Inatasan ni Pangulong Rodrigo Duterte si DOH o Department of Health Secretary Paulyn Ubial na bilisan ang pagbili ng mga hospital equipments para may magamit agad ang mga miyembro ng PSG o Presidential Security Group.
Ito’y ayon sa Pangulo nang pangunahan nito ang groundbreaking ceremony para sa bagong PSG station hospital sa loob ng Malakaniyang Park kasabay ng ika-120 anibersaryo nito.
Matapos ang seremoniya, nag-alay ng isang minutong panalangin ang lahat para sa mga sundalong nasawi sa Marawi City kasama na ang mga sugatan at patuloy na nakikipagbakbakan laban sa mga teroristsa.
Kasunod nito, binigyang parangal din ng Pangulo ang mga natatanging miyembro ng PSG na nakapag-ambag ng mga hindi matatawarang serbisyo.
By: Jaymark Dagala / Aileen Taliping
Photo Credit: RTVM
Mayruon nang pantapat ang mga tropa ng pamahalaan sa mga sandata ng teroristang grupong Maute sa Marawi City na naghahasik ng karahasan sa lugar.
Ito’y makaraang tanggapin mismo ni Pangulong Rodrigo Duterte ang military assistance na ibinigay ng Chinese government sa Pilipinas.
Personal na sinaksihan at ininspeksyon ng Pangulo ang turn-over ceremony kahapon sa Clark Airbase sa Pampanga kasama si Chinese Ambassador to the Philippines Zhao Juanhua.
Tatlong libong assault rifles na may 5000 bala at 90 sniper rifles na may 800,000 bala ang tinanggap ng Pangulo mula sa China.
Batay sa pahayag ni Ambassador Zhao sa Pangulo, unang batch pa lamang ang nasabing donasyon na nagkakahalaga ng 50 Milyong Yuan o katumbas 371 Milyong Piso.
Bukod pa ito sa kalahating bilyong Pisong donasyon ng Chinese government para sa mga nasugatang sundalo sa bakbakan sa Marawi City bagay na ipinagpasalamat ng Pangulo.
By: Jaymark Dagala / Aileen Taliping
Nagpatutsada si Pangulong Rodrigo Duterte sa dalawa umanong nagpapanggap at nag-aabang na makuha ang pagkapangulo makaraang hindi siya nakita ng publiko sa loob ng ilang araw.
Sinabi ng Pangulo sa ika-120 anibersaryo ng PSG o Presidential Security Group, isa sa mga ito ay ang talunang presidential candidate na si Ely “Spike Boy” Pamatong na nagpakalat pa ng video sa social media na nagpapakilalang Pangulo ng Pilipinas.
Ikalawa ayon sa Pangulo ay si Vice President Leni Robredo na umaasang masasawi na siya sa lalong madaling panahon lalo pa’t lumutang ang balita na siya’y na-coma ngunit ang katunayan siya’y nasa kama lamang.
Kasunod nito, pabirong binilinan ng Pangulo ang PSG na huwag magkakamali ang mga ito na lumipat ng kampo at sundin ang saligang batas hinggil sa tinatawag na succession.
By: Jaymark Dagala / Aileen Taliping
Nagpahayag ng kalungkutan si Pangulong Rodrigo Duterte sa mga pangyayari ngayon sa Marawi City dahil sa matinding pinsalang idinulot nito hindi lamang sa mga ari-arian kung hindi maging sa mga buhay ng mga taga-ruon.
Sa kaniyang talumpati sa ika-120 anibersaryo ng PSG o Presidential Security Group, sinabi ng Pangulo na kaniyang nilalabanan ang lungkot sa gabi lalo na kapag nababasa niya ang briefer na ibinibigay sa kaniya ng militar hinggil sa nagpapatuloy na bakbakan.
Labis din niyang ikinalulungkot na siya pa mismo ang nag-utos sa mga sundalo na makipag-digmaan sa mga teroristang Maute sa lungsod na karamihan ay mga kapwa Pilipino.
Ayon pa sa Pangulo, may balak siyang magtungo sa Marawi City para bisitahin ang mga sundalo dahil hindi aniya maaaring naka-upo lamang siya sa opisina habang pinanonood ang mga kawal na nagbubuwis ng buhay para sa bayan.
