DWIZ 882

Para kay House Impeachment Trial Spokesperson Zia Alonto Adiong, ang mabilisang pag-encash at agarang paggastos sa P125 million confidential funds ng Office of the Vice President (OVP) ay nagpapakita umano ng pagtatangkang gamitin sa mali ang naturang pondo.

Ayon kay Adiong, bukod sa hindi pangkaraniwang bilis ng paggalaw ng pera, hindi rin tumutugma ang mga petsa sa mga dokumentong isinumite sa liquidation ng OVP.

Bukod pa dito, hindi rin nito nasunod ang ipinatutupad na joint circular ng Commission on Audit (COA).

Nauna nang tumestigo ang mga dating opisyal ng Landbank of the Philippines na ang P125 million treasury check ng OVP ay na-encash nang buo matapos ang advance coordination ng tanggapan sa bangko upang maihanda ang malaking halaga ng salapi.

Dagdag pa ni Adiong, nakita rin na kulang sa detalye ang physical at financial plan ng OVP, kaya nahirapan ang mga auditor ng COA na matukoy kung naaayon sa itinakdang layunin ang paggamit ng pondo.

Samantala, sinabi naman ni House Prosecutor Joel Chua na may mga acknowledgement receipt na ginamit bilang katwiran sa paggastos na may mga petsang November 2022 at December 2023, kahit ang confidential funds ay inilaan lamang para sa huling bahagi ng December 2022.

Ngayong Day 12 ng impeachment trial, nagpapatuloy ang direct examination ng House prosecutors sa pangunguna ni Private Prosecutor Atty. Lorna Kapunan sa witness stand na si Roderick Wamil, ang dating state auditor ng COA-ICFAO.

Sa pagsisimula ng impeachment trial, humiling si Kapunan ng “recess” sa Senate Impeachment Court para sa maayos na paglalatag ng acknowledgement receipts sa Article 1 ng Articles of Impeachment na may kaugnayan sa maling paggamit ng confidential funds.

Natalakay sa paglilitis yung proseso ng disbursement voucher para sa withdrawal ng cash advance ng OVP kung saan, ipinakita sa impeachment court ang 1st, 2nd, at 3rd quarter ng taong 2023 na nakapangalan kay Gina Acosta, ang dating special disbursing officer ng OVP at may lagda ni Vice President Sara Duterte. | Geli Mendez (Patrol 30)

Kinumpirma ng prosecution witness na si dating State Auditor Roderick Wamil na lumabag ang Office of the Vice President sa Joint Circular Number 2025-01 ng Commission on Audit dahil sa kakulangan ng mga isinumiteng dokumento kaugnay sa confidential funds.

Sa testimonya ni Wamil, kaniyang iginiit na “kulang-kulang” ang supporting documents ng OVP para sa naging travel funds ni Vice President Sara Duterte na aabot sa sampung milyong piso; at acknowledgement receipts lang anya ang isinumite ng OVP at walang supporting documents gaya ng sales at official receipts.

Paliwanag ni Wamil, dapat nakasaad ang accomplishment reports at ang physical at financial plan ng OVP, alinsunod sa Joint Circular, kung saan ginamit ang confidential funds na inilaan para sa kada programa at iba pang aktibidad dahil ito ang magiging basehan para sa disbursement ng ahensya.

Ginawa rin ni Wamil ang tabulation noong nagsimulang isumite ng OVP ang kanilang mga acknowledgement receipts na aabot sa labing siyam na pahina kung saan, hindi tumugma sa inilabas na 125-million-peso cash advance ng COA ang isinumiteng acknowledgement receipts ng OVP na umabot sa mahigit 125-point-15 million pesos.

Samantala, lumabas din sa impeachment trial ang ilang pangalan na nakatanggap ng pondo mula sa OVP kabilang na sina Nova Santos; Mico Harina; Janice Marine Revilla; Patty Ting; Andy Lim; Alejandro Pikit; Fiona Biong; Sisfronio Balzac; at Gabriel Bisaya.  l mula sa panulat ni Jordan Gutierrez

Makikipagpulong na ang Land Transportation Franchising and Regulatory Board sa iba pang ahensya ng pamahalaan bago magpasya sa mga nakabinbing petisyon para sa taas-pasahe.

Ayon kay LTFRB Chairman Vigor Mendoza, iimbitahan sa susunod na pagdinig ang Department of Economy, Planning and Development, Department of Labor and Employment, at Department of Energy upang masuri ang magiging epekto ng anumang fare increase sa mga commuter at driver.

Hihingin anya ang pagsusuri ng DEP-DEV sa epekto ng dagdag-pasahe sa ekonomiya, ang assessment ng DOLE sa kalagayan ng mga manggagawa sa transportasyon, at ang ulat ng DOE hinggil sa galaw ng presyo ng langis.

Nilinaw ni Chairman Mendoza na layunin ng LTFRB na makahanap ng solusyong makatutulong sa sektor ng pampublikong transportasyon nang hindi mabigat ang epekto sa inflation at purchasing power ng publiko. l mula sa panulat ni Jordan Gutierrez

Tataas ang singil sa kuryente ngayong Agosto matapos aprubahan ng Energy Regulatory Commission ang pagtaas ng FIT-ALL o Feed-In Tariff Allowance.

Pinayagan ng ERC ang National Transmission Corporation (TransCo) na itaas ang FIT-ALL rate ng 13-centavos kada kilowatt-hour, kaya 33-centavos na ang dagdag-singil mula sa dating 20-centavos at ipatutupad ito sa billing period ngayong buwan.

Dahil dito, ang mga kabahayang kumokonsumo ng 500 kWh bawat buwan ay inaasahang magbabayad ng nasa 168-pesos para lamang sa FIT-ALL charge.

Ipinapataw ang FIT-ALL sa lahat ng on-grid electricity consumers upang pondohan ang insentibo para sa mga qualified renewable energy projects tulad ng solar, wind at small hydro power plants.

Ayon sa TransCo, kinailangan ang dagdag-singil dahil nagkaroon ng kakulangan sa pondo ang FIT-ALL Fund, na nagtala ng negatibong working capital ng mahigit 322-million pesos noong Mayo a-syete.

Nilinaw naman ng ERC na pansamantala lamang ang pag-apruba at maaari pa itong baguhin, kumpirmahin, o iutos na i-refund depende sa magiging pinal na desisyon matapos ang mga pampublikong pagdinig.  l mula sa panulat ni Jordan Gutierrez

Magsusumite ang Land Transportation Franchising and Regulatory Board (LTFRB) ng rekomendasyon sa Department of Transportation (DOTr) para sa pansamantalang dagdag-pasahe sa lahat ng public utility vehicles habang nagpapatuloy ang pagdinig sa mga petisyon para sa fare hike.

Ayon kay LTFRB Chairman Vigor Mendoza, kasalukuyang bine-verify ng ahensya ang datos na iniharap ng mga transport group para matukoy ang nararapat na provisional fare increase batay sa bilang ng mga pasahero at aktuwal na kita ng mga driver.

Isinumite na rin anya ng LTFRB sa Malacañang ang panukalang 20-pesos kada litrong fuel subsidy para sa lahat ng mga PUV sa loob ng isang buwan, na mangangailangan ng nasa 4.5 billion pesos na pondo.

Nilinaw din ni Chairman Mendoza na pitong porsyento na lamang ng kasalukuyang pondo para sa 10-pesos kada litrong fuel subsidy ang natitira at inaasahang tatagal lamang hanggang Agosto a-kinse, kaya inaasahan ang agarang desisyon ng pamahalaan ngayong linggo.  l mula sa panulat ni Jordan Gutierrez