Kumpiyansa ang AFP o Armed Forces Of The Philippines na bibigay na anumang araw ang mga teroristang Maute na nagkukuta ngayon sa Marawi City.
Ito’y makaraang kumpirmahin sa DWIZ ni WESTMINCOM o Western Mindanao Chief Lt/Gen. Carlito Galvez na nagpapatayan na umano ang mga terorista na naiwan sa lungsod.
Posible aniya kasi na hindi inaasahan ng mga nasa Marawi na tatagal ang bakbakan o di kaya’y hindi naibigay ang ipinangakong pera sa kanila.
Dahil dito, malaki na rin ang posibilidad ayon kay Galvez na inabandona na ng tinaguriang ISIS Emir at Abu Sayaf Leader na si Isnilon Hapilon ang kaniyang mga tauhan na nakikipag-bakbakan sa tropa ng military.
By: Jaymark Dagala / Jonathan Andal
Pinalagan ng Malakaniyang ang puna ng mga kritiko ng administrasyon nang bansagang “Epic Failure” ang unang taon ng panunungkulan ni Pangulong Rodrigo Duterte.
Sa harap na rin ito ng malalang sitwasyon ng trapiko sa Metro Manila, tumitinding problema sa peace and order at ang dumaraming bilang ng mga Pilipinong walang trabaho.
Ayon kay Presidential Communications Secretary Martin Andanar, mabilis ang naging pag-aksyon ng pamahalaan para resolbahin ang malalaking problema ng bansa tulad ng droga, krimen at katiwalian kung titingnan sa positibong pananaw.
Malaking pagbabago na ring maituturing ang mabilis na pagkawala ng tanim-bala sa naia, pagbalangkas ng Freedom of Information sa ehekutibo, pagpapatupad ng smoking ban at ang pagreregulate sa paggamit ng paputok.
Sa usapin naman ng trapiko, binigyang diin ni Andanar na umaandar na ang mga proyektong pang-imprastraktura at gumagawa na rin ng hakbang ang mga kinauukulan upang maibsan ito sa lalong madaling panahon.
By: Jaymark Dagala / Aileen Taliping
Tiniyak ng Malakaniyang na hindi nasayang ang pera ng bayan sa mga naging biyahe ni Pangulong Rodrigo Duterte.
Ito ang inihayag ng Palasyo kasunod na rin ng mga puna at batikos ng mga kritiko ng Pangulo na naglagay sa Pangulo bilang most travelled President sa unang taon pa lamang nito sa puwesto.
Ayon kay Presidential Communications Secretary Martin Andanar, mahigit sa 35 Bilyong Dolyar ang nakuhang investment ng Pangulo sa kaniyang biyahe sa ASEAN gayundin sa China, Japan, Russia, Peru at New Zealand.
Batay aniya sa cost analysis ng Department of Finance 1,000 Piso ang naiuuwi ng pangulo sa bawat pisong ginagastos nito sa kaniyang biyahe.
Buwelta pa ni Andanar sa mga kritiko ng Pangulo, hindi maitatanggi na si Pangulong Duterte na ang nakapag-uwi ng pinakamalaking investment sa unang taon pa lamang ng kaniyang termino kumpara sa mga nakalipas na Pangulo ng bansa.
By: Jaymark Dagala / Aileen Taliping
Magpapalabas ng dokumentaryo ang Presidential Communications Office para sa unang taon ng administrasyong Duterte sa Biyernes, Hunyo 30.
Ayon kay Communications Secretary Martin Andanar, laman ng naturang dokumentaryo ang mga nagawa ng administrasyon sa nakalipas na isang taon.
Maliban sa video documentary na ipalalabas sa telebisyon ng bayan at iparirinig sa Radyo Pilipinas, ilalathala rin ang ulat sa bayan ng Pangulo sa PNA o Philippine News Agency.
Sinabi pa ni Andanar na iikot sa kampaniya kontra droga, krimen at katiwalian ang mga lalamanin ng nasabing ulat gayundin ang pinapalutang na EJK o extra – judicial killings ng mga kritiko ng Pangulo.
