Papatawan ng dagdag na buwis ang mga kargamentong papasok sa Manila North Harbor simula sa susunod na buwan.
Ito ay matapos na aprubahan ng Philippine Ports Authority o PPA ang dagdag na 24 porsyentong buwis para sa cargo holding tariff.
Ayon sa Manila North Harbor Port Incorporated, ang pagtataas ay para matugunan ang mas mataas na gastusin sa operations cost.
Ipatutupad ang dagdag na buwis sa loob ng tatlong taon na tig-walong porsyento na sisimulan sa Hulyo hanggang sa 2019.
Samantala, pinalagan ng grupo ng mga consumer at negosyante ang pagpapataw ng dagdag na buwis sa mga kargamentong papasok sa Manila North Harbor.
Ayon kay Rodolfo Javella, Pangulo ng United Filipino Consumers and Commuters, siguradong ipapataw sa mga mamimili anuman ang maging pagtaas sa singil sa mga pumapasok na produkto.
Aniya, nakapag-aalala ito dahil posibleng sumabay ito sa inaasahang pagtaas naman ng singil sa mga produktong petrolyo kapag naisabatas ang tax reform law.
Hindi rin sang-ayon dito si Philippine Exporters Confederation Incorporated President Sergio Ortiz – Luis Junior.
Aniya, tataas ang presyo ng mga raw materials na aangkatin para gamitin sa export products kaya’t magmamahal din ang presyo nito kapag dinala na sa ibang bansa.
Kung mangyayari ito, posible umanong mahirapan ang mga export product na makipag kompentensya sa presyo ng ibang produkto sa ibang bansa.
By Rianne Briones
Opisyal nang sisimulan ng DOJ o Department of Justice ang reinvestigation sa multi-bilyong pisong pork barrel fund scam.
Ito ay matapos na ipag-utos ni Justice Secretary Vitaliano Aguirre ang reorganization sa Task Force PDAF (Priority Development Assistance Fund) para sa muling pagbuhay sa imbestigasyon.
Ayon kay Aguirre, itinalaga niya si Undersecretary Antonio Kho para pangunahan ang grupo ng mga prosecutor at NBI agents sa pagsusuri sa mga ebidensyang isusumite ni pork barrel queen Janet Lim Napoles.
Ang naturang team ang siyang papalit sa task force ng NBI na binuo ni noo’y Justice Secretary Leila de Lima na nagsagawa ng fact finding investigation na naging dahilan para makulong ang mga senador na si Juan Ponce Enrile, Jinggoy Estrada at Bong Revilla.
Siniguro ni Aguirre na sa kanilang gagawing imbestigasyon ay hindi magkakaroon ng selective justice tulad nang nangyari noong nakaraang administrasyon.
By Rianne Briones
Inilarga na ng iba pang kumpanya ng langis ang rollback sa presyo ng kanilang mga produkto.
Unang nagpatupad ang Phoenix Petroleum Philippines ng bente singko sentimos (P0.25) na tapyas sa kada litro ng diesel habang kwarenta sentimos (P0.40) sa gasolina, epektibo alas-6:00 kahapon ng umaga.
Alas-12:01 kaninang hatinggabi naman ng Flying V at Seaoil ang trenta’y singko sentimos (P0.35) na rollback sa gasolina habang bente sentimos (P0.20) sa diesel at kerosene.
Sabay-sabay ding ipinatupad ng Eastern Petroleum, PTT, Petron, Shell at Jetti ang kahalintulad na bawas presyo, epektibo alas-6:00 kanina.
By Drew Nacino
Handa ang pamilya ni Cristine Reyes na makinig at dumamay sa aktres sa kanyang pinagdadaanang depresyon matapos siyang matalo kay Wacky Kiray sa reality show na I Can Do That ng Kapamilya network.
Ito ang naging pahayag ni Ara Mina kasunod ng pahayag ni Cristine na pakiramdam niya siya ay nag-iisa at wala siyang makausap.
Ayon kay Ara, bagama’t hindi sila madalas na nagkakausap ng kanyang kapatid simula noong magkaroon na ito ng sariling pamilya dahil nanirahan na ito malayo sa kanilang magkakapatid.
