Kinuwestiyon ni political analyst Dr. Froilan Calilung ang muling pagbubukas sa usapin ng 16-vote threshold sa impeachment trial ni Vice President Sara Duterte.
Ayon kay Calilung, may nakatakda nang 16-vote threshold sa simula ng impeachment proceedings, ngunit bigla umano itong muling binubuksan ngayong nahaharap ang panig ng administrasyon sa kakulangan sa bilang.
Binanggit din niya na may mga senador na sinasabing haharap sa mga kaso ngunit matapos lumipat sa majority bloc ay hindi na nabanggit ang mga naturang kaso. Kasabay nito, ang ilang senador naman sa kabilang panig ay unti-unting nawawala sa political landscape dahil sa mga kasong kinakaharap.
Aniya, tila hindi naging malakas ang dating sa publiko ng impeachment proceedings, na aniya ay hindi rin nagresulta sa malinaw na negatibong epekto sa Bise Presidente.
Para kay Calilung, maaaring magbigay ito ng impresyon na ina-adjust ang proseso para sa political convenience.
Binigyang-diin niya na mas malaki ang usapin dahil may epekto ito sa pagtingin sa Konstitusyon bilang pinakamataas na batas ng bansa.
“Being the highest law of the land, tapos ngayon isusurconvent mo just to accommodate political conveniences. Problematic po talaga ito para sa atin,” dagdag pa ni Calilung.
