Mas kinilig pa ang fans ng ‘KathNiel’ loveteam dahil inihayag ni Kathryn Bernardo na handa siyang pakasalan si Daniel Padilla sakaling alukin siya ng kasal ng aktor, 10 taon mula ngayon.
Sa naging panayam ng TV host na si Boy Abunda kay Kathryn tinanong nito ang aktres na: “Halimbawa, 10 years from now, DJ goes to you and says, ‘Will you marry me?’ Is that a yes or a no?”
Isang mabilis na ‘Yes’ naman ang isinagot ng dalaga.
Una nang inamin ng dalawa na nasa exclusively dating stage sila ngayon at mas naging bukas na sa pagpapakita ng tunay nilang nararamdaman sa isa’t-isa.
Nang tanungin kung pinagbabawalan niya si Daniel na maging close sa ibang babae, sinabi ni Kathryn na may tiwala siya kay DJ at alam nito kung hanggang saan lang dapat at kung saan ito lulugar.
Sa kasalukuyan ay busy ang dalawa sa pinagbibidahang teleserye sa ABS-CBN na ‘La Luna Sangre’.
Samantala, good news naman sa mga fans ng KathNiel sa South Korea, dahil nakatakdang ipalabas ang pelikulang “Barcelona: A Love Untold” sa Bucheon sa susunod na buwan.
Kasama ang nasabing pelikula sa Bucheon International Fantastic Film Festival’s (BIFAN) Best of Asia lineup, na isa rin sa highest grossing movies noong 2016 na kumita ng P321 million.
Ginagahasa na umano ng ISIS-Maute group ang kanilang mga bihag na kababaihan.
Ayon kay Joint Task Force Marawi Spokesman Lt. Col. Jo-Ar Herrera, batay sa salaysay ng nasagip na pitong (7) hostage ay pinuwersa na ng mga Maute na pakasalan sila ng kanilang mga bihag na babae.
Bukod dito ay pwersahan ding pinagnanakaw ng mga Maute ang mga bihag nito sa mga kabahayan na naisailalim na sa clearing ng militar.
Target ng mga Maute na makakuha ng bala, baril, pera, ginto at mga alahas.
May itinalaga pa umanong schedule ang mga ito sa pagnanakaw mula alas-7:00 ng umaga hanggang alas-11:00 ng umaga pagkatapos ay babalik sa kampo saka muling magnanakaw pagpatak ng alas-3:00 ng hapon.
By Rianne Briones
Muling itinanggi ng DTI o Department of Trade and Industry na sumipa na sa dalawa hanggang anim na Libong Piso ang halaga ng isang sakong bigas sa Marawi City.
Ayon kay DTI Secretary Mon Lopez, personal niyang pinuntahan ang mga lugar na binabanggit sa isang ulat upang tingnan at patunayang hindi totoo ang balita.
Nilibot aniya nito ang mga palengke sa Iligan at Marawi at nakita niyang nananatili sa 27 Pesos ang presyo ng kada kilo ng NFA rice habang naglalaro naman sa 35 hanggang 50 Pesos ang kada kilo ng commercial rice.
Normal aniya ang presyo ng bigas sa nasabing mga lugar sa Mindanao at sumusunod pa sa suggested retail price ang mga groceries sa Iligan City at karatig na mga lugar.
By: Jaymark Dagala / Aileen Taliping
Tiniyak ng pamahalaan na walang epekto sa negosyo ang mga nangyayaring gulo sa Marawi City gayundin ang idineklarang batas militar sa Mindanao
Ito ang inihayag ni Trade Secretary Ramon Lopez kasunod ng mga ulat na natatakot nang mamuhunan sa bansa ang mga negosyante dahil sa nababalitaang gulo sa bansa..
Ayon kay Lopez, nagtataka siya kung bakit tila hindi natinag ang mga negosyante sa pagpapahayag nila ng interes sa bansa sa kabila ng mga pangyayari.
Niliwanag din ng kalihim na ang nakikita ng mga investors ay ang magandang market potential ng bansa dahil narin sa pagdami ng mga bata at kabataang konsyumer gayundin ang economic fundamentals ng Pilipinas.
