‘Mabahiran na ng masamang reputasyon sakaling mawala na sa mundo pero huwag lang tungkol sa korapsyon.’
Ito ang binigyang diin ni Pangulong Rodrigo Duterte sa harap ng pilit na ibinabatong akusasyon hinggil sa umano’y tagong yaman nito.
Ayon sa Pangulo, walang problema kung mag-iwan siya ng masama o mabuting imahe sa mga tao, pero ang hindi aniya niya matatangap ay ang maikapit sa kanyang pangalan ang katagang ‘corruption’.
Binigyang diin ng Punong Ehekutibo na tiyak na hindi siya tatagal ng 22 taon sa Davao kung siya ay nasangkot sa pagnanakaw sa pamahalaan.
Dagdag pa ng Presidente, isang beses lang siyang makikiraan sa mundo at kung may magagawa siyang maganda sa kanyang kapwa, hindi na niya ito palalampasin dahil hindi na ito muling darating.
Pagsasara ng bank account ni Trillanes sa Singapore beberepikahin ng Palasyo
Mariing inihayag ng Palasyo na kanila pang beberepikahin ang naging pahayag ni Pangulong Rodrigo Duterte hinggil sa pagsasara umano ng bank account ni Senador Antonio Trillanes IV sa Development Bank of Singapore (DBS) sa Singapore sa pamamagitan ng online.
Ginawa ni Presidential Spokesperson Ernesto Abella ang pahayag matapos lumabas sa balita na mayroong nagtanong sa DBS kung maaari bang magsara ng bank accounts ang isang indibidwal online.
Ngunit, aniya, ang sagot ng bangko ay kailangan na personal itong gawin ng account owner.
Giit ni Presidential Spokesman Ernesto Abella, kailangan beripikahin ang ibinigay na statement ni Pangulong Duterte pero kailangan din aniyang i-verify ang umano’y naging sagot ng DBS sa nasabing isyu.
Dagdag pa ni Abella, kailangang alamin ang buong katotohanan hinggil sa mga naturang impormasyong inilabas ni Pangulong Duterte at ng DBS.