By: Jaymark Dagala / Aileen Taliping
Inaasahang gagaan na ang biyahe ng may 350,000 pasahero pagsapit ng taong 2021 .
Ito’y sa sandaling matapos na ang 106 na kilometrong railway project na siyang magdurugtong sa Metro Manila gayundin sa mga lalawigan ng Bulacan at Pampanga.
Kahapon, inilunsad ng Department of Transportation ang marking sa limang istasyon na daraanan ng Manila – Clark Railway Project sa ilalim ng build, build, build program ng administrasyon.
Ayon kay Presidential Spokesman Ernesto Abella, 17 istasyon ang itatayo na magsisimula sa Tondo sa Maynila at daraan sa Caloocan at Valenzuela City sa Metro Manila.
Daraanan din ng nasabing railway system ang mga bayan ng Meycauayan, Marilao, Bocaue, Balagtas, Guiguinto, Malolos at Calumpit sa Bulacan gayundin sa Apalit, San Fernando, Angeles, Clark International Airport at magtatapos sa panukalang new Clark city sa Pampanga.
Dalawandaan at dalawampu’t limang Bilyong Piso ang ilalaang pondo para sa nasabing proyekto sa ilalim ng official development assistance mula sa Japan.
By: Jaymark Dagala / Aileen Taliping
Ipinagmalaki ng Malakaniyang ang tagumpay ng pamahalaan sa pagpapatupad ng humanitarian pause ng sandatahang lakas sa Marawi City kasabay ng pagdiriwang ng Eid’l Fitr kamakalawa.
Ito’y ayon kay Presidential Spokesman Ernesto Abella ay dahil sa may limang sibilyang nasagip bukod pa sa nakuhang labi ng isang sibilyan mula sa nasabing lugar sa loob ng walong oras.
Dahil dito, sinabi ni Abella na magpapatuloy ang clearing operations ng mga sundalo gayundin ang pagrecover sa labi ng mga sibilyan at mga biktima ng bakbakan.
Samantala, ini-ulat din ni Abella ang tumataas na bilang ng mga kasong arson o panununog ng mga terorista sa ilang lugar habang umaatras sila sa tropa ng pamahalaan.
By: Jaymark Dagala / Aileen Taliping
Sinimulan na ng Presidential Management Staff ang kanilang paghahanda para sa lalamanin ng ikalawang SONA o State of the Nation Address ni Pangulong Rodrigo Duterte.
Ayon kay Presidential Communications Secretary Martin Andanar, i-uulat ng Pangulo sa bayan ang mga nagawa ng kaniyang administrasyon at ang assessment sa kaniyang mga naipangako sa unang sona.
I-uulat din aniya ng Pangulo ang naging resulta ng mga inilunsad na kampaniya ng pamahalaan kontra iligal na droga, krimen at katiwalian.
Pagtitiyak pa ni Andanar, maliban sa mga nabanggit, tiyak din aniyang ilalatag ng Pangulo sa kaniyang ikalawang SONA ang mga plano ng kaniyang administrasyon sa susunod na taon.
By: Jaymark Dagala / Aileen Taliping
Nadagdagan pa ang bilang ng mga nasasawi sa nagpapatuloy pa ring bakbakan sa pagitan ng militar at ng Maute Group sa Marawi City nitong weekend.
Ito’y ayon kay AFP Public Affairs office Chief Col. Edgard Arevalo ay dahil sa may nadagdag pang 12 mula sa 375 nasawi nuong Biyernes.
Dahil dito, pumalo na sa 387 ang bilang ng mga nasawi kung saan, 290 sa mga ito ay mga terorista, 97 ay mga sundalo, tatlo ang pulis at 27 ang mga sibilyan.
Samantala, aabot naman sa 1,700 sibilyan na ang nasagip ng militar sa loob ng Marawi kabilang na ang limang sibilyan na narescue nuong linggo sa gitna ng walong oras na holiday pause.
By: Jaymark Dagala / Jonathan Andal
