Binigyang-diin ng House Prosecution Panel na hindi ang tiyempo ng paglabas ng confidential funds ang pangunahing isyu sa impeachment trial ni Vice President Sara Duterte, kundi kung posible bang magastos ang P125 million pondo sa loob lamang ng labing-isang araw.
Matatandaang pinatotohanan ni dating state auditor ng COA-ICFAO na si Roderick Wamil na ang unang P125 million na confidential funds ng Office of the Vice President ay nagastos mula December 21 hanggang 31, 2022, kahit nakalaan ito para sa buong ikaapat na quarter ng taon.
Ayon kay Prosecution Legal Spokesperson Atty. Benjamin Tolosa Jr., ang mahalagang tanong ay kung makatotohanan at naaayon ba sa mga alituntunin ang paggastos ng naturang halaga sa loob ng naturang panahon.
Dagdag pa ni Tolosa, tungkulin ng OVP na ipaliwanag kung paano ginamit ang pondo at patunayang ito ay ginastos sa mga layuning pinahihintulutan ng umiiral na Joint Circular.
Dapat aniyang alalahanin na sa loob ng covered period ay may mga holiday gaya ng Pasko at Bagong Taon.
Para naman kay Trial Spokesperson Renee Co, ikinagulat ng publiko ang bilis ng paggastos sa pondo, at iginiit na bukod dito ay may iba pang isyung inilarawan sa paglilitis bilang “physical impossibility.” – mula sa panulat ni Geli Mendez
