Iginiit ng isang public interest at human rights lawyer na wala nang kredibilidad si dating DPWH Secretary Manuel Bonoan at ang tinaguriang “Maleta Boys” para magsilbing state witnesses sa imbestigasyon ng flood control scandal.
Ayon kay Atty. Antonio Zoleta Bucoy, batay sa testimonya ni dating DPWH Usec. Roberto Bernardo, na isang state witness ng Ombudsman, tumanggap si Bonoan ng 15-percent kickback mula sa mga flood control project, na umaabot sa 3-billion pesos sa loob ng apat na taon.
Ipinunto ni Atty. Bucoy na si Bonoan ang pangunahing namahala sa pagbuo ng budget ng DPWH, pagpapatupad ng mga proyekto, paggawad ng kontrata sa mga contractor at pagpapalabas ng pondo, kaya’t hindi anya ito maaaring ituring na state witness.
Samantala, nanindigan si Atty. Bucoy na wala na ring kredibilidad ang mga tinatawag na “Maleta Boys,” na nagpakilalang mga dating bodyguards ni dating Congressman Zaldy Co.
Iginiit ng abogado na ang mga salaysay ng mga Maleta Boys ay kinuwestyon at ibinasura na ng Office of the Ombudsman, gayundin ng Senate Blue Ribbon Committee at National Bureau of Investigation dahil sa magkakasalungat na pahayag at isinumiteng ebidensya. l mula sa panulat ni Jordan Gutierrez