By: Jaymark Dagala / Aileen Taliping
Umapela ang malakaniyang sa mga kritiko na huwag nang bigyan ng malisya o negatibong pakahulugan ang madalang na public appearance ni Pangulong Rodrigo Duterte.
Ito’y makaraang magbalik Malakaniyang at muling nasilayan ng publiko ang Pangulo kahapon matapos ang anim na araw na pamamahinga nito.
Ayon kay Presidential Spokesman Ernesto Abella, buhay na buhay ang Pangulo at abala ito sa kaniyang trabaho bilang punong ehekutibo.
Kahit aniya hindi nakikita ang Pangulo, sinabi ni Abella na tuloy ang trabaho nito at marami siyang ginagawa lalo na sa mga paper works.
Giit pa ni Abella, nananatili pa ring kontrolado ng Pangulo ang sitwasyon sa mga problema ng bansa lalo na sa nagpapatuloy na gulo sa Marawi City na kagagawan ng mga teroristang Maute.
Kahapon, pinangunahan ng Pangulo ang pagpupulong ng NEDA o National Economic and Development Authority gayundin ang pagdiriwang ng Eid’l Fitr sa Palasyo ng Malakaniyang.
By: Jaymark Dagala / Aileen Taliping
Nanindigan ang Malakaniyang na hindi makikipag negosasyon sa mga terorista ang pamahalaan makaraang lumutang ang hiling na palit ulo ng teroristang Maute sa Marawi City.
Ayon kay Presidential Spokesman Ernesto Abella, malinaw ang polisiya ng pamahalaan hinggil sa usapin at hindi nito hahayaang malagay sa kompormiso ang sistema ng katarungan.
Gayunman, sinabi ni Abella na mas mainam kung hihintayin na lamang mga developments dahil sa nagpapatuloy pa rin ang clearing operations ng militar laban sa mga terorista.
Hinggil naman sa panukala ng MILF o Moro Islamic Liberation Front na mamagitan para umalis na ang mga terorista sa Marawi, sinabi ni Abella na kanilang ikinukonsidera ang lahat para sa ikalulutas ng krisis sa nasabing lugar.
By: Jaymark Dagala / Aileen Taliping
Hinihintay pa ng Malakaniyang ang ulat mula sa AFP o Armed Forces of the Philippines hinggil sa balitang inabandona na umano ni Isnilon Hapilon ang mga tauhan nito sa Marawi City.
Ayon kay Presidential Spokesman Ernesto Abella, mananatiling hilaw ang nasabing impormasyon hangga’t walang kumpirmasyon na nagmumula sa mga sundalo sa ground.
Gayunman, sinabi ni Abella na maituturing na karuwagan sa panig ni Hapilon ang kaniyang pag-abandona sa mga tauhan nito sakaling mapatunayang totoo nga ang nasabing impormasyon.
Una rito, inihayag ng militar na papahina na ang puwersa ni Hapilon sa Marawi City makaraang lumutang ang impormasyon na nagpapatayan na mismo ang mga terorista na nananatili sa loob ng Marawi.
By: Jaymark Dagala / Aileen Taliping
Ayaw nang patulan ng Malakaniyang ang banat ni Senador Antonio Trillanes IV na sablay ang unang taon ni Pangulong Rodrigo Duterte sa puwesto dahil sa hindi umano nito nalutas ang mga pangunahing problema ng bansa.
Ayon kay Presidential Communications Secretary Martin Andanar, mas alam ng naka-iintinding publiko ang sitwasyon ng bansa kaysa sa mga kritiko ng administrasyon.
Sarado aniya ang isip ng mga kritiko ng Pangulo dahil laging may puna at batikos ang mga ito sa mga kilos at ginagawa ng Pangulong Duterte.
Marami ang nakalinyang proyekto ng administrasyon na may kaugnayan sa polisiyang pang-ekonomiya tulad ng Dutertenomics at build, build, build project na mabilis na magkokonekta sa publiko at lilikha ng maraming trabaho.
By: Jaymark Dagala / Aileen Taliping
