Suportado ni Philippine National Police o PNP Chief Ronald Dela Rosa ang panukalang national curfew sa Kamara.
Ayon kay Dela Rosa, magiging malaking tulong sa pagsugpo ng krimen at sa kampanya kontra iligal na droga ang pagapapatupad ng curfew sa mga kabataan sa buong bansa.
Halimbawa aniya rito ang modus ng isang drug lord sa Davao na gumagamit ng mga bata para maghatid ng cake na may lamang shabu.
Gayundin aniya ang mga ‘akyat-bahay gang’ na gumagamit ng mga bata na makapapasok sa maliliit na daanan sa pagnanakawang bahay.
Iginiit pa ni Dela Rosa na ang mga nahuhuling menor de edad na iti-nurn over sa Department of Social Welfare and Development o DSWD ay nakalalabas din kinabukasan at muling nagagamit ng mga sindikato.
(Ulat ni Jonathan Andal)
