Aminado ang Malacañang na ang Pangulong Rodrigo Duterte na marahil ang naging Pangulo ng Pilipinas na may pinakamaraming biyahe sa ibayong dagat sa unang taon pa lamang ng kanyang panunungkulan.
Gayunman, ayon kay Presidential Communications Group Secretary Martin Andanar, ang Pangulo rin naman ang may pinakamalaking investments na nakuha mula sa kanyang mga foreign trips.
Sinabi ni Andanar na wala pang isang taon ay pumalo na sa tatlumpu’t limang (35) bilyong dolyar na investments ang naiuwi ng Pangulo mula sa China, Japan, Qatar at iba pang bansang nagbukas ng kanilang ekonomiya sa Pilipinas tulad ng Russia.
Umabot rin anya sa dalawang (2) bilyong dolyar ang agricultural market na binuksan sa Pilipinas ng ilan sa mga bansang binisita ng Pangulo.
“Meron pang underground subway na Japan din ang gagawa, pipirmahan yan ni Presidente Duterte and Prime Minister Shinzo Abe mga last quarter of this year, tapos yung sa Mindanao Railway pa, nagsisimula na lahat, sigurado trabaho dito papasok, isa na tayo sa pinakamabilis na ekonomiya sa mundo, at sa Asya lamang, I understand we are now the fastest.” Ani Andanar
President’s health
Samantala, tiniyak ni Andanar na nasa magandang lagay ang kalusugan ng Pangulong Rodrigo Duterte.
Ayon kay Andanar, tuloy ang trabaho ng Pangulong Duterte kahit na hindi ito nakikita sa publiko.
Matatandaan na hindi sumipot sa paggunita ng Independence Day ang Pangulo noong June 12 at nagpakita lamang ito sa publiko noong June 17 nang dumalaw sa Butuan City Agusan del Norte bago muling nagpahinga.
“Okay si Presidente, nagpapahinga, ibig naman ibig sabihin kung hindi magpakita sa TV at radio ay hindi nagtatrabaho, hindi ibig sabihin ganun eh, ang executive naman kahit nasa loob lang ng opisina, maraming pinipirmahan at maraming pinaplano hindi naman kailangan makita.” Pahayag ni Andanar
By Len Aguirre | Balitang Todong Lakas (Interview)
Target makuha ng Cleveland Cavaliers si Paul Georege ng Indiana Pacers.
Ito ay para mapalakas ang puwersa ng Cavs sa susunod na season.
Plano ng Cavs na ipalit si George kay Kevin Love na ipapadala naman sa koponan ng Denver Nuggets.
Bukod kay George, tinatarget din ng Cavs na makuha si Carmelo Anthony matapos itong pakawalan ng New York Knicks.
Kung maisasakatuparan, inaasahang lalakas ang Cavs kung saan may makakatuwang na sina Lebron James at Kyrie Irving.
By Ralph Obina
Nanawagan ang ARMM o Autonomous Region in Muslim Mindanao sa mga bakwit na magparehistro sa DSWD o Department of Social Welfare and Development.
Ayon kay ARMM Executive Secretary Laisa Alamia, kinakailangan na makakuha ang mga evacuees ng disaster assistance and family access card upang mabigyan ng kaukulang ayuda mula sa gobyerno tulad ng monetary at material assistance.
Tinukoy ni Alamia na partikular na dapat na magparehistro ang mga evacuees na nanunuluyan sa kanilang mga kaanak at kaibigan sa ilang bayan sa Lanao del Sur at iba pang bahagi ng Mindanao.
Batay sa tala ng ARMM Humanitarian Emergency Action Response Team, mula sa kabuuang 40, 753 families ay 970 lamang sa mga ito ang nasa evacution areas habang karamihan ay home-based na o nakikitira sa mga kakilala.
By Rianne Briones
Nilinaw ng aktres na si Pauleen Luna na hindi Jessica ang kanilang ipapangalan sa baby girl nila ni Bossing Vic Sotto.
