Nilinaw ni House Prosecution Legal Spokesman Atty. Benjamin “Jay” Tolosa Jr. na hindi maaaring basta na lamang iharap bilang testigo si Vice President Sara Duterte sa impeachment trial kapag nagtungo muli ito sa senado.
Ayon kay Atty. Tolosa, alinsunod sa patakaran ng impeachment court, kinakailangang magbigay muna ng abiso ang prosekusyon at depensa limang araw bago iharap ang isang testigo.
karaniwan din anyang tuwing Martes isinusumite ng magkabilang panig ang listahan ng mga testigong ihaharap sa susunod na linggo.
Matatandaang dumating at pinulong ni Vice President Duterte sa senado ang kanyang defense team bago magsimula ang ikalawang araw ng impeachment trial nitong Hulyo 7, ngunit hindi mismo sumipot sa kanyang paglilitis ang Pangalawang Pangulo. | mula sa panulat ni Jordan Gutierrez
