Nagpahiwatig na naman si Pangulong Rodrigo Duterte na mayroon siyang sisibaking opisyal ng pamahalaan dahil sa pagkakasangkot sa katiwalian.
Inihayag ito ng Pangulo sa kanyang talumpati sa Clark Airbase sa Pampanga makaraang tanggapin ang mga armas na donasyon ng People’s Republic of China sa Pilipinas.
Gayunman, hindi na nagbigay pa ng kaukulang detalye ang Pangulo sa kung sino o ilang opisyal ng pamahalaan ang kaniyang sisibakin sa mga susunod na araw
PAKINGGAN: Bahagi ng pahayag ni Pangulong Rodrigo Duterte
Ayon naman sa source ng pahayagang “The Philippine Star”, posibleng si Clark Development Corporation President Noel Manankil ang pinatutungkulan ng Pangulo.
Sinasabing kinausap na ni Duterte si Transportation Secretary Arthur Tugade na ipaalam kay Manankil ang kanyang desisyon matapos ang isinagawang NEDA Board Meeting sa Malacañang noong Martes.
By Meann Tanbio
Tumaas ng 70.74 percent ang kaso ng cyberbullying noong nakaraang taon.
Batay sa datos ng PNP Anti-Cybercrime Group, kabuuang pitong daan at walumpu’t dalawang (782) cyberbullying cases ang kanilang naitala noong nakalipas na taon kumpara sa apatnaraan at limampu’t walong (458) insidente noong 2015.
Pinakamarami ang naitalang kaso ng online libel na nasa 498.
Sa unang quarter ng 2017, ipinabatid ng PNP Anti-Cybercrime Group na nakapagtala na sila ng 142 kaso ng online libel, 41 online threats, 10 insidente ng unjust vexation at apat (4) na kaso ng child abuse.
By Meann Tanbio
Nagwagi ang Pinay na si Maureen Wroblewitz sa Asia’ s Next Top Model Season 2 sa Singapore.
Kinabog ng 19- anyos na Pinay ang mga kapwa contender na sina Shikin Gomez ng Malaysia at Minh Tu Nguyen ng Vietnam para sa final challenge ng kompetisyon na isang fashion walk.
Nagpakitang gilas si Maureen habang suot ang design ng kilalang si Xiao Qing na isa sa secret judge ng show.
Kabilang sa mga premyong matatanggap ni Maureen ay ang isang Subaru car, maging cover ng nylon Singapore at ang pinakaaasam na modelling contract sa Storm Model Management na naka-base sa London.
Dahil sa kanyang pagkapanalo, nagdiwang ang mga Pinoy lalo na sa social media kung saan nag-trending pa si Maureen matapos syang i-congratulate ng marami nitong tagasuporta.
Pia Wurtzbach sa last photo ni Maureen
Sensual but not offensive.
Ito ang naging reaksyon ni 2015 Miss Universe Pia Wurtzbach sa final photo ng pambato ng Pilipinas na si Maureen kung saan itinanghal itong Asia’s Next Top Model Cycle 5 winner.
Si Pia ay kabilang sa naging judge sa final photoshoot at catwalk challenge ng nasabing reality modelling competition show.
Ayon kay Pia, pinatunayan ni Maureen na hindi lamang siya isang dalagang may magandang mukha kundi may talento rin sa pagmomodelo.
Si Maureen ang kauna-unahang Pilipina na nagwagi sa Asia’s Next Top model.
Nakasama niya ang sa top 3 ang pamabato ng Vietnam na si Minh Tu Nguyen at Shikin Gomez ng Malaysia.
Maituturing na underdog si Maureen sa kompetisyon na madalas lamang sabihan ng “girl with a pretty face” pero pinatunayang kayang umangat laban matapos na magkasunod na makuha ang best photo sa magkasunod na challenge.
By Rianne Briones / Krista de Dios
Nagkaroon ng singkwenta (P0.50) hanggang sitenta’y singko sentimong (P0.75) dagdag sa presyo ng ilang brand ng de latang sardinas.
Ayon sa manufacturing group na Canned Sardines Association of the Philippines, napapanahon ang naturang taas presyo dahil taong 2012 pa huling gumalaw ang presyo ng sardinas.