Ito ay matapos na ibahagi sa Facebook account ng noon time show na Eat Bulaga ang ginawang masayang gender reveal para sa kanilang baby.
Sa nasabing video kasi ay pinapipili ang mga Dabarkads sa team Lebron kapag baby boy at team Jessica kung baby girl, kung saan team Jessica o baby girl ang nanalo dahil pink ang laman ng lollicakes na kinagat nila Pauleen at Vic.
Paliwanag ni Pauleen naging biruan na raw sa Eat Bulaga na Lebron ang ipapangalan kapag lalaki ang kanilang baby at Jessica kung babae para tawagin na Ms. Jessica Sotto.
Dagdag ni Pauleen, sa ngayon ay pinag-iisipan pa nila ni Bossing ang magiging pangalan ng kanilang panganay.
By Krista de Dios
Nakuha ng mga awtoridad ang halos isang daan at animnapung (160) piraso ng mga bala na nakatago sa mga donasyon na patungo sana sa Marawi City.
Ayon kay Eastern Police District Director Police Chief Supt. Romulo Sapitula, nakumpiska ito sa condominium unit ni Mohaimen Mutalib sa Reliance Street Brgy. High-Way Hills Mandaluyong City.
Mismong si Mutalib aniya ang tumawag sa mga awtoridad para i-report ang natagpuang kahon na may lamang 159 piraso ng bala ng 9-MM na baril at ilang mga gun accessories kasama ang ilang used clothing.
Si Mutalib na isang tubong Marawi ay nag-organize ng donation campaign sa pamamagitan ng social media para makalikom ng relief goods sa kanyang mga kababayan.
Kabilang nga sa kanyang tinanggap na donasyon ay ang naturang mga bala na sinasabing nagmula sa isang alyas AJ.
By Rianne Briones | with report from Jopel Pelenio (Patrol 17)
Magdaragdag ng oras at biyahe sa LRT o Light Rail Transit Line 1 kahit weekends at holidays.
Ayon sa abiso ng LRMC o Light Rail Manila Corporation, operator ng LRT-1, mula sa dating alas-5:00 ng madaling araw ay gagawin nang alas-4:30 ng madaling araw ang unang biyahe ng tren tuwing Sabado, Linggo at pista opisyal.
Mula naman sa dating 423 na biyahe ng tren tuwing Sabado at holiday ay gagawin na itong 472 trips habang ang 323 biyahe tuwing Linggo ay gagawin nang 353.
Tinukoy ng LRMC na ang dagdag na biyahe at oras ay bunsod ng positibong feedback mula sa mga mananakay nang ipatupad nila ang extended operating hours noong pasukan.
By Rianne Briones
Bukas ang MILF o Moro Islamic Liberation Front na mamagitan sa gobyerno at Maute Group upang matuldukan na ang krisis sa Marawi City.
Kasunod ito ng naging pahayag umano ng Maute Group na handa itong lisanin ang Marawi kung papagitna ang MILF.
Ayon kay MILF Spokesman Von Al Haq, kukonsultahin muna nila ang gobyerno ukol dito.
Gagawin lang umano nila ito sa oras na magbigay ng go signal ang pamahalaan.
Ang MILF ay nasa gitna ng proseso ng usapang pangkapayapaan sa gobyerno.
By Rianne Briones
Hinikayat ng grupong Pasa Lord Movement ang mga Pinoy na makiisa sa idaraos sa nationwide prayer for peace sa susunod na linggo.
Bunsod ito ng nagpapatuloy na bakbakan ng mga sundalo at Maute Group sa Marawi City.
Ayon sa grupo, ito ay para magkaisang idalangin ang kapayapaan sa Mindanao at sa buong bansa.
Kaugnay nito, umapela ang grupo sa bawat Pilipino anuman ang relihiyon na makilahok sa pambansang panalangin para sa kapayapaan sa Hulyo 7, dakong alas-12:00 ng tanghali.
By Rianne Briones
