Inaasahan na ng House prosecution team ang sunod-sunod na pagtutol ng defense team ni Vice President Sara Duterte sa muling pagbabalik ng impeachment trial, sakaling sumalang na at ma-cross-examine ang kauna-unahan nilang witness sa November 9.
Ayon kay House Prosecution Adviser at Trial Spokesperson Robert Ace Barbers, paulit-ulit nang tinututulan ng kampo ng pangalawang pangulo ang mga ebidensiyang iniharap ng prosekusyon kaugnay ng Article II ng impeachment complaint.
Iginiit ni Barbers na mabibigat ang mga dokumentong hawak nila na nagmula sa mga bangko at ahensiya ng gobyerno gaya ng BIR, SEC at AMLC kaya mahirap umano itong pabulaanan.
Kaugnay ito ng alegasyon ng hindi maipaliwanag na yaman ni VP Sara at hindi kumpletong deklarasyon ng kaniyang mga ari-arian at interes sa negosyo sa kaniyang Statement of Assets, Liabilities, and Net Worth o SALN.
Iginiit ni Barbers na mahirap itanggi ang mga dokumentong ito, lalo’t ang mga SALN ay mismong ang bise presidente ang naghanda at lumagda.
Inaasahan din ng prosekusyon na mababawasan ang bilang ng mga testigo ng depensa na magsisimulang magharap ng ebidensiya sa susunod na linggo.
Ito’y dahil nabawasan na ng tatlo ang mga artikulo at isang impeachment complaint na lamang ang isinusulong ng prosekusyon. | Sa panulat ni Geli Mendez (DWIZ Patrol)

