Inihain ni Marikina Rep. Marcelino Teodoro ang House Bill 10461 o Electricity Consumer System Loss Relief Bill na naglalayong alisin ang system loss sa mga singil sa kuryente at ipagbawal ang paniningil ng 12% value-added tax o VAT sa mga hindi naihahatid na kuryente.
Sa ilalim ng panukala, aamyendahan ang Electric Power Industry Reform Act o EPIRA at ang National Internal Revenue Code upang matiyak na ang babayaran lamang ng mga consumer ay ang aktuwal na kuryenteng kanilang nagamit.
Para kay Teodoro, hindi makatuwirang ipasa sa mga consumer ang system loss na hindi naman nila nakonsumo, at lalo hindi makatao na patawan pa sila ng VAT.
Giit ng mambabatas, panahon nang protektahan ang mga consumer laban sa hindi makatarungang singil habang isinusulong ang modernisasyon ng power distribution system sa bansa.
Ang panukala ni Teodoro ang pinakahuling hakbang sa Kamara upang alisin ang system loss sa electricity bills kung saan, una nang naghain ng kaparehong panukala sina House Speaker Faustino “Bojie” Dy III at House Majority Leader Sandro Marcos, kasunod ng panawagan ni Pangulong Ferdinand Marcos Jr. sa kanyang SONA 2026. | mula sa panulat ni Geli Mendez
