachment Trial Spokesperson Zia Alonto Adiong, ang mabilisang pag-encash at agarang paggastos sa P125 million confidential funds ng Office of the Vice President (OVP) ay nagpapakita umano ng pagtatangkang gamitin sa mali ang naturang pondo.

Ayon kay Adiong, bukod sa hindi pangkaraniwang bilis ng paggalaw ng pera, hindi rin tumutugma ang mga petsa sa mga dokumentong isinumite sa liquidation ng OVP.

Bukod pa dito, hindi rin nito nasunod ang ipinatutupad na joint circular ng Commission on Audit (COA).

Nauna nang tumestigo ang mga dating opisyal ng Landbank of the Philippines na ang P125 million treasury check ng OVP ay na-encash nang buo matapos ang advance coordination ng tanggapan sa bangko upang maihanda ang malaking halaga ng salapi.

Dagdag pa ni Adiong, nakita rin na kulang sa detalye ang physical at financial plan ng OVP, kaya nahirapan ang mga auditor ng COA na matukoy kung naaayon sa itinakdang layunin ang paggamit ng pondo.

Samantala, sinabi naman ni House Prosecutor Joel Chua na may mga acknowledgement receipt na ginamit bilang katwiran sa paggastos na may mga petsang November 2022 at December 2023, kahit ang confidential funds ay inilaan lamang para sa huling bahagi ng December 2022.

Ngayong Day 12 ng impeachment trial, nagpapatuloy ang direct examination ng House prosecutors sa pangunguna ni Private Prosecutor Atty. Lorna Kapunan sa witness stand na si Roderick Wamil, ang dating state auditor ng COA-ICFAO.

Sa pagsisimula ng impeachment trial, humiling si Kapunan ng “recess” sa Senate Impeachment Court para sa maayos na paglalatag ng acknowledgement receipts sa Article 1 ng Articles of Impeachment na may kaugnayan sa maling paggamit ng confidential funds.

Natalakay sa paglilitis yung proseso ng disbursement voucher para sa withdrawal ng cash advance ng OVP kung saan, ipinakita sa impeachment court ang 1st, 2nd, at 3rd quarter ng taong 2023 na nakapangalan kay Gina Acosta, ang dating special disbursing officer ng OVP at may lagda ni Vice President Sara Duterte. | Geli Mendez (Patrol 30)