Pinawi ng PAGCOR o Philippine Amusement and Gaming Corporation ang pangamba ng libu-libong empleyado ng Resorts World Manila (RWM) na tuluyan na itong magsara.
Ayon kay PAGCOR chair Andrea Domingo, maaari nang magbukas ang RWM sa sandaling makumpleto nila ang checklist ng mga protocols at security measures na dapat sundin sakaling may may mangyaring pag-atake na tulad ng naganap sa Resorts World Manila.
Sinabi ni Domingo na ang inihanda nilang checklist ay ipinamahagi na rin nila sa mga safety at security officers ng lahat ng casino sa bansa upang hindi na maulit ang trahedya sa RWM kung saan tatlumput walo katao ang nasawi kasama na ang suspek na si Jessie Carlos.
“Dito po sa Resorts World, talagang napakalungkot ng pangyayari, kaya lang iniisp ko rin ‘yung mahigit na anim na libong empleyado at libu-libo pang iba na mawawalan ng hanapbuhay, mga suppliers at mga support services. Iniisip din namin na ang laki rin ng pangangailangan ngayon ng ating pamahalaan, malaki rin ang nawawala sa gobyerno sa pagsasara ng Resorts World.” paliwanag ni Domingo sa panayam sa DWIZ
By Len Aguirre
Walang dudang na bibigay na sa lalong madaling panahon ang Maute group na kumubkob sa Marawi City.
Ayon kay Brig. General Restituto Padilla, Spokesman ng AFP o Armed Forces of the Philippines, malaki na ang nabawas sa kakayahan ng Maute group at isang patunay rito ang pagkakarecover nila sa daan daang matataas na kalibre ng baril.
“Habang dumadaan ang mga araw, lumiliit ang mundo nila at humihina ang kanilang pwersa. Maliwanag ‘yan sa dami na ng bilang ng ating mga nakuhang high powered firearms at ngayon ay umaabot na sa mahigit 300. ‘Yung kanilang pagkabawas ng kakayahan ay tiyak na makapagpapahina sa kanila.” paliwanag ni Padilla sa panayam sa DWIZ
Samantala, itinuturing pa lamang ng militar na pawang hilaw na impormasyon ang patay na ang mga lider na Maute group.
Sinabi ni Padilla na magpapalabas lamang sila ng kumpirmasyon sa pagkamatay nina Omar, Abdullar at Oto Maute kapag nakakuha sila ng matibay na ebidensyang magpapatunay sa paulit uli na impormasyong nakakarating sa kanila.
Una rito, napag alaman sa walong emisaryong nakapasok sa lugar ng Maute sa Marawi City na si Abdullah Maute ang kanilang nakausap
“Maaaring marami nga pong nagsasabi, pero kapag hindi natin nahanapan ng katibayan katulad ng recovery sa mga labi, hindi muna natin ito inilalagay sa pinal na impormasyon na dapat paniwalaan. Kaya sisikapin natin na makakuha ng maliwanag na ebidensya.” pahayag ni Padilla
Militar, nananatili pang blangko sa kalagayan ng mga bihag ng Maute group
Blangko ang militar sa kalagayan ng mga bihag ng Maute group na kinabibilangan ng grupo Father Chito Suganob.
Inamin ito ni Brig. General Restituto Padilla, Spokesman ng AFP sa harap ng impormasyon na ginagamit na pambala sa giyera ng Maute group ang kanilang mga bihag.
Batay sa mga impormasyon, pinagsusuot ng itim ang mga bihag at sila ang ginagawang frontline ng Maute group sa labanan.
Hindi rin makumpirma ni Padilla ang report na mayroon na namang pinugutang bihag ang Maute group subalit nangyari na anya ito sa unang dalawang linggo ng labanan dahil nais pasiklabin ng Maute ang religious war.
Sa pagtaya ni Padilla, nasa limandaan pa ang mga sibilyang naiipit sa Marawi City kabilang na mga bihag ng Maute group.
“Kapag nasa gitna ng bakbakan, hindi niyo na talaga ma-distinguish kung sino ang sibilyan lalo na kapag inutusan na humawak sila ng mga armas. Kawawa ang ating kababayan, may nakatutok sa kanila sa likod kapag hindi nila sinunod ang mga utos. Ang akin lang abiso sa militar, tingnan at maaring magbigay ng body language itong mga sibilyan upang mailigtas natin.” ani Padilla
By Len Aguirre
Target ng DICT o Dept. of Information and Communications na mabigyan ng mabilis, mura at epektibong internet access ang lahat ng panig ng bansa bago magtapos ang Duterte administration.
Ayon kay DICT Undersecretary Eliseo Rio, sa ngayon ay animnapung porsyento ng Pilipinas ang may access sa internet samantalang ang apatnapung porsyento ay kapos o kaya ay wala pang internet access.
Nailatag na anya nila ang national broadband plan kung saan gagastos ng mahigit sa pitumpu’t pitong bilyong piso ang pamahalaan para magtayo ng imprastraktura sa telekomunikasyon ang pamahalaan.
“Ito pong mga member ng top telco at ‘yung ating Cable-TV operators, ‘yung nagbibigay ng Cable-TV sa probinsya, sila po ‘yung pwede nating gamitin na magbigay ng mahusay na serbisyo, at ang gobyerno ang magbibigay sa kanila ng imprastraktura para sila ay makapagbigay pa ng mas mahusay na serbisyo.” paliwanag ni Rio sa panayam sa DWIZ
Aminado ang DICT na kulelat ang Pilipinas pagdating sa bilis at pagiging episyente ng internet connection kumpara sa mga karatig nitong bansa.