Batay sa pinakahuling tala ng AFP o Armed Forces of the Philippines, nasa 71 na ang nalalagas sa hanay ng mga sundalo dahil sa bakbakan.
By: Jaymark Dagala / Aileen Taliping
Sinusuyod na ng PNP Anti-Cybercrime Group ang website ng mga kumpaniyang nanghihingi umano ng donasyon para sa mga nabiktima ng gulo sa Marawi City.
Ayon kay S/supt. Michael Angelo Zuñiga, pinuno ng Anti- Cybercrime Group ng PNP, nais lamang nilang masiguro na lehitimo ang ginagawang fund raising ng mga ito.
Babala pa ni Zuñiga, maaaring makasuhan ng estafa ang mga foundation o may-ari ng website na nanghihingi ng donasyon ngunit hindi naman nakarating sa mga biktima ng Marawi Siege.
Bagama’t aminado ang hepe na wala pang nagrereklamo hinggil sa mga umano’y pananamantala, pinayuhan pa rin niya ang publiko na suriing mabuti ang mga website kung lehitimo at kung tunay na napupunta sa mga biktima ang ipinadadala nilang tulong.
By: Jaymark Dagala / Jonathan Andal
Pumalo na sa halos 400 ang kabuuang bilang ng mga nasasawing terorista sa Marawi City, isang buwan mula nang sumiklab ang bakbakan duon.
Ayon kay AFP o Armed Forces of the Philippines Spokesman Brig/Gen. Restituto Padilla, 299 sa mga ito ay mga terorista .
Ngunit ayon kay padilla, mahigit kalahati pa lamang sa mga ito ang body count o iyong narekober na ang bangkay.
Dagdag pa ni Padilla, may dalawa sa mga bangkay ay foreign looking o mukhang taga-gitnang silangan na narekober ng militar mula sa battle ground.
Samantala, nananatili sa 70 ang nasasawi sa panig ng mga tropa ng pamahalaan habang 27 sa mga ito ay mula naman sa hanay ng mga sibilyan.
By: Jaymark Dagala / Jonathan Andal
Kailangan pa ng karagdagang pondo ng pamahalaan para sa iba pang mga kinakailangang proyekto sa Marawi City partikular na sa aspeto ng imprastraktura.
Ito’y ayon kay Senador Sherwin Gatchalian kasunod ng inilaang 20 Bilyong Piso ng pamahalaan para sa rehabilitasyon ng Marawi City sa sandaling matapos na ang nararanasang krisis duon.
Batay sa pagtantya ni Gatchalian, sasapat lamang ang inilaang pondo para sa mga kinakailangang pabahay ng mga bakwit o iyong mga residenteng nagsilikas dahil sa bakbakan.
Maliban dito, kinakailangan din na makapagtayo ng mga bagong paaralan, ospital, kalsada at mga bagong pasilidad ng pamahalaan gayundin ang local economic and development center hindi lamang sa Marawi kundi maging sa Cotabato City.
By: Jaymark Dagala / Cely Bueno
Re-investigation ng DOJ re: PDAF at DAP Scam shinning moment para kay Sec. Aguirre – Sen. Gatchalian
Suportado ni Senador Sherwin Gatchalian ang hakbang ng DOJ o Department of Justice na muling buksan ang imbestigasyon nito kaugnay sa multi-bilyong Pisong PDAF at DAP scam.
Ito’y ayon sa Senador ay kasunod ng panawagan ng mga mamamayan na papanagutin sa batas ang lahat ng mga nasa likod ng maling paggamit sa pondo ng bayan na nai-uugnay sa kurapsyon at pang-aabuso sa kapangyarihan.
Ayon pa sa senador, magandang pagkakataon na rin ito para kay Justice Secretary Vitaliano Aguirre upang patunayan na hindi gagamitin ang muling pagbuhay sa imbestigasyon para gipitin ang mga miyembro ng oposisyon.
Umaasa si Gatchalian na magiging patas at masusi ang isasagawang imbestigasyon ng DOJ para mapanagot ang lahat ng tiwaling opisyal ng pamahalaan na lumustay sa pondo ng bayan anuman ang partidong kanilang kinaaniban.
By: Jaymark Dagala / Cely Bueno
