Muling ihahain sa Kamara ni Navotas City Rep. Toby Tiangco ang panukalang alisin ang systems loss charges sa buwanang singil sa kuryente ng mga konsyumer.
Ito ay kasunod ng panawagan ni Pangulong Ferdinand Marcos Jr. sa kanyang ikalimang State of the Nation Address o SONA 2026 na hindi na dapat ipasa sa mga konsyumer ang naturang singil upang mapababa ang mataas na presyo ng kuryente sa bansa.
Ayon kay Tiangco, matagal na niyang isinusulong ang House Bill No. 942 ngunit hindi ito umusad sa Kongreso.
Aniya, naging malaking pagkakataon ang panawagan ng Pangulo upang tuluyang maisabatas ang repormang direktang magpapababa sa gastusin sa kuryente ng bawat pamilyang Pilipino.
Sa ilalim ng panukala, ipagbabawal sa mga pribadong distribution utilities ang pagpasa ng systems loss charges sa mga konsyumer, limitahan sa limang porsiyento ang maaaring mabawing lehitimong technical losses ng mga rural electric cooperative, at alisin ang value-added tax o VAT sa systems loss charges.
Umaasa si Tiangco na maisasabatas ang panukala dahil malinaw na itong bahagi ng legislative agenda ng Pangulo at naniniwala siyang magbibigay ito ng agarang ginhawa sa mga pamilyang Pilipino sa pamamagitan ng mas mababang buwanang singil sa kuryente. | mula sa panulat ni Geli Mendez