Ngunit sinabi ni Ara na hindi mapapawi ng distansya ang kanilang koneksyon bilang isang pamilya kaya naman isang text o tawag lamang aniya ni Cristine ay handang-handa siyang damayan ito.
By Rianne Briones
Photo: cristinereyes / Instagram
Lusot na sa ikatlo at huling pagbasa sa Kamara ang panukalang batas na nagpapataw ng mas mabigat na parusa sa hindi tamang pag-awit ng Lupang Hinirang.
Sa ilalim ng House Bill 5224, tinaasan na sa 50 hanggang 100,000 Piso ang multa para sa sinumang hindi mai-aawit ng maayos ang national anthem mula sa dating 5 hanggang 20,000 Pisong multa.
Ibig sabihin, mahigpit na susundin ng lahat ang tamang pagbigkas ng mga salita at pag-awit sa tamang tono ng Lupang Hinirang na itinatadhana ng Flag and Heraldic Code of the Philippines.
Layon nitong mai-ukit sa puso’t kamalayan ng mga Pilipino ang diwang makabansa at maituwid ang mga maling kasanayan at paglapastangan sa watawat at pabansang awit ng Pilipinas.
By: Jaymark Dagala
Buhay pa si Fr. Chito Suganob na isa sa mga binihag ng teroristang Maute group na kumubkob sa Marawi City nuong isang buwan.
Ito ang kinumpirma ni joint task force Marawi Spokesman Lt/Col. Jo-Ar Herrera makaraang mamataan ito ng tropa ng pamahalaan sa kasagsagan ng opensiba kontra sa mga terorista.
Maliban sa pari, sinabi ni Herrera na mayruon pang 100 bihag na sibilyan ang hawak ngayon ng Maute kung saan, binibigyan ang mga ito ng armas upang makipaglaban sa puwersa ng pamahalaan.
Kasunod nito, inihayag din ni Herrera ang ginagawang pagsunog ng mga terorista sa mga bahay at ang paggamit sa mga bihag nito bilang human shield na pinagtatanim pa ng booby trap at I-E-D o Improvised Explosive Device sa daraanan ng militar.
By: Jaymark Dagala
Hinimok ng MMDA o Metro Manila Development Authority ang motoristang si Ronan Pastrana na humarap at maghain ng pormal na reklamo.
Ito’y makaraang maging viral sa social media ang video ni Pastrana hinggil sa umano’y pamumunit ng traffic constable na kinilalang si Gilbert Rafal sa kaniyang lisensya.
Sa panayam ng programang “Balita Na, Serbisyo Pa” kay MMDA Spokesperson Celine Pialago, batay sa isinumiteng affidavit ni Rafal, nagpakilala umanong pulis si Pastrana at sinubukan pa umano siya nitong suhulan.
Dahil hindi pumayag ang constable na si Rafal, dito na sinimulang videohan ni Pastrana ang kaniyang paninita kay Rafal.
Kasunod nito, nilinaw ni Pialago na may ipinatutupad na one strike policy ang MMDA upang masugpo ang katiwalian sa kanilang hanay.
Gayunman, hindi aniya sila mangingiming kasuhan si Pastrana kung mapatutunayang may pang-aabuso ito sa kaniyang karapatan bilang mamamayan laban sa isang lingkod bayan.
By: Jaymark Dagala
Hindi malabong pamarisan ng ibang armadong grupo sa Mindanao ang ginawang pagkubkob ng Maute Terror group sa Marawi City.
Ito’y ayon sa military historian at security analyst na si Prof. Jose Antonio Custodio ay dahil sa maraming nakikisimpatiya sa Maute sa ibang lugar sa Mindanao at naghahanap ng pagkakataon para malusutan ang puwersa ng pamahalaan.
Dahil dito, hinimok ni Custodio ang pamahalaan na pag-aralang maigi ang mga naging istratehiya ng mga armado gayundin ang kanilang mga naging operasyon upang hindi na maulit at kumalat pa sa ibang panig ng bansa ang nasabing pag-atake.
Sa panig naman ng militar, sinabi ni westmincom o WESTERN Mindanao Command Chief Lt/Gen. Carlito Galvez na pinag-aaralan nila ang galaw ng mga kalaban upang mabantayan ang kanilang nasasakupan mula sa iba pang mga grupo.
By: Jaymark Dagala / Aya Yupangco
