DWIZ 882

Ipinagtataka ng isang public interest at human rights lawyer ang tila pag-target ng Ombudsman kay dating House Speaker Martin Romualdez at ang paggamit ng mga testimonyan na ito mismo ang nagdeklara noon na hindi kapani-paniwala.

Partikular na kinuwestyon ni Atty. Antonio “Audie” Bucoy ang paggamit ng Ombudsman ng mga salaysay ng walong dating bodyguard ni dating Congressman Zaldy Co laban kay Romualdez kahit ibinasura na ito dati ng tanodbayan maging ng Department of Justice.

Iginiit ni Atty. Bucoy na pabor siyang papanagutin sa batas ang mga opisyal pero dapat nakabatay ito sa mapagkakatiwalaan at matitibay na mga ebidensya.

Binigyang-diin pa ng nasabing public interest at human rights lawyer na tila binabaluktot ng Ombudsman ang kinakailangang pamantayan ng ebidensya sa mga imbestigasyon upang maituon aniya ang kaso laban sa dating House Speaker.

Nauna nang inihayag ni Leyte 1st District Rep. Romualdez na patas na pagtrato sa kaso lamang ang tanging hinihingi niya sa Ombudsman.

Binatikos ng House prosecution panel ang muling hindi pagdalo ni Vice President Sara Duterte sa ikalimang linggo o ika-11 araw ng kanyang impeachment trial sa Senado.

Ayon kay House prosecutor Terry Ridon, hanggang ngayon ay wala pa rin ang presensya ng bise presidente sa loob ng Senate impeachment court.

Para kay Ridon, mahalagang personal na harapin ni VP Sara ang paglilitis at ang mga alegasyong inihain laban sa kanya.

Sa kanyang pahayag, sinabi ni Ridon: “Nasaan man po kayo sa mundo, Madam Vice President, harapin po natin ang paglilitis, harapin natin ang katotohanan.”

Matatandaang nagpapatuloy ang presentasyon ng ebidensya ng House prosecution panel sa impeachment trial laban sa bise presidente.

Lumabas sa isang survey ng OCTA na apat sa sampung Pilipino o katumbas ng 43 porsyento ng mga Pilipino ang naniniwala na bribery o panunuhol ang pinakamabigat na alegasyon sa impeachment trial laban kay Vice President Sara Duterte.

Pumangalawa rito ang maling paggamit ng confidential funds na may 28 porsyento.

Sumunod ang hindi maipaliwanag na yaman at pagbabanta laban kay Pangulong Ferdinand Marcos Jr. na kapwa may 10 porsyento.

Habang 8 porsyento naman nagsabing hindi nila matukoy kung alin ang pinakamabigat na alegasyon.

Isinagawa ang naturang survey noong Hulyo 4 hanggang 11 sa pamamagitan ng face-to-face interviews sa 1,200 adult respondents.   l mula sa panulat ni Reianne Antiquina

Inatasan ng Energy Regulatory Commission (ERC) ang Manila Electric Company o Meralco na ibalik ang nasa ₱9.5 bilyong halaga sa mga consumer dahil sa labis na nakolekta noong 2025.

Batay sa desisyon na inilabas ng ERC, lumalabas na katumbas ito ng ₱0.3449 kada kilowatt-hour na kabawasan sa bill sa loob ng anim na buwan.

Inaasahang makatatanggap ng mas malaking refund ang mga residential customer na aabot sa ₱0.5861 kada kilowatt-hour.

Ayon kay ERC Chairman Francis Saturnino Juan, agad na ipatutupad ang refund sa oras na matanggap ng kumpanya ang opisyal na desisyon ng komisyon.

Samantala, inaprubahan din ng ERC ang hirit ng Meralco na singilin sa mga consumer ang ₱8.71 bilyon na kulang na singil sa generation, transmission, at government charges mula taong 2011 hanggang 2022.

Gayunman, dahil tatlong taong babawiin sa mga ang under-recoveries, papatak lamang ang dagdag-singil sa ₱0.08 kada kilowatt-hour bawat buwan.  l mula sa panulat ni Reianne Antiquina

Sinimulan na ng House prosecution panel ang direct examination sa nagpapatuloy na impeachment trial laban kay Vice President Sara Duterte.

Si private prosecutor Atty. Lorna Kapunan ang nanguna sa panig ng prosekusyon sa pagtatanong sa witness stand kay Roderick Wamil, ang dating state auditor ng COA-ICFAO.

Sa pagsisimula ng impeachment trial, tinanong ni Kapunan si Wamil kung ano ang pagkakaiba ng confidential funds at intelligence funds.

Ayon kay Wamil, batay sa kanyang 11 taong panunungkulan sa COA, ang intelligence funds sa ilalim ng Joint Circular No. 2015-01 ay lumpsum appropriations o pondong inilaan ng pamahalaan na hindi detalyado kung paano ito gagastusin.

Samantala, ang confidential funds naman ay lumpsum appropriations ng concerned agency para sa kanilang confidential expenses.

Kinumpirma ni Wamil na siya ang nagsagawa ng audit sa liquidation of confidential expenditures ng Office of the Vice President (OVP) para sa ikaapat na quarter ng 2022, gayundin sa una, ikalawa, at ikatlong quarter ng 2023.

Siya rin ang nagsagawa ng audit sa liquidation of confidential expenditures ng DepEd para sa una, ikalawa, at ikatlong quarter ng 2023.

Ayon sa testigo, napansin niyang kulang ang mga dokumentong isinumite ng OVP at DepEd, dahilan upang magrekomenda siya ng Audit Observation Memorandum para sa 2022 at 2023 audits ng DepEd.

Bukod dito, inirekomenda rin ni Wamil ang pagpapalabas ng Notice of Suspension sa OVP noong 2023.

Ayon pa sa kanya, sa matagal niyang panunungkulan sa ahensya, walang confidential funds sina dating Vice President Jejomar Binay at dating Vice President Leni Robredo.

Aniya, si VP Sara lamang ang bise presidente na kanyang na-audit kaugnay ng confidential funds mula nang magsimula siya sa COA-ICFAO noong 2014.

Kabilang dito ang ₱125 million kada quarter ng OVP na may kabuuang ₱500 million, at ang ₱37.5 million na cash advances na may kabuuang ₱112.5 million.

Upang ma-liquidate ang naturang cash advances, sinabi ni Wamil na kinakailangang magsumite ang OVP at DepEd ng mga dokumento kabilang ang liquidation reports, disbursement vouchers, at physical and financial plans.

Nang tanungin ni Kapunan kung bakit sa tatlong nabanggit na bise presidente ay si VP Sara lamang ang kanyang na-audit, ipinaliwanag ni Wamil na walang appropriations para sa confidential funds sina dating VP Binay at dating VP Robredo.

Aniya, tanging si VP Sara lamang ang nagkaroon ng appropriations para sa confidential funds.