Dapat mas tutukan ng mga mambabatas ang ligal na aspeto ng ginawang pagpapalabnaw ng Korte sa kaso ng mga pulis na nasa likod ng pagpatay kay dating Albuera Mayor Rolando Espinosa sr.
Ito ang reaksyon ni Justice Secretary Vitaliano Aguirre kasunod ng isinusulong na mungkahi ni Senador Richard Gordon na tapyasan ang kapangyarihang saklaw ng Justice Secretary partikular sa pagrepaso ng resolusyon sa mga seryosong kaso.
Giit ni Aguirre, labag sa saligang batas ang mungkahi ng Senador dahil malinaw na ang isang kalihim, bilang miyembro ng gabinete ay alter-ego ng Pangulo ng Republika ng Pilipinas at hindi ito maaaring bawasan o tapyasan ng kapangyarihan.
Magugunitang iminungkahi ni Senador Gordon na sa halip na Justice Secretary ang humawak ng mga petition for review sa mga malalaking kaso, pinalilipat ito sa isang eksperto sa batas tulad ng isang retiradong mahistrado ng Korte Suprema.
Naglabas pa ng hinanakit si Aguirre sa pagsasabing hindi pinapansin ng mga kritiko ang punto de vista sa kaso ni Supt. Marvin Marcos at iba pa kung iyon ba’y suportado ng mga ebidensya o may pinagbabatayang jurisprudence o desisyon ng Korte Suprema.
By: Jaymark Dagala / Bert Mozo
Sisimulan na ng DOJ o Department of Justice ang kanilang Continuous Justice System o ang pagsasanay sa mga taga-usig na hahawak ng kasong rebelyon laban sa mga nasa likod ng Marawi Siege.
Ito’y ayon kay Justice Secretary Vitaliano Aguirre ay kahit hindi pa nailalabas ng Korte Suprema ang desisyon nito hinggil sa kanilang apela na ilipat sa Metro Manila ang pagdinig laban sa mga nasampahan na ng kaso.
Tatlumpung taga-usig ang pipiliin ng DOJ para italaga sa dalawang panel of prosecutors na isasailalim sa nasabing pagsasanay kung saan, ipagbabawal ang mga pagpapaliban sa mga pagdinig maliban sa mga makatuwirang kadahilanan at pangangailangan.
Gagawin ang pagdinig tuwing makalawang araw at kung maaari ay magkaroon agad ng hatol ang korte sa loob ng 90 araw o tatlong buwan mula nang ito’y maideklarang submitted for resolution.
By: Jaymark Dagala / Bert Mozo
Aminado ang original heartthrob at ultimate leading man na si Aga Muhlach na kabado siya sa kanyang pagbabalik pelikula.
Ito ay matapos ng anim (6) na taon na pamamahinga ng aktor sa showbiz.
Ayon kay Aga, bukod sa nararamdamang excitement, dahil sobrang namiss niya ang paggawa ng pelikula ay kinakabahan din anya siya na baka manibago siya sa pag-arte.
May working title na “Seven Sundays” ang comeback movie ng aktor na ipo-produce ng Star Cinema.
Makakasama niya sa nasabing pelikula sina Enrique Gil, Dingdong Dantes, Cristine Reyes at Ronaldo Valdez.
Samantala, inamin din ni Aga na pangarap niya makagawa muli ng pelikula kasama ang mga dati niyang nakapareha na sina Lea Salonga at Sharon Cuneta.
By Krista De Dios
Aabot sa apat (4) na trak ng mga relief goods at non-food items mula sa DSWD o Department of Social Welfare and Development ang ikinarga sa barko ng Philippine Coast Guard (PCG) na BRP Pampanga.
Ayon kay PCG Spokesman Commander Armand Balilo, dadalhin ang mga nasabing donasyon para ipamahagi sa mga evacuees sa Iligan City.
Aniya, bukod sa mga relief goods mula sa DSWD ay kasamang ikinarga ang mga karagdagang donasyon mula sa mga non-government organizations at laruan mula sa ilang mamamahayag.
