Isinusulong ng DENR o Department of Enviroment and Natural Resources na maging mandatory ang pagtatanim ng puno sa Metro Manila.
Ayon kay DENR Secretary Roy Cimatu, halos wala ng puno sa mga pangunahing lugar sa Kamaynilaan na maaari sanang pangontra sa polusyon.
Aniya, hihirit siya kay Pangulong Rodrigo Duterte na para magpalabas ito ng executive order na nag-oobliga sa pagtatanim ng mga puno partikular sa mga subdivision.
Mas makabubuti ito ayon kay Cimatu dahil magiging inter-agency ang pagkilos para sa kalikasan.
By Rianne Briones
Nasabat ng mga sundalo ang isang miyembro ng ISIS-Maute terrorist group na nagbibiyahe ng mga bala at naglalabas ng mga sugatan mula sa war zone sa Marawi City.
Ayon kay Joint Task Force Marawi Spokesman Lt. Col. Jo-Ar Herrera, dinadala ng hindi pinangalanang tao ang mga sugatang Maute patungo sa katimugang bahagi ng Lanao lake.
Kaugnay nito, mas naghigpit na ang militar sa seguridad sa pagpasok at palabas ng Marawi City.
By Rianne Briones
Magandang balita para sa mga Beliebers!!!
Magbabalik sa Pilipinas si Justin Bieber para muling magconcert sa Setyembre 30.
Bahagi ito ng kanyang Purpose World Tour.
Ito na ang ikalawang pagkakataon na magdaraos ng concert si Bieber sa Pilipinas kung saan ang huli ay noon pang 2011.
Kabilang sa mga sikat na inawit ni Bieber ang “Love Yourself”, “Sorry” at marami pang iba.
By Ralph Obina
Tatangkain muli ng Pilipinas na sumungkit ng gintong medalya sa larangan ng billiards at snooker sa 29th Southeast Asian Games na gaganapin sa Kuala Lumpur, Malaysia, simula Agosto 19 hanggang 30.
Pangungunahan ang 11-man billiard at snooker team ng SEA Games gold medalist na si Rubilen Amit at apat (4) na iba pang world ranking local cue artist.
Sasargo si Amit sa 9-ball singles event ng women’s at dedepensahin ang kanyang titulo.
Magsisilbi namang all-arround players ang mga veteran at dating world titlist na sina Efren “Bata” Reyes, Warren Kiamco at Efren de la Cruz sa singles and doubles event ng bilyar.
Samantala, nakatakdang ipresenta ngayong araw ni Cynthia Carreon, Pangulo ng Philippine Gymnastics Association at Chef-de-Mission ng Philippine Delegation sa Philippine Olympic Committee Board ang official line-up ng mga atleta at opisyal na lalahok sa SEA Games.
By Drew Nacino
Dalawmapu’t pitong (27) bakwit o evacuees na ang namatay simula nang sumiklab ang bakbakan sa Marawi City.
Ayon sa Department of Health o DOH, kabilang sa nasawi ang isang bagong silang na sanggol dahil sa mahinang pangangatawan nito.
Hindi na nakapagpatingin sa doktor ang ina ng biktima na posibleng na-stress habang nasa evacuation center.
Ipinaliwanag ni Marawi City Health Officer, Dr. Ali Daligdig, sardinas at noodles na lamang ang kinakain sa mga evacuation center kaya’t asahan na ang paghina ng immune system ng isang tao.
Samantala, karamihan naman sa mga sakit na dumadapo sa mga evacuee ay skin disease, lung disease, hypertension at water borne disease gaya ng diarrhea at amoebiasis.
By Drew Nacino
Nakahanda na ang Amerika sa paglulunsad ng panibagong pag-atake laban sa Syrian government.
Ayon sa Pentagon, nakatanggap sila ng intelligence report na ikinakasa na ng Syrian government sa Al Shayrat Airfield ang panibagong chemical attack sa mga teritoryong hawak ng mga rebelde.
Hindi rin umano ligtas sa pag-atake ng Estados Unidos ang Russia at Iran sakaling kunsintihin at suportahan ng mga ito ang aksyon ng Syria.
Gayunman, itinanggi ng Syrian at Russian government ang akusasyon ng Amerika at iginiit na naghahamon lamang ito ng panibagong away.
Sakaling anilang idamay ng Amerika ang Russia at Iran ay tiyak na hahantong sa mas malaking digmaan ang nagpapatuloy na Syrian civil war.
By Drew Nacino
Pinag-aaralan ng Metropolitan Manila Development Authority o MMDA ang posibilidad ng pagpapalawig sa number coding scheme upang mabawasan ang volume ng mga pribadong sasakyan sa mga pangunahing kalsada.
