Pormal nang pinatawan ng kaukulang parusa ng House of Representatives si Quezon City 4th District Rep. Jesus “Bong” Suntay matapos ang kaniyang kontrobersyal na “nag-init” remarks laban sa aktres na si Anne Curtis.
Sa botong 263 na pabor, 8 ang tumutol at 7 ang nag-abstain, inaprubahan ng Kamara ang committee report ng House Committee on Ethics and Privileges laban sa kongresista.
Batay sa rekomendasyon ng Ethics Committee, reprimand ang ibinigay na parusa kay Suntay. Inatasan siyang maglabas ng public apology kay Anne Curtis, magsagawa ng voluntary community service, at dumalo sa gender sensitivity seminar.
Ayon kay Ethics Committee Chairperson JC Abalos, bagama’t na-strike off na sa official records ng House Committee on Justice ang naturang pahayag, patuloy pa rin itong kumakalat at napapanood sa iba’t ibang broadcast at online platforms, dahilan para maapektuhan ang imahe at integridad ng institusyon.
Matatandaang nagbitaw ng kontrobersyal na pahayag si Suntay noong pagdinig ng House Committee on Justice na itinuring niyang “analogy” kaugnay ng impeachment complaint laban kay Vice President Sara Duterte at sa alegasyon ng “kill plot” laban kay Pangulong Ferdinand Marcos Jr. | via Geli Mendez (Patrol 30)
