Kalaboso ang isang albularyo sa General Trias City, Cavite matapos makumpiskahan ng tatlong hindi lisensiyadong baril sa isinagawang operasyon ng Criminal Investigation and Detection Group (CIDG).
Ayon sa CIDG, isinagawa ang operasyon matapos makatanggap ng impormasyon na umano’y ipinagmamalaki ng suspek ang kaniyang mga baril habang nag-aalok ng mga anting-anting at hinihikayat ang mga kliyente na sumali sa grupong “Haring Bakal.”
Batay sa video na hawak ng CIDG, ginagamit umano ng suspek ang pagpapaputok ng baril upang patunayang mabisa ang mga anting-anting na kaniyang ibinebenta.
Nahaharap ang suspek sa kasong paglabag sa Republic Act No. 10591 o Comprehensive Firearms and Ammunition Regulation Act.