Ayon kay MMDA Chairman Danny Lim, dapat mabawasan ang dami ng mga sasakyan sa mga pangunahing kalsada sa Metro Manila dalawang beses kada linggo.
Ipinunto ng MMDA na mayroong 2.6 na milyong sasakyan sa Metro Manila at sa oras na magsabay-sabay ang mga ito sa mga kalsadang tulad ng EDSA ay tiyak na magdudulot ito ng napakatinding daloy ng trapiko.
Aminado si Lim na hindi naman maaaring makompromiso ang public transport system sa pinalawig na number coding scheme dahil magkakaroon ito ng malaking epekto sa mga commuter.
Gayunman nilinaw ni Lim na pinalulutang pa lamang nila ang ideya ng dalawang beses kada isang linggong number coding.
Aniya, sa media niya unang inilatag ang ideya ng 2-day number coding scheme upang mapag-usapan at malaman nila ang pulso ng publiko.
Sa ilalim ng nais na ilatag na panukala ni lim, bawal tuwing Lunes ang mga may plakang nagtatapos sa mga numerong 1,2,3 at 4, bawal kapag Martes ang 5,6,7,8, Miyerkoles, 9,0,1,2, Huwebes,3,4,5,6 at 7,8,9,0 tuwing Biyernes.
Muling binigyang diin ni Lim na tatlumpung (30) porsyento ng mga sasakyan sa buong bansa ay nasa Metro Manila samantalang hindi naman nadadagdagan ang lawak at bilang ng mga kalsada kayat masikip ang daloy ng trapiko.
“Kaya fino-float natin ang idea para mapag-usapan dahil talagang malala ang sitwasyon ng traffic natin, kaya nga gusto kong pag-usapan yan dahil napakaraming punto ang lumalabas, marami rin ang nagsasabi na kahit ipatupad mo yan ay bibili lang ng dagdag na sasakyan ang ilang kababayan natin na may kakayahan so tinitignan po natin lahat ng anggulo, perspektibo kung saan nanggagaling, bottom line is i-float natin ang idea, pag-usapan natin.” Pahayag ni Lim
By Drew Nacino | Len Aguirre | Ratsada Balita (Interview)
Labinlimang (15) milyong piso ang ipinagkaloob ng China sa Pilipinas bilang donasyon para sa relief operations at rehabilitation ng Marawi City.
Personal na iniabot ni Chinese Ambassador to the Philippines Zhao Jianhua ang tseke kay Pangulong Rodrigo Duterte.
Ang nasabing donasyon ay isa lamang halimbawa ng tumitibay at lumalalim na ugnayan ng dalawang bansa sa kabila ng agawan sa Spratly Islands.
Tinatayang walumpu’t limang (85) milyong piso na ang gastos ng Department of Social Welfare and Development o DSWD para sa libu-libong apektadong pamilya.
By Drew Nacino
Muling humarap sa publiko si Pangulong Rodrigo Duterte matapos ang anim (6) na araw na hindi nasilayan sa gitna ng nagpapatuloy na bakbakan sa Marawi City, Lanao del Sur.
Sa selebrasyon ng Eid’l Fitr o pagtatapos ng Ramadan sa Malacañang, inihayag ni Pangulong Duterte na batid na niya ang sitwasyon sa Mindanao bago pa manalo sa 2016 presidential elections.
Ayon sa Pangulo, inasahan na niyang sisiklab muli ang mahabang bakbakan sa Marawi City habang nasa Moscow, Russia.
PAKINGGAN: Bahagi ng pahayag ni Pangulong Rodrigo Duterte
Kung rebelyon lamang aniya ang umiiral sa Marawi City ay batid na niya ang solusyon na ilalatag sa problema pero sa pagkakataong ito ay hindi katanggap-tanggap ang pagpasok ng dayuhang ideyolohiya sa bansa.
PAKINGGAN: Bahagi ng pahayag ni Pangulong Rodrigo Duterte
‘Marawi will rise again’
Aminado si Pangulong Rodrigo Duterte na nagdurusa rin siya gaya ng libu-libong biktima ng bakbakan sa Marawi City.
Ayon kay Pangulong Duterte, mayroon siyang kaanak na nasawi sa gitna ng sagupaan at pinakamalungkot ay umanib ito sa grupong ISIS-Maute.
Gayunman, nilinaw ng Pangulo na hindi siya masaya sa dinaranas na paghihirap ng mga Maranao lalo sa mga namamatay sa pakikipagbakbakan.
PAKINGGAN: Bahagi ng pahayag ni Pangulong Rodrigo Duterte
Samantala, tiniyak ni Pangulong Duterte ang muling pagbangon ng Marawi at dahil bubuhusan niya ito ng pondo para sa rehabilitasyon.
PAKINGGAN: Bahagi ng pahayag ni Pangulong Rodrigo Duterte