Samantala, kinumpirma ni Balilo na patuloy ang kanilang pagsasagawa ng maritime security patrol at pagbabantay sa mga pantalan sa Iligan City, Davao City at Zamboanga.
By Krista De Dios | With Report from Aya Yupangco
Dumistansya ang Malakanyang sa isyung sangkot umano sa katiwalian ang Chinese business tycoon na si Huang Rulun.
Si Huang ang negosyanteng nagbigay ng donasyon at nagpondo sa pagpapatayo ng drug rehabilitation center sa Nueva Ecija na siya ring pinakamalaki sa bansa.
Ayon kay Presidential Communications Assistant Secretary Ana Marie Banaag, labas na ang Pilipinas sa nasabing isyu dahil panloob na usapin ito ng China.
Gayunman, tiniyak ni Banaag na kaisa si Pangulong Rodrigo Duterte sa kampanya ng China laban sa kurapsyon.
Batay sa ulat ng Financial Times, si Huang na isa sa pinakamayamang negosyante sa China ay nahaharap sa kasong kurapsyon sa nasabing bansa.
By Krista De Dios | With Report from Aileen Talilping
Ikinabahala ng Department of Labor and Employment (DOLE) ang pagbabalewala ng ilang OFW’s o Overseas Filipino Workers para magamit ang ini-alok na amnestiya ng pamahalaan ng Saudi Arabia.
Ayon kay DOLE Undersecretary Dominador Say, hanggang Huwebes na lamang ang ibinigay na palugit ng Saudi Arabian government para sa mga undocumented migrant workers.
Sa pinakahuling report na natanggap ng ahensiya, mayroon pa ring mga OFW sa Saudi Arabia ang hindi pa nakapagpaparehistro sa nasabing amnestiya.
Ito ay sa kabila ng ibibigay na tulong ng embahada ng Pilipinas sa pag-proseso ng kanilang mga dokumento.
Babala ni Say, oras na matapos na ang palugit ay aarestuhin na ng Saudi Arabian authorities ang lahat ng mga undocumented foreigners at mga dayuhang mayroon nang exit visa ngunit nananatili pa rin sa nasabing bansa.
By Krista De Dios | With Report from Aya Yupangco
Hindi kumporme si Senate Committee on National Defense and Security Gringo Honasan sa tila pagtatakda ng deadline DND o Department of Defense at AFP o Armed Forces of the Philippines kung kailan matatapos ang Marawi Crisis.
Ayon kay Honasan, hindi praktikal at mahirap tantsahin kung kailangan tuluyang masusugpo ang Maute Group lalo na’t itinuturing na ang mga ito bilang mga terorista.
Ito aniya ay dahil walang malinaw na physical boundaries ang grupo na nabuo sa iba’t ibang dahilan tulad ng kanilang kakaibang ideyolohiya, kahirapan at kultura.
Una nang sinabi ng DND at AFP na kanilang inaasahang matatapos na ang kaguluhan sa Marawi City bago ang SONA ni Pangulong Rodrigo Duterte sa Hulyo 24.
By Krista De Dios | With Report from Cely Bueno / Jonathan Andal
Bukas ang AFP o Armed Forces of the Philippines sa panukala ni dating senador at ngayon ay Foreign Affairs Secretary Allan Peter Cayetano na itaas sa edad na animnapu (60) ang retirement age ng mga sundalo.
Ayon kay AFP Public Affairs Office Chief Col. Edgard Arevalo, makakatulong ang nasabing panukala para mapakinabangan pa ng mas mahabang panahon ang mga tulong, kakayahan at abilidad ng mga sundalo.
Gayunman, sinabi ni Arevalo na ang nakikita anilang problema ay ang posibleng pagbagal sa promosyon ng mga sundalo.
Aniya, kailangan pang pag-aralang mabuti at timbangin ang nasabing panukala para makita ang mga positibo at negatibong epekto nito
Sa kasalukuyan ay edad limamput anim (56) ang mandatory retirement age ng mga sundalo.
By Krista De Dios | With Report from Aileen Taliping / Jonathan Andal