Siniguro naman ng mga manufacturer na hindi tataas ng sobra ang mga presyo ng sardinas dahil kung mangyayari ito ay posibleng wala ng bumili nito.
Nagpahayag naman ng pagkabahala ang isang consumer group dahil hindi pa man naipatutupad ang isinusulong ng DTI o Department of Trade and Industry na pagpapaubaya ng suggested retail price sa mga manufacturer ay tila ngayon palang ay hindi na makontrol ang pagsipa ng presyo ng mga bilihin.
By Rianne Briones
Nanganganib kumalat sa mga karatig lugar ang Syrian civil war sa oras na magtuloy-tuloy ang sagupaan ng Syria at Israel sa Golan Heights.
Kahapon ay nagpakawala ng projectile ang Syrian Arab Army patungo sa posisyon ng Israeli Armed Forces sa bahagi ng Al-Quneitra at makalipas ang halos isang oras, naglunsad ng airstrike ang Israeli Airforce bilang ganti.
Tinarget ng mga aircraft ng Israel ang mga advancing unit ng Syrian Arab Army.
Sakaling magtuloy-tuloy ang gantihan, posibleng pumasok din sa digmaan ang Iran at Russia na kapwa kaalyado ng Syria.
Samantala, mistulang naghahanda na rin ang Amerika sa pinangangambahang regional war dahil sa deployment ng kanilang aircraft carrier na USS George W. Bush sa Israel.
By Drew Nacino
Siyam (9) na bihag ng ISIS-Maute Group ang nailigtas ng mga awtoridad sa Marawi City.
Kinilala ang mga nailigtas na sina Ariel Ansaw, Ronie Albacete, Lando Albacete, Dilbert Macatulag, Michael Ongos, Mario Manggubat, Jimboy Guinsayao, Bryan Catipay at Algin Generalao.
Ayon kay Lt. Col. Jo-Ar Herrera, Spokesman ng Joint Task Force Marawi, kinumpirma ng siyam (9) na biktima na buhay pa ang kanilang kapwa hostage na si Father Teresito ‘Chito’ Suganob.
Agad namang binigyan ng medical assistance at sumailalim sa gunpowder residue testing ang mga nailigtas na bihag.
Samantala, tiniyak ni Herrera na ginagawa ng gobyerno ang lahat ng paraan upang marekober ang mga sibilyang bihag ng Maute Group.
By Drew Nacino
Labing-pitong (17) bangkay kabilang ang limang (5) pugot na katawan ng sibilyan ang narekober sa Marawi City sa gitna ng nagpapatuloy na bakbakan.
Ayon kay Lt. Col. Jo-Ar Herrera, Spokesman ng Joint Task Force Marawi, narekober ang mga bangkay ng mga pulis, sundalo at civilian volunteer sa barangay Gadungan.
Isa anya itong indikasyon na brutal at walang kaluluwa kung pumatay ang mga miyembro ng ISIS-Maute Group.
Gayunman, hindi pa anya nakikilala ang mga narekober na bangkay ng mga sibilyan.
Posible namang lumobo pa ang bilang ng mga nasawi lalo’t hindi pa nasusuyod ng mga tropa ng gobyerno ang iba pang bahagi ng lungsod na nabawi mula sa kamay ng teroristang grupo.
By Drew Nacino
Balak na ngayong idawit ng House committee on Good Government and Public Accountability si dating Senador Ferdinand Bongbong Marcos Jr hingggil sa usapin ng tinaguriang Ilocos 6.
Ito’y makaraang payuhan umano ng dating Senador ang kaniyang kapatid na si Ilocos Norte Governor Imee Marcos na huwag dumalo sa ginagawang pagdinig ng Kamara hinggil sa umano’y anomalya sa paggamit ng tobacco excise tax.
Ayon kay Surigao Del Sur Rep. Johnny Pimentel, chairman ng komite, kaniyang kakausapin ang kanilang mga miyembro para talakayin kung anong kaso ang posibleng isampa laban sa dating mambabatas.
Dagdag pa ni Pimentel, matibay ang kanilang hinahawakang ebidensya dahil mismong ang gubernadora ang nagsabi nito na lumabas sa iba’t ibang media organizations gayundin sa social media.
By: Jaymark Dagala / Jill Resontoc
