Hati ang tugon ng mga Senador sa panawagan ng COMELEC o Commission on Elections sa Kongreso na kumilos at pagpasyahan na kung itutuloy o hindi ang Barangay at SK elections ngayong taong ito
Ayon kay Senate Minority Leader Franklin Drilon, dapat nang ituloy ang halalan sa Oktubre dahil ito ay naitakda na at malabo nang matutukan ng mga mambabatas
Sa panig naman ni Senador Francis Escdero, mas mainam na huwag nang ituloy ng poll body ang pag-iimprenta ng mga balota dahil hindi na matatalakay pa ang legislation hinggil sa kung tuloy o hindi ang naturang halalan
Una rito, nagsumite na si Majority Floor Leader Tito Sotto ng panukala sa Senado para hilinging muling ipagpaliban ang Barangay at SK Elections.
By: Jaymark Dagala / Cely Bueno
Walang kapangyarihan ang Korte Suprema na atasan ang Kongreso na magsagawa ng joint session upang talakayin ang idineklarang martial law ni Pangulong Rodrigo Duterte sa Mindanao.
Ito ang nakasaad sa 40 pahinang komento ni Solicitor General Jose Calida sa Korte Suprema hinggil sa dalawang petisyong kaugnay ng usapin.
Giit ni Calida sa kaniyang komento, malinaw ang isinasaad sa saligang batas na separation of powers ng tatlong sangay ng pamahalaan kaya’t hindi maaaring manghimasok ang hudikatura sa anumang hakbang ng lehislatura o ehekutibo.
Malinaw din aniya ang nakasulat sa saligang batas ng taong 1987 na hindi inoobliga ang Kongreso na magpatawag ng joint session lalo’t kinakailangan lamang ito kung babawiin ang nasabing deklarasyon.
By: Jaymark Dagala / Bert Mozo
Kinasuhan ng rebelyon sa korte ng DOJ o Department of Justice panel of prosecutors ang dalawang Abu Sayaf medics na una nang inaresto ng mga awtoridad.
Kinilala ang mga respondents na sina Jadzrie Harad Saabdula na isang nurse at Jamal Kalib Jamil na isang mangingisda na kapwa mula sa lalawigan ng sulu.
Magugunitang naaresto ang dalawa matapos bumili ng maramihang suplay ng gamot gaya ng antibiotics, pain reliever at mga post traumatic medicine sa isang botika sa Pagadian City.
Hindi naman ini-aalis ng mga awtoridad ang posibilidad na gamitin para sa mga sugatang miyembro ng Abu Sayaf na kasamang nakikipagbakbakan sa Marawi City ang mga binili nilang gamot.
By: Jaymark Dagala / Bert Mozo
Diskumpiyado ang DOJ o Department of Justice sa hirit na palit ulo ng Maute Terror Group upang mapalaya ang mga hawak nilang bihag kabilang na si fr. Chito Suganob.
Ayon kay Justice Secretary Vitaliano Aguirre, malabo ang nasabing alok ng mga terorista dahil sa wala namang polisiya o sistema ng pamahalaan na nakikipag negosasyon sa mga kalaban ng estado.
Dapat mapanagot ang mag-asawang Cayamora at Farhana Maute na siyang magulang ng magkapatid na Omar at Abdullah Maute dahil malaki ang pagkakasangkot ng mga ito sa pagsiklab ng gulo sa Marawi.
Una nang hiniling ng teroristang grupo na payag silang mapalaya ang mga hawak nilang bihag kapalit ang kalayaan ng mga inaresto ng pamahalaan kabilang na ang mag-asawang Maute.
By: Jaymark Dagala / Bert Mozo
Tiniyak ng DOJ o Department of Justice na walang selective justice na mangyayari makaraang muling binuksan ang imbestigasyon nito kaugnay sa multi-Bilyong Pisong pork barrel fund scam.
Ito’y matapos ipag-utos ni Justice Secretary Vitaliano Aguirre ang re-organization ng task force PDAF na siyang tututok sa mga sangkot sa nasabing kontrobersiya.
Itinalaga ni Aguirre si Undersecretary Antonio Kho para pangunahan ang panel of prosecutors at NBI agents sa pagsusuri sa mga ebidensyang isusumite ni pork barrel queen Janet Lim Napoles.
