Tuluyan nang pinatalsik bilang miyembro ng House of Representatives si Cavite 4th District Rep. Kiko Barzaga.
Ito’y matapos ang rekomendasyon ng House Committee on Ethics na patawan ng expulsion si Barzaga dahil sa paulit-ulit na paglabag sa patakaran ng institusyon sa kabila ng warning sa kaniya ng komite at magkahiwalay na suspensyon.
Sa botong 265 na pabor, 14 ang tumutol, at 8 ang nag-abstain, pormal na inaprubahan ng plenaryo ang Committee Report No. 298 ng Ethics Committee sa ilalim ng pamumuno ni Chairperson JC Abalos.
Batay sa privilege speech ni Abalos, napatunayang nagkasala si Barzaga ng disorderly behavior, conduct unbecoming of a member, at paglabag sa House Code of Conduct.
Ang rekomendasyon ng komite ay bunsod ng inihain na reklamo ni House Deputy Speaker Janette Garin na magkaroon ng “disciplinary proceedings” laban sa bagitong mambabatas dahil sa hindi maayos na pagtrato nito sa mga kapwa mambabatas, at paggamit ng social media content na nakasira umano sa dignidad ng Kamara.
Nag-ugat ang muling paghahain ng ethics complaint dahil sa patung-patong na reklamo kay Barzaga bunsod ng mga asal at pag-uugali na ipinapakita nito sa loob ng Kamara, lalo na sa social media, kabilang ang pagpost ng mga altered images ng mga miyembro ng Kamara, pag-live stream sa loob ng session hall, at mga panlalait na hindi naaayon sa parliamentary decorum.
Bukod pa dito, iniugnay rin ni Barzaga ang pagkamatay ng isang alkalde sa Iloilo sa usapin ng flood control at pagdawit sa pangalan ng ilang lider ng Kamara sa lalawigan.
Samantala, dahil naman sa desisyon ng plenaryo na patalsikin si Barzaga, wala nang puwesto sa Kongreso ang kinatawan ng ika-apat na distrito ng Cavite. | via Geli Mendez (Patrol 30)
