Ikinagulat ng kampo ni Vice President Sara Duterte ang desisyon ng House Prosecution panel na hindi na iharap bilang mga testigo sina OVP Chief of Staff Atty. Zuleika Lopez at House Legislative Security Bureau Executive Director Belinda Bello.
Gayunman, iginiit ng defense team na iginagalang nila ang prerogatibo ng prosekusyon.
Ayon kay defense spokesman Atty. Michael Poa, wala silang pagtutol sa naging hakbang ng prosekusyon at hindi nila ito nakikitang otomatikong pabor sa depensa.
Malinaw naman anyang ipinaliwanag ng prosekusyon na hindi na kailangan ang dalawang testigo dahil magiging paulit-ulit lamang ang kanilang testimonya.
Samantala, inihayag ni Atty. Poa na posibleng hindi na rin iharap ng depensa ang ilan nilang testigo kung hindi kailangan, upang mapabilis ang pag-usad ng impeachment trial. | mula sa panulat ni Jordan Gutierrez