Ito aniya ang siyang papalit sa task force ng NBI na binuo ni Senadora Leila de Lima nuong siya pa ang Justice Secretary na nagsagawa ng fact finding investigation at nagpakulong kina dating Senador Juan Ponce Enrile, Jinggoy Estrada at Bong Revilla.
By: Jaymark Dagala / Bert Mozo
Kinumpirma ni Defense Secretary at Martial Law Administrator Delfin Lorenzana na marami pang bangkay ang kailangang makuha o marekober sa loob ng Marawi City.
Ayon kay Lorenzana, hindi pa rin makapasok ang iba’t ibang rescue at humanitarian organization tulad ng Red Cross sa nasabing lungsod dahil lubhang mapanganib pa rin ang sitwasyon duon.
Dagdag ng kalihim, nagpapatuloy pa rin ang militar sa pagpapasabog ng kanilang mortar at kanyon gayundin ang airstrike laban sa mga terorista.
Giit ni Lorenzana, ayaw nilang malagay sa peligro ang buhay ng mga volunteer at iba pang civic organizations kaya’t pinag-iingatan nila ang operasyon.
By: Jaymark Dagala / Jonathan Andal
Sisikapin ng pamahalaan na tapusin ang gulo sa Marawi City bago ang ikalawang SONA o State of the Nation Address ni Pangulong Rodrigo Duterte sa Hulyo 24.
Ayon kay Defense Secretary Delfin Lorenzana, batay sa pagtantya ni AFP Chief Gen. Eduardo Año, posibleng abutin na lamang ng isang linggo ang nararanasang krisis ngayon sa Marawi City.
Binigyang diin ni Lorenzana, humihina na aniya ang puwersa ng mga terorista makaraang makumpirma na sila-sila na mismo ang nagpapatayan dahil sa kakapusan ng logistics o pondo.
Bagama’t aminado ang kalihim na nakararamdam siya ng matinding pressure sa ngayon dahil sa pagnanais na matapos na ang gulo, ngunit mas mainam aniyang tumututok na muna sa tinatakbo ng opensiba upang makatiyak na magtatagumpay ang pamahalaan.
By: Jaymark Dagala / Jonathan Andal
Hindi kinagat ng AFP o Armed Forces of the Philippines ang alok na palit ulo ng Maute Terror Group upang mapakawalan ang mag-asawang Cayamora at Farhana Maute kapalit ang kalayaan ng mga bihag kabilang na si Fr. Chito Suganob
Ayon kay AFP Public Affairs Office Chief Col. Edgard Arevalo, malabong mapagbigyan ang nasabing alok dahil may umiiral na polisya ang pamahalaan na hindi makikipag-negosasyon sa mga terorista
Maliban dito, wala namang kinahaharap na anumang kaso si Fr. Suganob at iba pa nitong kasamahan. Hindi tulad ng naarestong mga magulang ng magkapatid na Omar at Abdullah Maute na may kinahaharap na kasong rebelyon
Una nang nanindigan ang malakaniyang sa pina-iiral no negotiation policy sa mga terorista na itinuturing na banta sa seguridad at kaayusan ng bansa.
By: Jaymark Dagala / Jonathan Andal
Kalunus-lunos ang sinapit ng isang pamilya sa San Jose Del Monte City sa Bulacan makaraang matagpuang wala nang buhay sa loob mismo ng kanilang tahanan sa North Ridge Subdivision sa Barangay Sto. Cristo.
Tumambad sa ama ng tahanan na isang security guard ang sinapit ng kaniyang mag-anak nang umuwi ito sa kanilang tahahanan mula sa kaniyang trabaho.
Ayon kay Superintendent Fritz Macariola, hepe ng San Jose Del Monte PNP o Philippine National Police, tadtad ng saksak sa iba’t ibang bahagi ng katawan ang mga biktima nang matagpuan.
Kinilala naman ang mga biktima na sina Estrella Dizon, 35 anyos, tatlo nitong anak na pawang mga menor de edad at isang lola.
Ayon kay Macariola, wala namang nakita ang pulisya na puwersahang pinasok ang tahanan ng mga biktima ngunit may indikasyon na pinagsamantalahan ang lola gayundin ang inang biktima.
By Jaymark Dagala