Nakatakdang simulan ang pamamahagi ng ayuda o cash assistance sa mga residente na nasa mga lugar na nakasailalim sa enhanced community quarantine (ECQ), partikular na ang National Capital Region (NCR), Bulacan, Cavite, Laguna at Rizal.
Ayon kay Department of the Interior and Local Government (DILG) Undersecretary Jonathan Malaya, 90% sa mga lokal na pamahalaan ng mga naturang lungsod ang nakatanggap na ng pondo mula sa pamahalaan para rito.
Isanglibong piso (P1,000) sa bawat indibiduwal, habang maximum naman na P4,000 kada pamilya, ang matatanggap ng mga residente sa Parañaque at Caloocan sa Miyerkules.
Sa Taguig naman, aayudahan ang mga benepisyaryo ng Social Amelioration Program (SAP) sa ilalim ng Bayanihan 1 at 2, mga nasa wait-listed beneficiaries, mga low-income earners, maging ang mga solo parents, may kapansanan at iba pang apektado ng ECQ.
Mamamahagi rin ang lokal na pamahalaan ng Taguig ng mga hygiene packs at pagkain sa kanilang mga residente.
Samantala, sa Huwebes naman aarangkada ang pamamahagi ng ayuda sa Maynila, Mandaluyong, at Valenzuela.
Susundan naman ito ng nalalabing bahagi ng NCR, Bulacan, Cavite, Laguna at Rizal.
Naglaan ang pamahalaan ng P22.9-bilyon upang maayudahan ang mga apektado ng pagpapatupad ng ECQ sa NCR Plus Bubble.