Ayon kay Rio, sa ngayon ay umaabot lamang sa labing anim na libo ang cell sites sa Pilipinas kumpara sa Vietnam na may pitumpung libong cell sites.
Ito anya ang dahilan kaya’t sa ilalim ng national broadband plan, papasok na bilang player sa larangan ng telekomunikasyon ang pamahalaan.
“Itong mga bansa sa paligid natin, may investment diyan ang gobyerno sa telecommunication, ang gobyerno minsan ang naglagay ng mga cell site towers, mga common towers, paglatag ng kable. Ang lahat ng mga imprastraktura sa telecommunication are private investments.” paliwanag ni Rio
By Len Aguirre
Pabata ng pabata na ‘di umano ang edad ng mga positibo sa HIV/AIDS sa Pilipinas.
Ayon kay Aangat Tayo Partylist Representative Harlin Neil Abayan lll, nakaka-alarma ang datos na mahigit isang libo (1,000) mula sa mahigit tatlong libong kaso (3,000) ng HIV/AIDS sa bansa ay may edad kinse (15) hanggang bente kwatro (24) anyos.
Makikita rin anya sa datos ang dumaraming bilang ng lalaking millenials na positibo sa HIV dahil sa pakikipagtalik sa kapwa lalaki.
Sinabi ni Abayon na mula Enero hanggang Abril ng taong ito, sampung (10) bata na edad kinse (15) pababa ang nagpositibo rin sa HIV.
Dahil dito, hinikayat ni Abayon ang pamahalaan na paigtingin ang edukasyon ng mga Pilipino hinggil sa HIV/AIDS at ang kampanya upang ipakalat ang mga impormasyong dapat malaman hinggil sa sakit na ito.
By Len Aguirre
Nagpapatayan na umano ang mga terorista sa loob ng Marawi City.
Ayon kay AFP o Armed Forces of the Philippines Western Mindanao Command Chief Lt. Gen. Carlito Galvez, may natanggap silang impormasyon na pinatay ng Maute Group ang ilang miyembro nilang gusto nang tumakas sa lungsod.
Batay anya ito sa kwento ng mga miyembro ng Maute na dinampot ng militar at ligtas na nakatakas mula sa mga kapwa nila terorista.
Kwento umano ng mga nadampot nilang bandido, ayaw nang lumaban ng ilan sa kanilang kasamahan.
Ayon kay Galvez, posibleng hindi inasahan ng ilang terorista na aabot sa ganito katagal ang gulo sa marawi o di kaya’y hindi naibigay ang ipinangakong pera sa kanila para sa gyerang ito.
By Len Aguirre
Nagsimula na ang training ni 8th Division World Champion Manny Pacquiao sa Autralia.
Sinimulan ito ni Pacquiao sa pamamagitan ng 6.5 kilometrong pagtakbo kaninang umaga.
Tinapos ng Pambansang Kamao ang pagtakbo nito sa loob ng mahigit tatlumpung (30) minuto.
Matapos nito ay naka-iskedyul din si Pacquiao sa sparring sessions nito laban sa Australian boxer na si George Kambosos.
Ang bakbakang Manny Pacquiao at Jeff Horn na tinaguriang Battle of Brisbane ay gaganapin sa Suncorp Stadium sa Hulyo 2.
By Ralph Obina
Walang nadamay na mga Pilipino sa magkahiwalay na pagsabog sa Pakistan noong Biyernes.
Ito ang kinumpirma ng DFA o Department of Foreign Affairs, batay na rin sa report ng embahada ng Pilipinas sa Pakistan.
Pagtitiyak pa ng DFA, patuloy ang kanilang pagmo-monitor sa sitwasyon sa nasabing bansa.
Kasabay nito, nag-paabot na rin ng pakikiramay ang Pilipinas sa pamilya ng mga naging biktima sa pagsabog.
Matatandaang, nasa walumpu (80) katao ang sinasabing nasawi sa suicide car bombing sa Quetta habang labing apat (14) naman sa pagsabog sa Parachinar.
By Krista De Dios
Pinigil ng PCG o Philippine Coast Guard ang tatlong (3) lalaking patungo sanang Cebu sa pantalan ng Cagayan de Oro City.
Ayon kay PCG Spokesman Commander Armand Balilo, hinarang ang tatlong hindi pinangalanang mga lalaki dahil sa kahina-hinalang paraan ng pagbibitbit ng mga ito ng malaking halaga ng pera.
Aniya, unang idineklara ng mga nasabing lalaki na mga dokumento ang laman ng kanilang dalang maliit na kahon.
Nang busisiin ng PCG, nakita ang tinatayang tatlumpu (30) hanggang apatnapung (40) milyong pisong halaga ng mga pera.
Paliwanag ni Balilo, isasailalim sa pagsisiyasat ang tatlong lalaki na nagpakilalang mga empleyado ng bangko at agad namang pakakawalan kapag napatunayang balido ang kanilang pagbiyahe.
By Krista De Dios | With Report from Aya Yupangco
Patay ang siyam (9) katao sa paglubog ng bangka sa Western Colombia.
Ayon sa ulat, dalawamput walo (28) pa ang nawawala sa isandaan at limampung (150) sakay ng naturang four-deck Almirante vessel.
Batay sa testimonya ng mga nakasaksi, sa loob lamang ng limang (5) minuto ay mabilis na lumubog ang naturang passenger boat.
Agad namang rumesponde ang rescue ng mga otoridad na kinabibilangan ng army helicopters at divers.
Sa ngayon ay inaalam pa ang sanhi ng naturang aksidente.
By Ralph Obina