Muling binalaan ng Scam Watch Pilipinas ang publiko, partikular ang mga online shoppers laban sa mga naglipanang mga online scam, lalo ngayong papalapit na ang holiday season.
Ayon kay Scam Watch Pilipinas co-founder Jocel de Guzman, online shopping scam at delivery scam ang dalawa sa nangungunang modus o kabilang sa tinatawag nilang “12 Scams of Christmas.”
Dagdag pa ni de Guzman, banta rin sa cybersecurity tuwing magpa-Pasko ang mga call at impersonation scams, kung saan maaaring gamitin ng scammer ang social media account ng biktima upang makapang-biktima ng ibang tao.
Dahil dito, mainam anyang gumamit ng mga lehitimong online shopping apps at kaagad magsumbong sa mga otoridad kapag nabiktima ng scam.
